十六進制係逢16進位嘅進位制，主要係電腦用，用喺電腦嗰陣會用到 0 到 9 十個數字同埋 A 到 F 六個字母記數，A 至 F 分別代表 10 至 15，唔分大細楷。電腦用係因為兩個十六進制數字啱啱就係一個位元組，啲數寫出來亦唔會太長。
喺程式入面用十六進制通常都要用前綴或者後綴表明係十六進制，目前最常見係 C 語系嘅寫法，用 0x 前綴（字串入面用 \x 前綴，x 代表英文 hexadecimal）；其他有 Motorola 嘅 $ 前綴同 Intel 嘅 h 後綴（h 代表 hexadecimal）等等。統一碼嘅 U+ 前綴亦常見。
