快速行進

快速行進（warp / fast travel）係指將玩家角色由一個地點傳送去另一個地點，喺編程上即係玩家角色嘅坐標位置一吓變；快速行進嘅機制喺遊戲設計上好有用，例如喺一隻有遊戲地圖嘅平台遊戲當中，玩家喺遊戲地圖行去某個點就會被傳送去其中一個關卡（例如古惑狼系列）；另一方面，有遊戲會俾玩家喺遊戲地圖嘅某啲點之間做快速行進，呢種做法常見於遊戲地圖有返咁上下大嘅遊戲－玩家吓吓靠行會好嘥時間（例如寵物小精靈）。

騎馬（horse-riding）：傳送機制嘅一個妥協版本－有唔少遊戲設計師認為，傳送係好使好用，但會減少玩家欣賞（好多時整得好靚嘅）遊戲世界嘅機會；於是有設計師諗出咗條橋－俾玩家用某啲方法增加角色嘅移動速度，等佢哋有得慳移動時間之餘，又多啲機會欣賞遊戲世界。「移動速度提升」喺外觀上通常係設定成「玩家角色騎緊馬」或者「玩家角色坐緊交通工具」，所以呢個機制就有個名叫「騎馬」。