鄧炳強

出自維基百科,自由嘅百科全書
跳去導覽 跳去搵嘢
鄧炳強
PDSM[1]
Chris TANG Ping-keung.png
2020年1月
Flag of Hong Kong.svg 香港保安局局長
現任
就任日期
2021年6月25號
行政長官林鄭月娥
前任李家超
Flag of Hong Kong.svg 香港警務處處長
任期
2019年11月19號-2021年6月25號
前任盧偉聰
繼任蕭澤頤
Flag of Hong Kong.svg 香港警務處副處長(行動)
任期
2018年11月24號-2019年11月18號
前任劉業成
繼任蕭澤頤
個人資料
出世 (1965-07-04) 1965年7月4號(56歲)
Flag of Hong Kong (1959–1997).svg 英屬香港
籍貫廣東東莞

鄧炳強PDSM[1]英文TANG Ping-keung Chris1965年7月4號—)係香港政府保安局現任局長,兼任候選人資格審查委員會官守成員。佢曾經做過香港警務處處長,係出嗮名嘅「鷹派」。

生平[編輯]

鄧炳強自稱喺西環長大[2]。1987年喺香港中文大學畢業,跟住加入皇家香港警察任職督察,駐守過刑事調查工作、國際聯絡事務同埋行動指揮等多個單位。2006年至2008年被借調去法國里昂國際刑警組織秘書處出任刑事專項主任,並喺任內擢升爲國際刑警有組織犯罪及暴力罪案組主管。

鄧炳強喺2007年晉升爲高級警司,2012年晉升爲總警司,2015年晉升爲助理警務處長,出任港島總區指揮官同埋主管人事部。2017年晉升爲高級助理警務處長,並獲委任爲行動處處長。2018年獲委任爲警務處副處長,成為警務處「二哥」,接替退休嘅副處長劉業成,11月24號生效。

2019年11月19號,中華人民共和國國務院依照《基本法》嘅有關規定,並根據行政長官林鄭月娥嘅提名同建議,任命鄧炳強接替盧偉聰出任警務處處長[3]

2021年6月23號,國務院再根據行政長官林鄭月娥嘅提名同建議任命鄧炳強爲保安局局長,同月25號公佈同生效[4][5],同時免去原警務處處長職務,由警務處原副處長蕭澤頤接任。

爭議[編輯]

因應香港警察反修例運動期間嘅問題同其他執法爭議,鄧炳強好多時候都要回應傳媒,而佢嘅言論,特別係攻擊示威者同傳媒嘅言論,亦引起咗一啲爭議。另外,佢亦曾經指控美國政府,話佢哋係影響香港安全嘅外國勢力[6]

涉嫌干預教大講師學術自主[編輯]

2020年4月27號,鄧炳強向香港教育大學校長張仁良發信,要求跟進佢哋嘅講師蔡俊威2019年喺港台節目《左右紅藍綠》上,有關警方圍攻理大嘅言論,聲稱蔡俊威挑動仇警情緒。

有關言論引起公眾廣泛批評,民主黨立法會議員許智峯發信畀公務員事務局要求跟進鄧炳強嘅行為。高教公民指責佢公然侵犯學術自由同院校自主,又發起「一人一信 支持蔡俊威」行動,要求張公正處理蔡嘅個案,守護學術自由同院校自主,同時亦呼籲全香港巿民參與聯署[7]。另外,香港9間大學學生會亦發起聯合聲明,譴責香港警察粗暴干預學術自由[8]

被新聞界同高等教育界等人士批評無理指控傳媒[編輯]

喺2021年4月15號,鄧炳強唔點名批評壹傳媒「誤導、炒作」,引用似是而非嘅民調研究,結果引起社會嘩然,新聞界,高等教育界同社運人士都有唔少人批評佢嘅言論。

香港記者協會晚上發聲明譴責,指佢喺毫無實質證據下「大放厥詞」,向傳媒作出無理指控,要求佢收回有關言論。記協又反駁,香港傳媒過去發表嘅民調,大多數由獨立機構發表,認為公眾有能力判斷呢啲民調有冇公信力。記協又提到,警察喺反修例風波入面,持續暴力對待前線記者,而鄧炳強亦無信守承諾,調查舊年(2020年)5月一單有關警務人員,喺山東街要求記者踎低同對佢哋噴射射胡椒噴劑嘅事件,形容鄧炳強嘅發言係進一步抹黑傳媒、形同喺傷口上灑鹽,嚴重破壞雙方關係,要求警方停止踩踏同埋傷害新聞業界[9][10]香港大學法律學院首席講師張達明指,執法人員、特別係鄧炳強作為紀律部隊首長,係更加要嚴守無罪假定原則,要去講實際證據,鄧炳強嘅言論畀人觀感係未審先判。民權觀察發言人沈偉男亦批評鄧炳強嘅言論非常唔理想,釐清傳媒作為第四權,有監察政府施政嘅天職,香港重視新聞自由,傳媒工作者理應喺唔受恐懼嘅情況下監察政府。香港浸會大學新聞系高級講師呂秉權認為,鄧炳強嘅言論係預先準備,潛台詞就係「傳媒危害國家安全」,傳媒喺文明地方向來都百花齊放,應該容許有唔同風格嘅傳媒存在,並以事實為基礎作報道。《蘋果日報》總編輯羅偉光回應話,作為執法部門首長發表針對傳媒嘅言論,係典型推卸責任嘅講法,認為傳媒挑起所謂仇恨、分化,令人質疑係咪要畫更多紅線,日後更嚴厲打壓傳媒[6]

參考[編輯]

  1. 1.0 1.1 "二○一八年授勳名單 附件:二○一八年獲授勳銜及嘉獎人士的嘉許語" (PDF) (新聞稿) (中文). 香港政府新聞公報. 2018年7月1號. p. 13.
  2. "香港示威:北京任命「鷹派」領軍人物為特區警隊新「一哥」" (英文). 2019-11-19. 喺2019-11-19搵到.
  3. "國務院正式任命鄧炳強 接替盧偉聰出任警務處處長". 東方日報. 2019-11-19. 原著喺2019-11-19歸檔. 喺2019-11-19搵到.
  4. "国务院任免香港特别行政区政府主要官员" (中文). 中華人民共和國國務院. 2021年6月25號.
  5. "政府公布主要官員任免" (中文). 香港特別行政區政府新聞公報. 2021年6月25號.
  6. 6.0 6.1 "鄧炳強恫嚇傳媒:違國安要付代價 《蘋果》總編質疑鋪路嚴厲打壓 | 蘋果日報". Apple Daily 蘋果日報 (中文). 喺2021-04-17搵到.
  7. "鄧炳強發信跟進教大講師言論 高教界聯署斥損學術自由 促張仁良公正處理". 原先內容歸檔喺2020-05-15. 喺2020-06-04搵到.
  8. "香港教育大學學生會 The Education University of Hong Kong Students' Union". 喺2020-04-28搵到.
  9. "【國安教育日】鄧炳強批傳媒、暗指壹傳媒誤導炒作 記協:在毫無實質證據下大放厥詞 | 立場報道 | 立場新聞". 立場新聞 Stand News (英文). 喺2021-04-16搵到.
  10. "聲明:記協譴責警務處長抹黑傳媒 要求立即收回不當言論". Facebook (英文). 喺2021-04-16搵到.

出面網頁[編輯]