魔像

呢幅插圖描繪想像中嘅魔像。佢額頭上嗰段字係希伯來文 אֱמֶת / emeṯ，即係真理噉解。

魔像，希伯來文：גּוֹלֶם / gōlem，近似粵拼：go1 lem4，係源自猶太人民俗嘅傳說生物，係一種大致人噉形、用冇生命嘅材料造嘅存在體，當中材料通常係泥土或者粘土呀噉。

猶太傳統

2023 年喺德國一地展出嘅玩具魔像

睇埋：創世紀

《塔納赫》講到上帝創世，初頭創造人類嘅始祖亞當，正正就係首先用泥土整佢出嚟，然後再注入生命嘅。因此有啲傳統文獻將亞當描述為魔像。

喺猶太人嘅民俗之中，有種講法係話聖人（充滿信仰，品德好等）能夠製造魔像，理由係因為佢哋覺得呢啲聖人可以唔完全噉模仿上帝創造亞當嘅神跡。

特徵

根據舊時嘅傳說，魔像呢種存在體往往係禍福參半嘅恩賜。佢哋具備以下特徵：

• 冇咩智能：魔像通常冇靈魂，反映人類唔能夠完美噉複製上帝嘅大能。
• 力量巨大：佢哋通常擁有超越常人嘅體力，不畏刀劍，啱晒用嚟幫手做粗重嘢或者做守衛。
• 字面執行指令：魔像對主人唯命是從，但通常都淨係識得照字面意思執行指令；例如叫魔像去森林斬樹，用意係想佢哋帶木材返屋企，魔像可能會因為主人冇明確叫佢斬完就返屋企，就一路係噉斬，斬到成座森林都斬晒為止。

因此，講魔像嘅傳說多數都係講猶太人用佢哋嚟做勞動力或者守衛。

傳說

有唔少猶太傳說都講到，零舍有品德同虔誠嘅拉比能夠運用佢哋嘅神秘知識，製作魔像，用魔像嚟保護猶太群體免受反猶太者嘅攻擊。

例如十六世紀後期嘅布拉格（今捷克首都）就出咗布拉格魔像嘅傳說：傳說嘅重點角色係拉比拉瑪；拉比拉瑪生於十六世紀嘅布拉格，當時神聖羅馬帝國嘅皇帝下咗令，要強行驅逐當地嘅猶太人，違者格殺勿論；於是拉比拉瑪就去當地河邊，用河邊嘅粘土製作出巨大嘅人形，同呢個人形改咗個名叫若瑟，身形高大強壯嘅若瑟完全唔怕刀劍，成功趕走晒想傷害猶太社群嘅人。亦有部份版本講到，若瑟執行命令嗰時執行得太徹底，喺布拉格四圍破壞，仲波及到無辜嘅人，要等到拉比拉瑪將若瑟額頭上嘅字抹走，令佢停止運作，件事先收到科。

現代虛構

呢幅畫描繪想像中好聽話嘅 AI 魔像。

睇埋：homunculus同奇幻

响現代嘅奇幻虛構作品之中，魔像係一種不時出現嘅題材，佢哋嘅形象喺奇幻桌上 RPG 以至電子遊戲裡便都有出現。諸如龍與地下城、魔法風雲會、最終幻想同埋勇者鬥惡龍等嘅奇幻遊戲，都用咗魔像嘅概念。

喺呢啲作品中，魔像嘅概念被大幅擴展：佢哋可以用多種唔同材料造，由各種金屬、冰以至布料造嘅都有，而且唔同材料嘅魔像，特性各異。例如勇者鬥惡龍入便嘅魔像用磚噉嘅材料造，專門守住某啲地方，好多時會係大佬級嘅敵人。

睇埋

• 科學怪人：科學怪人有陣時會被稱為「用肉造嘅魔像」。
• 元素精靈：尤其可以睇下土元素嘅元素精靈。
• 皮諾曹
• 人工智能

外拎

• （英文）Golem：電視橋段網講到魔像呢條橋段。
• （英文）Golem：講勇者鬥惡龍入便嘅魔像。