巴別塔
_-_Google_Art_Project_-_edited.jpg)
巴別塔（希伯來文：מגדל בבל，羅馬化：Mīgdal Bāḇel [註 1]），又有叫通天塔，係《舊約聖經 · 創世記》裡便提到嘅一座塔。巴別塔嘅古仔講到，人類打算起一座同天一樣高嘅塔，上帝覺得佢哋太囂張，就變亂晒佢哋嘅話、口音，起塔嘅眾人聽唔明對方噏乜，溝通唔到，座塔就起唔成。
依個故仔可以算係起源神話，攞嚟解釋點解人類會講咁多種唔同語言。而聖經可以話係人類史上最有影響力嘅書，好似巴別塔噉嘅聖經故事廣泛傳播到去世界各地，仲有唔少創作品由巴別塔嘅故事嗰度取材，用巴別塔嚟做語言多樣性嘅象徵。
原文粵譯
[編輯].jpg)
原版巴別塔個故仔出自《創世記》第十一章第一至九節，用現代粵文表達嘅話如下[註 2][1]。
話說當時全世界嘅人冚唪呤都係講同一隻語言嘅，是但搵兩個人，佢哋講嘢都做到完全相通。世人喺示拿搵到一笪平地，並且喺嗰度定居。
有一日，佢哋有個諗頭，想要起一座宏偉無比嘅城市，城市要有一座塔，座塔嘅頂高到能夠掂得到個天，噉就傳揚到佢哋嘅威名。傾掂之後佢哋就郁手，攞住泥土整磚頭同砂漿，啲磚頭燒到紅晒，一路開始起塔。
主（上帝）一路望住人類起塔，就講：「睇吓，世人要起城同塔，成為同一樣嘅人民，講同一樣嘅語言，咁劃一就乜嘢都做得到喇話？我哋落去，將佢哋嘅語言搞亂，等佢哋嘅語言彼此唔再互通。」
就係噉，主令佢哋（世人）分散咗去世界唔同嘅角落，佢哋就唯有停工，唔再起乜嘢通天塔。噉係因為主變亂咗天下人嘅語言。
個名點嚟
[編輯]聖經查實從來未提過巴別塔噉嘅字眼，而係用
- 希伯來文：אֶת-הָעִיר וְאֶת-הַמִּגְדָּל
噉嘅詞句
依組詞要譯做粵語，可以大致解作嗰座城市同埋嗰座塔噉嘅意思。至於 בבל / Babel / 巴別 依啲詞係點來嘅，二十一世紀初嘅學界仲未有咩共識可言。一個較多人接納嘅講法係，隻詞源自希伯來文 בָּלַל / bālal—近似粵拼：baa6 laau1 —即係希伯來文撈埋一齊、搞亂噉解，來自故事中上帝將人類嘅語言變亂嗰一段[2]。
信仰教誨
[編輯]巴別塔嘅故事同好多《聖經》故事一樣，成日畀猶太教徒同基督徒攞來教道理。
對於上帝點解要搞亂人類嘅語言，一種最常見嘅詮釋係話上帝覺得人類想起通天塔係過度自大，所以就搞亂佢哋嘅語言，作為懲罰；拉比同神父等教信仰嘅人，不時會用依個故事教信徒喺上帝嘅無窮力量面前要謙卑，自大只會招來懲罰。依點亦被指係響應咗《創世記》入便成日講到，上帝同人類之間起衝突嘅主題—好似係亞當同夏娃嘅故仔，係講人類想得到智慧，最後搞到俾上帝逐出伊甸園[3]。
亦有學者同信徒持有較正面嘅見解，覺得上帝唔係喺度懲罰人類[4]。例如有種觀點就噉諗：巴別塔件事發生喺大洪水之後；世人經歷過大洪水，變到過度保守，喪失晒探索意慾；佢哋仲想創造一個完全一元嘅世界，所有人都要講同一隻語言、用同一套方法思考，然後佢哋仲想建造通天塔，想全世界嘅人都見到，進一步令世界變得更單一；有見及此，上帝就郁手將世人變成係會講多種語言，世人就焗住要分別去唔同地方探索，用唔同方法思考[註 4]；根據依種睇法，上帝嘅舉動並非懲罰，而係對世人嘅循循善誘[5]。
神話分析
[編輯]由神話學嘅角度睇，巴別塔屬於起源神話依種類型。起源神話意思即係話某個群體嘅人用個故事來解釋某個習俗、地理特徵或者現象嘅起源。巴別塔嘅故事流傳於古時嘅猶太人群體，佢哋用巴別塔來解釋點解世界會有咁多唔同語言[6]:426：根據古人嘅睇法，上帝認為人類為咗避免第二次洪水[註 5]而起塔係褻瀆，所以就令到多種語言出現，世人彼此唔再明白對方講乜[6]:51；引起語言混亂[註 6]。
亦要留意嘅係，巴別塔嘅故事被指同創世紀某啲地方有矛盾之處：根據經文，巴別塔件事發生之前，全人類本來都只係講同一種語言；不過前一章《創世記》10:5，又講到先列嘅幾個唔同後代「各按照自己嘅方言」分散開去[7]，兩者被指係起咗矛盾。有關依個問題，奧古斯丁嘅意見認為個故事雖然冇明講，但係查實係返去交代，人類點樣由一種共通嘅語言，分裂成多種方言[8]。而二十一世紀初嘅學界一般認為，《創世記》依兩章出自唔同來源－現代學界共識係，好似《創世記》等嘅妥拉眾書來自唔同嘅來源，承集咗古猶太先列經過多個世紀寫低嘅文獻[9]。
語言學
[編輯]語言學不溜都有研究語言起源嘅概念：早喺廿世紀中，語言學家已經留意到包括眾日耳曼語言（英語同德語等）、眾羅曼語言（法語、西班牙語同葡萄牙語等）、希臘語同埋印地話（覆蓋印度北半橛多地）... 等嘅好多隻語言，都有某啲奇怪嘅相似性，於是就萌生咗印歐語系嘅概念，主張呢拃語言查實曾經係同一隻語言，但後嚟因為講呢隻語言嘅人類四圍遷徙，變咗做兩個唔同嘅群體，兩者嘅語言就慢慢演變咗做兩隻差異大到唔能夠互通嘅語言；簡化講，打後嘅語言學研究睇返呢啲語言嘅歷史，發現呢啲語言的確有「曾經係一樣咁滯嘅，但後嚟變到愈嚟愈唔同」嘅情況，最後確立咗印歐語言嘅諗頭[10]。除咗印歐語言，漢藏語系（粵語同閩南話等漢語所屬嘅語系）、南島語系（例子有馬拉話）同亞非語系（例子有希伯來語）... 等都係相當出名嘅語系。
因此，「呢幾隻語言曾經係同一隻語言」噉嘅諗法，喺廿一世紀初嘅語言學上係廣受接納嘅[註 7][11]。之但係語言學家一般都認為巴別塔嘅故事純屬神話，唔係史實，理由包括—
- 《舊約聖經》似乎自相矛盾：巴別塔個故仔開頭嗰陣話，全世界嘅人都係講同一隻語言嘅；但係打前嘅部份—《創世記》第 10 章第 5 節[12]—就話喺大洪水過後嘅世界，挪亞嘅後代四圍去建立唔同嘅國家，呢啲國家各有自己嘅語言；
- 語言演變係逐漸嘅：例如粵語噉，2010 年嘅粵語同 1910 年嘅粵語有啲差異，但依然夠相似，能夠高度互通，2010 年嘅粵語同 1810 年嘅粵語亦都有啲差異，但依然相對細；不過如果攞 1010 年嘅粵語先祖同 2010 年嘅粵語，兩者望落會似唔同嘅語言。現代語言學一般唔接受「一隻語言受到神秘力量影響，一瞬間變咗幾隻唔同語言」噉嘅主張[13]。
- 巴別塔嘅故仔相當含糊，例如根本冇講清楚件事喺幾耐之前發生。可以睇睇可否證度嘅概念。
等等。
睇埋
[編輯]
|
詞彙
[編輯]以下係篇文用咗嘅詞彙嘅粵英對照，啲拼音用嘅係粵拼：
註解
[編輯]引述
[編輯]- ↑ 創世記11章（基督教欽定本：創11；可以睇埋：基督教和合本：創11、天主教思高本：創十一）.
- ↑ John L. Mckenzie (1995). The Dictionary of the Bible. Simon and Schuster. p. 73.
- ↑ Harris, Stephen L. (1985). Understanding the Bible: A Reader's Introduction. Palo Alto: Mayfield.
- ↑ Rathbone, M. (2014). Interpretations of the Tower of Babel narrative in the African context. Acta Theologica, 34(1), 173-196.
- ↑ The Qur'an and Torah on the True Meaning of the Tower of Babel and Multiple Languages. Ancient Origins.
- 1 2 Coogan, Michael D. (2009). A Brief Introduction to the Old Testament: the Hebrew Bible in its Context. Oxford University Press. ISBN 9780195332728.
- ↑ Genesis 10:5
- ↑ Louth, Andrew; Oden, Thomas C.; Conti, Marco (2001). Genesis 1–11; Volume 1. Taylor & Francis. p. 164. ISBN 1579582206.
- ↑ Hiebert, Theodore (Spring 2007). "The Tower of Babel and the Origin of the World's Cultures". Journal of Biblical Literature. 126 (1): 31–32. JSTOR 27638419.
- ↑ Gamkrelidze, T. V., & Ivanov, V. V. (1990). The early history of Indo-European languages. Scientific American, 262(3), 110-117.
- ↑ Rahayu, E. Y. (2012). A CRITICAL REVIEW ON HISTORICAL LINGUISTIC WRITTEN IN WIKIPEDIA. Dinamika Bahasa dan Budaya, 7(2), 43-52.
- ↑ 創世記10章5節（基督教欽定本：創10:5；可以睇埋：基督教和合本：創10:5、天主教思高本：創十5）.
- ↑ Dresher, B. E. (2010). The tower of Babel. Toronto Working Papers in Linguistics, 32.
