創建神話

依幅畫描繪想像中嘅亞當同夏娃。根據創世紀，佢哋係史上最早嘅人類，係所有人類嘅原祖父母。

响神話學上，創建神話，又叫起源神話，係神話一類，特徵係喺某群體嘅人之間流傳，俾佢哋用嚟解釋某種自然或者社會現象由邊度嚟。依類神話可以係講宇宙點樣誕生，依種神話喺世界各宗教中都有出現，亦可以聚焦喺某笪地方、民族、家族。依類神話嘅主角可以係神祇、英雄，亦可以係人類以外嘅動物。創建神話有幾個重要功能：可以幫某群體嘅人建構身份認同，解釋點解某啲規矩同儀式值得遵守，仲可以提供共同記憶，透過節慶同建築風格等嘅文化產物嚟傳承。

創建神話好常見：例如係五羊傳說噉，就係廣州嘅建城神話，講到廣州嘅起源，仲有解釋點解廣州有個外號叫羊城。又例如係聖經中講巴別塔嘅故事噉，猶太教同基督教古時會用依個故事，解釋點解人類有咁多唔同語言。

創世神話

依幅畫描繪挪亞方舟嘅故事；個故事講到洪水過後，挪亞同上帝訂立新盟約，猶太教傳統上用依個盟約解釋何解猶太人有禁忌，唔准食動物嘅血。

内文：創世神話

創世神話可以算係起源神話一類，泛指解釋宇宙同世界點嚟嘅神話。由猶太教同基督教，以至埃及神話同中國神話等，都有故事講宇宙同世界嘅起源。

聖經（猶太教同基督教）《創世記》嘅故事就好出名，傳統上，猶太教同基督教都會用依個故事講宇宙係點嚟嘅。喺創世紀第一章，上帝用咗七日建立宇宙秩序：由混沌無序變成可居住、有節律嘅世界；每日內容嘅簡化版－

• 光與暗：上帝話要有光，定出晝夜嘅輪替。
• 天穹分水：將上面嘅水同下面嘅水分開，形成天依個空間領域。
• 海與陸、植物：聚水成海，露出旱地（地），再令地生發出各樣植物。
• 光體：安置日月星，管理晝夜、節令、日子、年份。
• 空與海之生命：海裡群生、天空飛鳥。
• 陸上生物同人：地上走獸、牲畜、昆蟲，以及「按上帝形象」被造嘅人（男同女），受託治理大地、管理萬物。
• 安息與成聖：上帝完成創造之工，賜福並「成聖」第七日。

猶太安息日嘅起源，據講就係來自創世紀講到，上帝喺第七日休息。

建國神話

中國神話就有三皇五帝嘅傳說。三皇五帝係相傳夏朝之前出現嘅八位最出名嘅領袖人物。三皇五帝嘅皇同帝，係講皇天上帝，即係話呢啲三皇五帝其實唔係人，而係神，喺古時直情係宗教，有儀式去拜。史學家一般都唔會將三皇五帝嘅當係堅嘅歷史，而只當係神話，最多只反映古人嘅文化。三皇五帝最早嘅文獻記載係《呂氏春秋》。

睇埋

• 神話
• 民俗