治療師 (電子遊戲)

依幅圖畫描繪一位神父；喺採取奇幻美學嘅遊戲裡便，healer 外觀上好多時都設定為某啲類型嘅神職人員。

依個人玩 cosplay 扮演絕地要塞 2 入便嘅醫療兵；醫療兵係嗰隻遊戲中嘅治療型角色，設定上佢係一位醫生，著住醫生噉嘅白袍。

喺打機用語中，治療師（參見英文：healer，粵拼：粵化口語音：hiu1 laa2*4），又叫治療型角色，係多人電子遊戲入便嘅一類角色，成日喺隊制對打嘅遊戲中出現。佢哋嘅特徵係有能力回復隊友嘅生命值、解除負面狀態、甚至喺隊友死亡嗰時令隊友返生。佢哋通常冇乜攻擊力，而且可能好脆弱需要隊友保護，但係佢哋對團隊整體嘅存活起咗關鍵作用。諸如角色扮演遊戲、射擊遊戲以至 MOBA 等嘅遊戲類型，都有治療型角色。

喺好多遊戲入便，治療師仲可以分做主支援同埋功用支援兩類。前者治療力勁，而後者治療能力冇咁勁（對手使出超強力攻擊嗰陣可以會「醫唔切」而令隊友死亡）但係就有第啲有用嘅異能。

主要特徵

睇埋：生命值

治療師最基本嘅功能係回復生命值（回血），但好多遊戲會俾佢哋有某啲額外嘅技能。視乎個別遊戲：治療師可以擁有消除狀態效果嘅能力，喺隊友受到中毒、石化等負面效果嗰時幫助解咒；佢哋亦時常有能力加強隊友，譬如係提升隊友嘅攻擊力或者防禦力呀噉；喺某啲遊戲當中，高階嘅治療師仲可能會有復活相關嘅異能，能夠喺戰鬥途中俾陣亡咗嘅隊友返生。總體嚟講，治療師嘅重點功能就係支援、幫助自己嘅隊友 。

喺部份奇幻遊戲入便，治療師唔單止有支援型嘅異能，仲可以「用神聖力量對抗邪惡生物」。喺呢啲遊戲入便，治療師通常會被設定為某啲形式嘅神職人員，因此「可以使用神聖嘅力量」，而呢啲力量能夠對敵人造成傷害，尤其係會剋制死靈或者邪靈等嘅邪惡生物。例如最終幻想系列入便嘅白魔導士就係噉：喺最終幻想多部作品入便，白魔導士除咗能夠治療隊友之外，仲可以用聖光咒語嚟對進犯嘅死靈造成巨大損害。

喺非奇幻嘅遊戲當中，治療師外觀上就傾向係某啲類型嘅醫護人員，例如英雄射擊遊戲絕地要塞 2 中嘅治療師設定為一位醫生而同為英雄射擊類嘅鬥陣特攻，亦有安祖娜呢位角色，喺安祖娜嘅背景故事入便，佢本來係醫生，但就為咗救人而走上戰場，擔當緊急醫療嘅職責。

使用技巧

睇埋：側擊

喺隊制嘅射擊遊戲入面，治療型角色通常冇咩火力，而且防禦力亦唔高，所以戰場企位相當重要，通常基本原則係要企喺隊友後面，睇實隊友，保持同隊友嘅視線（噉隊友嘅生命值一下降，治療師就會留意到）隨時準備為隊友補血。佢哋仲需要具備良好嘅局勢意識，要識追蹤隊友嘅走位，預測邊個最有可能受傷先，至可以及時提供支援。

治療師本身往往會成為敵方優先攻擊嘅目標：因為一旦喪失後勤支援，中前線就好容易潰散。因此治療師條命就好緊要：隊伍通常會安排坦克型角色企喺治療師前面，幫治療師「擋子彈」，諸如絕地要塞 2 同鬥陣特攻等嘅英雄射擊遊戲，魔獸世界噉嘅大型多人網上 RPG 以至龍與地下城噉嘅桌上 RPG 都係噉；而且治療師自己亦需要有返咁上下警覺性，例如敵人鬼祟潛入自己陣營（好可能係諗住由後面攻擊治療師）嗰陣，要盡快留意到，並且採取適當嘅行動。

相關條目

• DPS：多人遊戲當中專門負責攻擊殺敵嘅角色。
• 坦克：多人遊戲當中負責幫隊友擋攻擊嘅角色。
• 職業：响美術上，治療型角色通常對應神職人員、醫護人員或者類似嘅角色。

外拎

• （英文） 白魔導士，最終幻想 wiki 講解最終幻想系列中嘅白魔導士。
• （英文） 策略家，講漫威爭鋒入便嘅治療型角色（佢哋稱之為策略家）。