魔法系統

魔法系統（英文：magic system）係奇幻創作嘅一個概念。一個魔法系統係指故仔涉及魔法元素嘅奇幻作品當中對「魔法點運作」嘅描述，即係「啲魔法做到啲乜嘢效果」、「啲魔法係邊啲人用得到」以及「啲魔法嘅力量有乜嘢限制」等問題嘅答案，令個故仔有理可循，例如《哈利波特》就花咗唔少篇幅講哈利仔喺魔法學校學魔法，呢啲情節得意之餘，仲會間接話俾讀者觀眾知「哈利波特世界裏面嘅魔法係點運作嘅」，而打後情節當中發生嘅事唔會同呢啲法則有所矛盾。