加密

  「解密」跳轉到呢度。假如你想揾嘅係其他用法，請睇「解密 (搞清楚)」。

加密（粵拼：gaa1 mat6）喺電腦保安上係指將一段數據入碼，轉化成第種表示方式，收訊人會知道段信息係點加密嘅，所以會有能力解讀段信息，但收訊人以外嘅人就因為唔知個加密方案，就算截到段信息都解讀唔到。加密過程可以想像成下圖噉－

• 最左手邊嗰張白紙代表段明文，呢張紙掕住嗰條鎖匙就係密文碼，
• 中間嗰張白紙代表密文－張紙上面寫咗啲就噉睇好似語無倫次噉嘅字，
• 右手邊嗰條鎖匙係負責做解密嘅演算法，會將段密文轉化返做原本嗰段信息。

還原加密嘅過程叫解密（粵拼：gaai2 mat6）。

基礎

啞謎機產生嘅密文；就噉睇，依段嘢好似完全冇任何意思可言。

睇埋：密碼學

加密係指用一啲特定嘅編碼方法（即係所謂嘅密文碼）將一段想傳嘅信息（明文）轉化做一串串嘅符號（密文），例如係一大串嘅 0 同 1，令到淨係得收信息嘅人能夠解讀（解密）嗰段嘢；技術化噉講，加密（E）同解密（D）可以想像成函數，會各自噉將自己嘅輸入轉化，當中解密係加密嘅反函數：

$D=E^{-1}$

密文碼係編碼方法嘅一種，同一般嘅編碼方法唔同嘅係，密文碼係唔會俾外人知嘅，所以就算第啲人－例如係黑客－攞到串信息都唔會識得點樣解讀。好似係密文噉，如果一個人唔知段密文碼（每個字母對應啲乜），佢唔會有能力搵得出嗰段信息加密之前嘅樣。

應用

睇埋：情報

加密嘅應用非常廣泛，基本上只要同資訊安全有關，都離唔開加密。喺金融方面，諸如網上銀行轉帳、信用咭付款，背後全部都要靠加密嚟保障交易資料唔會俾人偷。喺通訊方面，好似 WhatsApp 等嘅即時通訊軟件，都會用端對端加密，確保只有發送同接收嘅人先睇到訊息內容。

除此之外，加密仲廣泛應用喺政府、軍事、醫療等領域，用嚟保護敏感資訊。

睇埋

• 密碼法
• 密匙
• 難讀化
• 遊戲改檔
• 機械翻譯

文獻

• Fouché Gaines, Helen (1939), Cryptanalysis: A Study of Ciphers and Their Solution, New York: Dover Publications Inc.