遊戲改檔
遊戲改檔（英文：mod，粵拼：mot1）泛指由玩家對電子遊戲嘅內容作出更改，當中模組可以係指玩家做嘅更改。好多電子遊戲都有玩家為佢哋整模組，例如有陣時玩家嫌某隻遊戲易得滯，於是就為佢編寫一個模組，個模組裝咗就會提升隻遊戲嘅難度，包括令敵人血量增加或者人工智能聰明咗... 等等。然後呢班玩家仲可能會將個模組擺上網，俾其他人下載[1]。呢類情況常見於 RPG 同模擬遊戲。
喺廿一世紀嘅電子遊戲界，改檔對遊戲嘅成功愈加重要，噉係因為容易改檔嘅遊戲可以俾玩家多咗種方法嚟自我表達，間接俾玩家多咗種方法享受隻遊戲。有唔少遊戲開發者做遊戲編程嗰陣，都會特登將隻遊戲嘅程式編成容易改檔，甚至乎索性發佈一啲改檔工具俾玩家用，鼓勵玩家改檔[2]。
基本諗頭
[編輯]有人就改檔嘅嘢寫書，噉樣描述改檔：
乜嘢係 mod？Mod 係英文 modification（改造噉解）嘅簡稱，指由用家對視像遊戲做嘅編輯，可以算係同人小說嘅遊戲版。Mod 傳統上係免費嘅，可以係稍為改改啲碼嚟修正錯誤或者令隻遊戲玩得順暢啲，以至完全轉化——即係大幅度噉改啲美術資產，創造全新嘅遊戲體驗。[3]
改檔簡單嘅可以係改遊戲世界某啲物件嘅皮檔案，從而改變物件嘅樣，複雜啲嘅可以係引入全新嘅遊戲資產。
修補
[編輯]非官方修補係指隻 mod 整嚟係修正遊戲嘅錯誤。亦有啲情況係解鎖，俾玩家睇到一啲原本睇唔到嘅遊戲內容。
有關改檔破解原先睇唔到嘅內容，二〇〇四年遊戲俠盜獵車手：聖安地列斯[e 1]嘅熱咖啡模組嗰單嘢喺遊戲界就廣受討論：俠盜獵車手呢隻遊戲整嚟係預咗大人玩嘅，原先預定會有隻小遊戲俾玩家控制主角同主角嘅女朋友做愛；不過製作組諗諗吓，覺得噉樣恐怕會引起大爭議，於是就將隻小遊戲收埋—佢哋並冇剷走隻小遊戲嘅源碼[註 1]而只係剷走咗玩家可以用嚟開啟該小遊戲嘅渠道；隻遊戲出咗街之後，有玩家發現咗呢隻小遊戲嘅檔案，就整咗個 mod 做破解，令到玩家群玩到隻小遊戲，而遊戲主角 CJ 同佢啲女朋友做愛嘅影片引起咗公眾譁然[4][5]。
修改程度
[編輯]要將改檔模組分類，可以睇佢哋對遊戲內容作出幾大程度嘅修改。
一方面，改檔可以係純粹加少量嘅內容，形成所謂嘅附加檔[e 2]，簡單嘅可以係改改遊戲主角嘅髮型或者主角件衫嘅顏色呀噉，當中模擬市民系列喺呢方面就出晒名—呢隻遊戲屬於模擬遊戲，畀玩家創造模擬人，起屋畀模擬人住，並且掌控模擬人嘅日常生活，由飲食瞓玩等都可以控制，玩家亦可以決定模擬人嘅外型，包括模擬人要著咩衫，而呢個遊戲系列嘅 fan 士成日都幫遊戲做改檔，加多啲唔同嘅衫畀模擬人揀，或者加多啲唔同嘅虛擬傢俬可以擺入虛擬屋入便等等等[6]；附加檔嘅例子，仲可能有同某隻射擊遊戲添加戰鬥地圖，同某隻 RPG 添加新嘅道具，或者係同某隻賽車遊戲添加新嘅賽道呀噉[7]。呢啲噉嘅 mod 純粹係基於隻遊戲已有嘅內容，幫某啲類型嘅遊戲事物添加新嘅成員。
另一方面，又有啲 mod 會被稱為大改[e 3]，會增加新嘅遊戲機制，但未至於完全令到隻遊戲變咗第種體驗。玩家整呢種 mod 嘅目的，通常係為咗想改良隻遊戲。
自成遊戲
[編輯]唔少熱愛電子遊戲嘅人都有興趣創造屬於自己嘅遊戲。佢哋當中有啲會去學遊戲開發，又有啲會製作大改型嘅 mod 改造自己手上嘅遊戲。喺後者嘅情況下，有可能製作者係噉改，改改吓就令隻遊戲嘅改版同原版有咗極大差異，唔再認為係同一隻遊戲；個改版仲可能會大受歡迎，最後好似自成一隻新遊戲噉[8][9]。呢種 mod 就係所謂嘅完全轉化[e 4]。
英雄射擊遊戲絕地要塞 2 [e 5]就係完全轉化嘅例子：絕地要塞 2 呢隻遊戲一度風靡全球，係 Steam 平台上便最多人玩嘅遊戲之一；呢隻遊戲起源自一九九六年雷神之鎚[e 6] —雷神之鎚係第一身射擊遊戲，有提供俾玩家對局嘅死亡競賽遊戲模式；隻遊戲非常受歡迎，吸引好多玩家嚟玩同埋改檔，當中有個模組叫絕地要塞，為隻遊戲添加咗職業嘅概念，俾每位玩家揀一個職業，每個職業都自己獨有嘅一套特殊能力；個改檔吸引咗好多玩家，及後仲由美國嘅 Valve 製作組將佢整咗做一隻新遊戲叫絕地要塞，唔使裝落雷神之鎚嗰度都玩得[10]。及後製作組喺二〇〇七年出咗絕地要塞 2 做絕地要塞嘅續作—玩家貪得意整改檔，最後出咗隻經典遊戲[11]。
Mod 開發
[編輯]要改檔，第一步係要搵想改邊啲數據。呢點隻隻遊戲都唔同，有啲遊戲開發者會將隻遊戲整到對改檔友善[e 7]，例如二〇〇〇年嘅模擬遊戲模擬市民，就將遊戲角色嘅皮檔案以 BMP 快勞嘅形式擺晒喺目錄裡便[12]，玩家攞住小畫家等嘅簡單工具都可以改；有啲開發者甚至仲會將隻遊戲嘅源碼公開，玩家可以任意攞源碼去改；另一方面，遊戲開發者難免會或多或少想保護遊戲快勞，例如係唔想內容太易改，費事玩家唔小心改軭咗隻遊戲，有部份開發者因而會用進階嘅加密技術，將遊戲數據「鎖住」唔俾改，玩家要用專化嘅工具先可以開呢啲數據嚟睇[13]。
改造架生
[編輯]玩遊戲改檔成日都會用到反編譯器。反編譯器係一種工具，常見於還原工程[14][15]。反編譯器屬於一類程式，特徵係識得將行得到嘅二進制格式檔案轉化做高級程式語言源碼，即係例如個反編譯器能夠（簡化講）睇住遊戲程式行，留意住遊戲用嗰啲數據點樣變化[註 2]再砌返出一段能夠出到相同功能嘅 Python 源碼。喺廿一世紀初嘅世界，遊戲界甚至仲有埋開源嘅反編譯架生，例如係 dnSpy 噉。
十六進制編輯器係一種工具，容許用戶睇同埋編輯檔案嘅原始二進制數據。電腦檔案係以一系列字節嘅形式儲住嘅，而十六進制編輯器就會用十六進制格式表示呢啲字節，呢種格式比起二進制更加易讀。每一對十六進制數字對應一個字節，而編輯器通常仲會顯示一欄附加嘅 ASCII 等價數據。因此，十六進制編輯器可以用嚟分析或者修改一般編輯器無法存取嘅數據[16]。
玩改檔嗰陣，十六進制編輯器適合用嚟改二進制檔案入面嘅遊戲數據，例如行得嘅檔案（.exe 或 .dll）、存檔檔案或者設定檔案。玩改檔嘅人可以篡改特定數值，好似係角色嘅生命值或者其他屬性，從而修改隻遊戲。譬如玩家嘅最大生命值以數值形式儲咗喺遊戲數據入面，玩改檔嘅人可以用十六進制編輯器搵呢個數值出嚟，將佢轉換成十六進制，然後再做想要嘅更改。因此，十六進制編輯器對玩遊戲改檔嘅人嚟講好有用。
|
睇埋
[編輯]註釋
[編輯]英詞
[編輯]英文詞彙：
引述
[編輯]- ↑ Postigo, H. (2008). Video game appropriation through modifications: Attitudes concerning intellectual property among modders and fans. Convergence, 14(1), 59-74.
- ↑ Postigo, H. (2007). Of mods and modders: Chasing down the value of fan-based digital game modifications. Games and Culture, 2(4), 300-313.
- ↑ Champion, E. (2013). Game mods: design, theory and criticism. Lulu. com，用以下嘅定義做起始點："What is a mod? Mods, short for 'modifications', are user-made edits made to PC videogames, the game equivalent of fan fiction. Traditionally free, they range from minor code changes to fix bugs or smoothen gameplay to 'total conversions'—complete overhauls of art assets to form an entirely new experience.
- ↑ Kerr, A. (2006). Spilling hot coffee? Grand Theft Auto as contested cultural product. A strategy guide for studying the grand theft auto series.
- ↑ Cross, W. (2005). Hot coffee and freeze-dried first amendment analysis: The dubious constitutionality of using private ratings for public regulation of video games. First Amend. L. Rev., 4, 299.
- ↑ Wirman, H. (2014). Gender and identity in game-modifying communities. Simulation & Gaming, 45(1), 70-92.
- ↑ Mario Kart 8: 9 Best Mods. Game Rant.
- ↑ Markocki, M. (2023). Total conversion mods: expanding beyond the original game. Images. The International Journal of European Film, Performing Arts and Audiovisual Communication, 33(42), 115-124.
- ↑ Nieborg, D. B., & Van Der Graaf, S. (2008). The mod industries? The industrial logic of non-market game production. European Journal of Cultural Studies, 11(2), 177-195.
- ↑ Bates, Jason (February 24, 1999). "Team Fortress Classic preview". IGN. Archived from the original on March 2, 2014. Retrieved March 23, 2014.
- ↑ The 50 best games of all time. gamesradar+.
- ↑ Maxis (2000)
- ↑ Chen, L., Shashidhar, N., Rawat, D., Yang, M., & Kadlec, C. (2016, February). Investigating the security and digital forensics of video games and gaming systems: A study of PC games and PS4 console. In 2016 International Conference on Computing, Networking and Communications (ICNC) (pp. 1-5). IEEE.
- ↑ Boomerang Decompiler Project: Boomerang: A general, open source, retargetable decompiler of machine code programs [Online], Available: [1]
- ↑ Perry, M., & Oskov, N. (2004). Introduction to Reverse Engineering Software. URL (consulted August 2004) 31.4.1
- ↑ Conti, G., Dean, E., Sinda, M., & Sangster, B. (2008, September). Visual reverse engineering of binary and data files. In International Workshop on Visualization for Computer Security (pp. 1-17). Springer, Berlin, Heidelberg.
外拎
[編輯]- （英文） Champion, E. (2013). Game mods: design, theory and criticism. Lulu.com，呢本書比較學術化。
- （英文） dnSpy，GitHub
- （英文） 改檔嘅勝利，講到電子遊戲業界愈嚟愈重視改檔呢樣嘢，玩家所展現嘅創意令唔少開發者感到驚嘆。
- （英文） Steam 工作坊，Steam 嘅遊戲改檔平台。
- （英文） Steam 上面嘅改檔，Steam 講佢哋點樣支援玩家玩改檔。
- （英文） Kamen, Matt (24 April 2015). "Skyrim 係史上第一隻畀人用錢喺 Steam 度買 mod 玩嘅遊戲，Valve 製作組曾經嘗試喺 Steam 平台上便推出「可以畀錢買嘅 mod」，冇幾耐就引起咗巨大嘅爭議，Valve 後嚟取消咗個計劃單嘢先收到科。
| 遊戲分類 |
|  | |||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|
| 涉及工作 |
| ||||||||||||||||||
| 相 關 科 技 概 念 |
| ||||||||||||||||||
| 玩家 |
| ||||||||||||||||||
| 拉雜相關 | |||||||||||||||||||