陳皓桓

出自維基百科,自由嘅百科全書
跳去導覽 跳去搵嘢
陳皓桓
Figo Chan Ho-wun
台灣殺人案疑犯洗黑錢判監29月 民主派促林鄭撤回引渡修訂1 (cropped).jpg
民間人權陣線召集人
任期
2020年10月21號-2021年5月28號
前任岑子杰
繼任鍾松輝
民間人權陣線副召集人
任期
2018年-2020年10月21號
繼任何啟明
黃亦武
個人資料
出世 (1996-04-03) 1996年4月3號(25歲)
英屬香港
政黨社會民主連線(2015ー)
民間人權陣線(2015-2021)
學歷香港專業教育學院(中退)

陳皓桓(英文:Figo Chan Ho-wun,1996年4月3號—),香港政治人,前民間人權陣線召集人,2020年10月上任至到第二年5月28號。

2020年12月8號,陳皓桓晨早俾警方拘捕。除咗佢之外,仲有其他民主派人士被拉,包括胡志偉、東區區議員徐子見陳榮泰曾健成「阿牛」同埋社民連成員「四哥」鄧世禮[1]

早年[編輯]

陳皓桓自細就關心時事,會自行錄影行政長官答問大會,希望終有一日能夠為市民發聲。有一次,佢所讀嘅中學響6月5號搞考試,佢話要為咗紀念六四事件,建議學校放假一日;而當時仲係社民連成員黃毓民嚟到佢所在嘅中學演講,佢深受影響[2]

之後響同學嘅介紹下,佢加入組織「中學生聯盟」。響2009年六四當日,佢接受媒體訪問,老豆睇到後覺得佢唔應該搞呢啲野,嬲到拎住把菜刀,叫佢以後都唔好參加;陳皓桓就離家出走咗幾日。老豆一直反對佢參加社運,去到五年後陳皓桓參加雨傘運動,終於明白到阿仔唔係玩嘅,就轉為支持佢[3]

原本響香港專業教育學院讀旅遊系嘅佢,響雨傘運動期間決定退學。2015年,時任社會民主連線內務副主席黃浩銘睇到陳嘅拍片講話,就睇起佢,決定邀請佢加入社民連。陳最後接受邀請[4][5]

政治生涯[編輯]

初期[編輯]

響加入社民連最初,佢分別擔任黃浩銘響區議會選舉同立法會選舉嘅選舉助理。後嚟黃畀人拉咗[5]。雖然黨內有唔少聲音覺得佢太後生,但有啲都睇起佢。佢曾經做過梁國雄嘅議員助理[6]

2016年爆發反對起高鐵,陳皓桓聯同黃浩銘、朱凱廸就曾經走去前立法會大樓同高鐵站抗議;2017年中共主席習近平訪問香港,佢同社民連成員去抗議,因而同愛國人士起爭拗,而陳皓桓同時任主席吳文遠畀差人拉咗[7]

另外佢亦係「社民連行委會」常務委員、「社會行動」幹事,同埋「警權組」召集人[8]

副召集人時期[編輯]

2019年,陳皓桓同其他民主派要求特首林鄭撤回修訂

去到2018年,佢出任民陣副召集人。響無耐,亦即係2019年,爆發反修例運動。初期,佢聯同其他民主派人士要求特首林鄭月娥撤回逃犯條例修訂。佢話如果林鄭最後唔收返,佢就會公佈包圍立法會總部嘅計劃,又要求林鄭同李家超落台[9]。後嚟林鄭話條例已經「壽終正寢」[10]

但係好多人都覺得林鄭冇誠意[10],所以民陣就多次向差人申請不反對通知書,不過成日畀人拒絕[8]。陳皓桓覺得要持績發聲,就曾經以個人嘅名義發起游行示威去抗議,包括十月二十號嘅遊行[11]

參考[編輯]

  1. "民主派朱凱廸、胡志偉、梁國雄等8人被捕 一文睇清各人罪名". hk01.com. 2020-12-08. 喺2021-08-01搵到.
  2. "【星期日人物】重回街頭‖陳皓桓". 明周文化 (英文). 2017-08-13. 喺2021-08-16搵到.
  3. "【逆流青年.1 】社民連陳皓桓:無政府搞嘢,無今日嘅我". 獨立媒體. 2018-11-10.
  4. "眾新聞 | 【專訪】一人秘書處、同伴入獄 陳皓桓的單打獨鬥". 眾新聞 (中文). 喺2021-08-16搵到.
  5. 5.0 5.1 "民陣一人秘書處陳皓桓:不相信群眾,又可相信什麼?". theinitium.com. 喺2021-08-16搵到.
  6. 周皓宜 (2021-05-28). "陳皓桓首判刑入獄:堅持不會解散民陣 聽黃毓民一席話關心六四". 香港01 (中文). 喺2021-08-17搵到.
  7. "【專訪】退潮下的一人戰鬥 陳皓桓:有我一日民陣不解散 | 立場人語 | 立場新聞". 立場新聞 Stand News. 喺2021-08-17搵到.
  8. 8.0 8.1 周禮希 (2020-10-22). "民陣換屆 陳皓桓接替岑子杰任召集人:續為民主而戰". 香港01 (中文). 喺2021-08-17搵到.
  9. "台灣殺人案疑犯洗黑錢判監29月 民主派促林鄭撤回引渡修訂". 美國之音. 喺2021-08-17搵到.
  10. 10.0 10.1 "香港逃犯條例修訂「壽終正寢」仍難平息紛爭". BBC News 中文 (中文). 2019-07-09. 喺2021-08-17搵到.
  11. "民陣陳皓桓等4人以「個人名義」發起明日九龍遊行 (17:53) - 20191019 - 港聞". 即時新聞. 喺2021-08-17搵到.