睡公主
想搵第二個意思嘅話，請睇睡公主 (搞清楚)。
《睡公主》（粵拼：seoi6 gung1 zyu2），又有叫《玫瑰公主》或者《睡美人》，係德國《格林童話》收錄咗嘅其中一個童話故事，亦都有喺 14 世紀嘅加泰隆尼亞文詩歌度出現[1]。《睡公主》內容大概係講有位公主受詛咒而一路睏覺，直到有位王子咀佢先至醒[2]。
個名
[編輯]《睡公主》喺各歐洲語言入面嘅名如下：
- 加泰羅尼亞文：La Bella Dorment－大致係「睏緊覺嘅靚女」噉解
- 法文：La belle au bois dormant－大致係「喺樹林睏緊覺嘅靚女」噉解
- 英文：Sleeping Beauty－「睏緊覺嘅美人」
- 德文：Dornröschen－大致係「有刺嘅小玫瑰」噉解
情節
[編輯]以下呢個情節大要係反映緊廿世紀起最常見嗰個版本。要留意嘅係《睡公主》源自民間故事，坊間流傳住多個版本。某啲版本可能同以下嘅大要有明顯出入。
好耐好耐以前有一位國王同一位皇后，佢哋啱啱生咗位小公主。佢哋兩個都希望小公主大個咗會生得靚性格又好。但好景不常，有個邪惡又法力強大嘅仙子向小公主落咗個咒語：邪惡仙子咒公主的確會成為一個又靚、又健康、又性格好嘅女仔，但會喺 16 歲生日嗰日手指俾紡織用嘅針拮到而死亡。國王同皇后好驚，不過喺呢個時候，公主個神仙教母出手，神仙教母法力唔夠邪惡仙子咁勁，做唔到完全打消個咒，但就將個咒減弱咗－個咒變成「公主會喺 16 歲生日嗰日手指俾紡織針拮到，但淨係會因此進入 100 年嘅長眠；睏咗 100 年後，佢會俾一個靚仔嘅王子咀一啖，因而醒返」。國王同皇后知個女保得住條命之後，即刻鬆咗啖氣。
到咗公主 16 歲生日嘅日子，皇宮上下都忙住搞慶祝會，國王記得邪惡仙子落嘅咒因而囉囉攣。主管典禮嘅大臣留意到有平民婦女喺度做編織（帶住針），向國王作出警告。國王一氣之下想重罰班平民婦女，但受到皇后勸阻。然後公主到場，在場嘅眾人開始跳舞，國王同皇后仲請咗幾位王子嚟，想俾個女揀個做老公。冇幾耐，有個著住斗篷嘅古怪阿婆到場，送咗個紡錘俾公主，公主對件物件覺得好好奇（國王同皇后因為唔想個詛咒應驗，由細到大都唔俾公主掂紡織嘢）。國王同皇后留意到即刻想阻止公主掂個紡錘，但已經太遲：公主已經唔小心手指俾個紡錘拮到。然後公主就開始頭暈，並且倒地昏迷。個古怪阿婆除低佢件斗篷，原來佢就係邪惡仙子，邪惡仙子大笑，諗住公主已經死咗。不過神仙教母到場，指出公主只不過係睏著咗。然後就叫啲僕人幫手將公主捧上去床，而神仙教母就向成個王國施咗一個咒語，令所有人都同公主一樣進入沉睡，同時一大團有刺嘅植物生咗出嚟圍住成座皇宮，令個王國同外界隔絕。
過咗 100 年之後，有個靚仔又勇敢嘅王子喺度同一班貴族一齊打獵。佢班朋友同其他在場貴族玩得好開心，但王子有啲唔開心想自己一個人獨處吓。王子一支公走入森林嗰度，撞到神仙教母，神仙教母揀王子做幫公主解咒嘅人。神仙教母施法，令王子見到沉睡緊嘅公主，王子即刻對公主產生好感，然後神仙教母向王子解釋成件事嘅來龍去脈，王子就要求神仙教母帶佢去見公主。神仙教母應佢要求，帶佢去收埋咗喺有刺植物入面嘅皇宮嗰度。邪惡仙子出場，想阻止佢哋，但王子同神仙教母一齊合力打低佢。到咗皇宮之後，王子咀瞓緊覺嘅公主一啖，破解個魔咒，成個王國嘅人跟住醒返。
最後王子同公主喺成個王國嘅人見證下成婚，神仙教母施法祝福兩個人，大團圓結局。
改編
[編輯]呢個童話故事有畀人改編做芭蕾舞劇。
