孖寶賽車系列

車

孖寶賽車系列（英文：Mario Kart，日文：マリオカート）係以任天堂旗下遊戲馬利奧系列人物為背景開發嘅賽車遊戲，第一隻遊戲喺1992年出。

遊戲簡介

孖寶賽車係集合好多瑪利歐系列嘅人物做成嘅高卡車式（Wii版開始有埋電單車）賽車遊戲。架車撞埋一個道具箱（超任版係「？面版」）可以得到一個道具，可以用嚟防禦、攻擊其他對手，亦可以用嚟同自己加速。每款遊戲都有多個可以一個人或多人玩嘅模式。

• 大獎賽模式：玩家要同電腦玩家喺唔同嘅獎盃賽進行比賽。所有版本都有呢四個盃：磨菇盃、花盃、星星盃同埋特別盃，喺後來既版本會收錄龜殼盃、香蕉盃、木葉盃、閃電盃，每個獎盃賽都有四條賽道。另外有三個速度設定，有啲遊戲重有「鏡像」模式，賽道會左右倒轉。玩家嘅總分只要攞第一就可以捧盃。喺每條賽道排名越前就攞到越多分，每條賽道第一名可以攞10分，所以一個獎盃賽最高可以攞40分。喺孖寶賽車 Wii 同 8代，因為競賽人數增加到12人嘅關係，每條賽道最多攞到15分，埋單最多60分。
  喺超級孖寶賽車、孖寶賽車Advance、孖寶賽車7 同埋 孖寶賽車8，賽道上有硬幣可以執，當執到十個或以上就上到極速。但如果架車撞到道具或者跌出賽道就會跌三粒硬幣。
• 計時賽：玩家嘅目標係以最快時間完成賽道，玩家事先會有三個蘑菇（可以加快速度一段短時間），幾時都用得。當完成咗計時賽，遊戲就會記錄時間，如果破紀錄就會儲低記錄，第日再玩可以播返。
• VS.：容許多個人喺同一賽道對戰，孖寶賽車DS開始亦可以同電腦玩家對戰。
• Battle：喺一個場地對戰以達到目的（但唔係賽車），其中一個模式係整爆晒第啲車啲氣球。

系列

遊戲名	日文名	英文名	遊戲機	推出日期
超級孖寶賽車	スーパーマリオカート	Super Mario Kart	超級任天堂	1992年8月27日
孖寶賽車64	マリオカート64	Mario Kart 64	N64	1996年12月14日
孖寶賽車Advance	マリオカートアドバンス	Mario Kart: Super Circuit	Game Boy Advance	2001年7月21日
孖寶賽車Double Dash!!	マリオカート ダブルダッシュ!!	Mario Kart: Double Dash!!	GameCube	2003年11月7日
孖寶賽車DS	マリオカートDS	Mario Kart DS	任天堂DS	2005年11月14日
	マリオカート アーケードグランプリ	Mario Kart Arcade GP	街機	2005年
	マリオカート アーケードグランプリ2	Mario Kart Arcade GP 2	街機	2007年
孖寶賽車Wii	マリオカートWii	Mario Kart Wii	Wii	2008年4月10日
孖寶賽車7	マリオカート7	Mario Kart 7	任天堂3DS	2011年12月1日
	マリオカート アーケードグランプリDX	Mario Kart Arcade GP DX	街機	2013年
孖寶賽車8	マリオカート8	Mario Kart 8	Wii U	2014年5月29日
孖寶賽車8 豪華版	マリオカート8 デラックス	Mario Kart 8 Deluxe	任天堂 Switch	2017年4月28日
	マリオカート アーケードグランプリVR	Mario Kart Arcade GP VR	街機	2017年
孖寶賽車 巡迴賽	マリオカート ツアー	Mario Kart Tour	iOS/Android/iPadOS	2019年9月25日
孖寶賽車實況 家庭賽車場	マリオカート ライブ ホームサーキット	Mario Kart Live: Home Circuit	任天堂 Switch	2020年10月16日
瑪利歐賽車世界	マリオカート ワールド	Mario Kart World	任天堂Switch 2	2025年6月5日

技術特點

• 動態難度調控

出面網頁

• 孖寶賽車系列嘅官方網站