中華人民共和國香港特別行政區維護國家安全法
提示：呢篇文講嘅唔係維護國家安全條例。
《香港國家安全法》，全名《中華人民共和國香港特別行政區維護國家安全法》，官方簡稱「港區國安法」，坊間又叫做「香港國安法」、「港版國安法」，係指全國人大常委會為香港制訂有關國家安全嘅法案[1][2][3]，過程中未諮詢過大部分香港市民，連泛民主派、香港本土派、修憲派所有人都惹嚟爭議。
2020年5月，第十三屆全國人大第三次會議通過咗《全國人民代表大會關於建立健全香港特別行政區維護國家安全的法律制度和執行機制的決定》，內容總共有七點[4][5]。呢一個條例同俗稱「二十三條」嘅《香港特別行政區基本法》第二十三條[6] 唔同。爾條法例會授權全國人大常委會制定法律，之後會列入《香港特別行政區基本法》附件三，由香港政府喺當地公布實施[7]。呢一個決定亦都授權咗中央人民政府維護國家安全嘅機關，根據需要，喺香港設立機構，依法履行維護國家安全嘅職責。
但呢個決定，亦引起咗香港民意同國際社會嘅普遍反對，泛民主派嘅評論普遍認爲「一國兩制」正式玩完，引申嘅事件，包括泛民主派47人案，同埋蘋果日報同壹週刊停刊事件等，亦有唔少引起全球關注，包括唐英傑案、銅鑼灣刺警案、羊村繪本案等等。
背景
[編輯]《香港特別行政區基本法》第二十三條要求香港立一條《國家安全法》，防止「叛國、分裂國家、煽動叛亂、顛覆中央人民政府及竊取國家機密」。
2003年，時任香港保安局局長葉劉淑儀嘗試立國安法，但因為草案條文會侵食言論、集會自由，搞到50萬人上街抗議、商界（第一）立法會議員田北俊倒戈，所以立法唔成功。
2019年，香港修例風波爆發，香港連續好多個月有大規模示威、抗爭活動，反對行政長官林鄭月娥提出嘅《逃犯條例修訂草案》。呢條逃犯條例咁多人反對，係因為草案畀行政長官有絕對權力，決定可以移交任何嫌疑犯去外地審判，拆走中國大陸同香港法制之間嘅防火牆，所以坊間又叫「送中條例」，寓意「送終」。示威持續好多個月，當中包括至少三次多過100萬人參與嘅大遊行，直至武肺疫情令街頭人數減少。
習近平政府認為，香港咁多年都立唔成國家安全相關法律，俾反對中國共產黨統治嘅「境外敵對勢力」有生存空間，要「堵塞漏洞」。於是，2020年5月，第十三屆全國人大第三次會議開會，提出直接動用《基本法》附件三入面人大可以直接令「全國性法律」喺香港生效嘅預留權力，兜過香港立法會訂立《香港國家安全法》。
人大決定條文
[編輯]2020年5月，第十三屆全國人大第三次會議以2878贊成、1票反對、6票棄權通過通過《全國人民代表大會關於建立健全香港特別行政區維護國家安全的法律制度和執行機制的決定》[8]。內容有七個部分，大致內容係噉：
- 闡明中國堅決反對全部外國同境外勢力用咩嘢方式去干預香港內部事務，如果有就會採取必要措施去反制。
- 規定維護國家主權、統一同埋領土完整係香港特別行政區政府嘅責任；強調香港政府應該儘早搞掂香港基本法規定嘅維護國家安全立法，香港嘅行政機關、立法機關、司法機關都應該要一齊跟據有關法律規定有效咁防範、制止同埋懲治危害中國同香港國家安全嘅行為。
- 規定香港政府應該要建立一個完整嘅維護國家安全機構同機制；中央維護國家安全嘅機關會根據需要，喺香港特別行政區設立機構，依照法律去履行維護國家安全嘅相關職責。
- 規定香港行政長官應該要就香港特別行政區履行維護國家安全職責、開始國民教育、依法去禁止危害國家安全嘅行為等等，重定期要同中央政府交報告。
- 授權畀全國人大常委會，就要建立全面嘅香港維護國家安全嘅法律制度同埋執行機制制定相關法律，同埋會根據呢樣嘢去行使經授權過嘅職權。
- 明確咁指明全國人大常委會相關法律嘅任務，係實際咁去防範、制止同埋懲罰發生喺香港入面嘅分裂國家、顛覆國家政權、組織實施恐怖活動等等嚴重咁危害國家安全嘅行為，同埋外國、境外勢力干預香港事務嘅活動。
- 明確咁指明全國人大常委會會決定將呢個法律列入香港基本法附件三，由香港喺當地公佈同實施。
法例條文
[編輯]
2020年6月，人大常委開始草擬《香港國安法》條文，過程完全機密，香港政府冇份參與。6月30號朝早，十三屆全國人大常委會第二十次會議第二次全體會議以162票全票通過草案，並且即晚11點實施[9]。法案生效之後，香港特別行政區政府先至刊憲公佈條文。條文分成6個部分，共66條[10]。
法例訂立四條新嘅刑事罪名，全部最低刑罰監禁三年，最高成世坐花廳：
- 分裂國家罪
- 顛覆國家政權罪
- 恐怖活動罪
- 勾結外國或者境外勢力危害國家安全罪
法例有治外法權，無論做事嘅人係咪香港永久性居民，犯事嘅地點係咪香港境內，呢條法例都有權追究。
法例設立「維護國家安全公署」，公署人員嘅執法行動唔受香港特別行政區管轄，開銷由中央政府包底，唔使對香港政府庫房負責。
人大常委保留對法律嘅解釋權。
雖然呢啲罪行預設喺香港審理，但係行政長官有權直接欽點指定法官審案，中央政府仲有權將個別案件拎去大陸司法系統審理。律政司司長鄭若驊表示，唔可以保證拎咗去大陸法庭審理嘅香港國家安全案件唔會判死刑[11]。
香港反應
[編輯]反對
[編輯]港區國安法生效之後，泛民主派嘅評論普遍認爲「一國兩制」正式玩完。經常評論香港憲制議題嘅法律學者張達明話，國安法條文重差過佢想像中最差嘅可能，因為呢條法例有全世界治外法權，所有罪名嘅最高刑罰都可以係終身監禁，解釋權又喺人大常委而唔喺香港嘅法庭，佢諷刺噉警惕「全世界80億人都要熟讀國安法」[12]。
- 泛民主派會議召集人陳淑莊批評，實施港版國安法等於向一國兩制發出死亡證，香港將變成一國一制。佢又話，港版國安法只用大約40天時間，無經任何諮詢立法，無邏輯可言，做法無稽，唔能夠接受[13]。
- 民主黨涂謹申批評，今次立法反映中央政府無誠意遵守自身法律同埋國際條約[13]。
- 民主黨主席胡志偉批評，北京強推法案令香港法律體系「中門大開」，破壞普通法嘅司法獨立，令國際對港失去信心，直指「國安立法，兩制玩完」[13]。
支持
[編輯]民建聯發表聲明，話認同全國人大嘅做法，話佢哋喺度維護緊國家安全同埋香港社會根本嘅利益，同埋堵塞國家安全保障缺口嘅必要手段，又話國安法同23條本質唔同，重覺得政府有必要立23條[14]。
外地反應
[編輯]反對
[編輯]中華民國（台灣）大陸委員會主委陳明通，喺7月1號出席「台港服務交流辦公室」嘅揭牌典禮，接受媒體聯訪時話，港版國安法係「天朝帝國對世界的子民發出的律令」，批評中共要管全世界嘅人。陳明通引呢部法嘅29條第五項內容做例，話啲民眾若透過各種「非法方式」，引發港人對中共中央政府、香港政府嘅憎恨並可能造成嚴重後果，就可能獲刑。陳指出，「換句話說，美國人在美國批評北京政權，讓香港人覺得憎恨北京，就犯了本法的罪」[15]。
美國國務卿蓬佩奧喺7月1號嘅記招度，表示咗美國對香港所有人嘅安全深切關注，並話《港版國安法》第 38 條據稱適用於香港境外所犯嘅罪行，亦可能涵蓋美國人，形容係令人冇法接受，係對所有國家嘅冒犯[16]。7月14號，美國正式落實推行《香港自治法案》，授權美國政府可以制裁任何破壞香港自治嘅人，到8月7號財政部就公佈咗制裁11名損害香港自治嘅中港官員名單，包括香港行政長官林鄭月娥。
英國首相約翰遜同外相藍韜文指，中華人民共和國政府兜過香港立法會訂立國安法，擺明違反《中英聯合聲明》。英國政府同國會提案，如果港版國安法生效，英國就會開新簽證系統，俾所有攞住BNO身份嘅香港人移民英國。7月1號，國安法條例公佈並正式生效嗰日，英國政府宣佈新簽證系統，BNO持有人可以攞五年簽證住喺英國，可以讀書、就業，住滿五年可以攞永久居民權然後入籍[17]。
歐洲議會大比數通過咗冇約束力嘅決議，譴責咗中國大陸就港版國安法搞立法；議案又指中國如果夾硬推個國安法，歐盟就應該入禀海牙國際法庭，控告中國違反《中英聯合聲明》同《公民權利和政治權利國際公約》[18][19]。
七大工業國組織（G7）發表聲明，反對中國頒佈香港國家安全法，認爲呢條法例違反一國兩制，損害香港人權。聲明由英國政府帶頭；日本喺立法過程初期唔想公開表態，但係後來都同其餘六國一齊譴責。七國組織表示，國安法立法之後，會用人權法案制裁參與嘅中國同香港官員[20]。
支持
[編輯]俄羅斯外長謝爾蓋·拉夫羅夫表示，話呢件事係屬於中國內政，佢冇權干涉，重借啲椅批評美國，話美國對中國嘅施壓係前所未見[21]。
塞爾維亞總統武契奇同習近平致函，話全力支持全國人大通過呢條條例[22]。
執法
[編輯]2020年7月1號，立法未夠一日，就由大約十個香港示威者因爲「違反國家安全法」而俾警察拉咗[23]，當中一個疑犯喺7月3號被落案控告參與國安法指嘅「恐怖活動」，係第一單涉及國安法嘅案[24]。
7月2號，香港政府公告，指示「光復香港，時代革命」口號有港獨意味，按照國安法禁止嗌呢句口號[25]。
7月6號，香港政府公佈指引，訂明警察懷疑有人違反國家安全法嘅話，可以自行批准搜查令入人哋屋企搜查、解鎖電子儀器、或者偷聽，亦可以要求作者、網站、同互聯網服務供應商剷走警察認爲違法嘅內容，並且有權要求外地組織提供資訊。而違反警察指令嘅人可以罰款、判監[26]。執行指引實際上廢除普通法原則之下保持緘默嘅權利，甚至廢除一國兩制入面嘅執法、司法權互相監督[27]。
2021年1月6號，香港政府以國安法大量拘捕上年參與泛民主派初選嘅候選人，至今已有五十人被捕[28]。
民間對抗審查
[編輯]香港政府動用國安法權力宣佈「光復香港時代革命」口號犯法之後，香港網上輿論出現咗大量諧音抗議口號變種，當中攞數字嘅聲調對應敏感詞嘅口號特別多。其中，《願榮光歸香港》嘅全數字版， 最後一句用「5201314」做「我願榮光歸香港」諧音特別矚目，因爲雙關「5201314」喺普通話裏面嘅諧音意思[29]。不過亦有批評指，用諧音口號其實係對惡法嘅妥協，而國安法嘅執法尺度亦顯示，差人要亂拉人嘅話示威者嗌咩口號根本唔重要，用諧音避開被禁字眼係自我閹割[30]。
有記者喺7月1號影到一個少女圍觀警方封鎖線嘅時候舉起一張白紙，報導廣泛流傳。白紙象徵測試執法者嘅規矩，究竟係咪乜都冇講都可以犯罪[31]。舉白紙行動引起好多人仿效，7月6號香港就有幾個地方有市民自發喺商場舉白紙示威，抗議香港言論自由消失[32][33]。
又有好多示威者引用毛澤東等等中國共產黨建國元老佢哋反對專制政權嘅言論，以及《義勇軍進行曲》歌詞，擺喺示威標語度，避免「分裂國家」嫌疑同時諷刺當權者無法無天[34]。
因應國安法執行細節公佈，Facebook（包括旗下 WhatsApp）、Telegram、Google 都表示會停止回應香港執法機構問佢哋攞用戶資料嘅要求。而以加密保安做賣點嘅通訊軟件 Signal 就講明，佢哋根本冇貯藏用戶資料，所以冇資料可以提供俾政府。
蘋果日報同壹週刊停刊事件
[編輯]2021年6月，香港警察用《香港國安法》嘅名義，連理據同法庭嘅頒令都無，拉咗壹傳媒幾個高層，又凍結壹傳媒嘅銀行戶口，最後搞到蘋果日報同壹週刊停刊。事件除咗引起好多香港人同國際社會關注香港新聞自由被政府嚴重破壞。
要求區議員宣誓同民主派區議員辭職潮
[編輯]2021年5月，香港政府推出《2021年公職（參選及任職）（雜項修訂）條例》，要求區議員都要宣誓擁護《香港基本法》同效忠中華人民共和國香港特別行政區，配合返《國安法》對香港公職人員嘅宣誓要求。同年6月開始，政府係噉向傳媒放風，話會唔畀一啲民主派區議員宣誓，取消佢哋議員資格，兼且追討薪津，但宣誓前自行辭職嘅就唔追究。7月初，有大量泛民主派區議員因為噉而劈炮[35]。不過政府未有因為噉而手軟，喺開始搞宣誓之後，依然將好多無辭職嘅民主派區議員判定做無效宣誓。
後續
[編輯]中文維基百科中國內地用戶借《國安法》對香港用戶恐嚇
[編輯]自香港逃犯條例爭議起，中文維基百科嘅中港兩地用戶就有唔少衝突，其中一位網名叫Walter Grassroot嘅中國用戶，甚至提議將香港用戶組都向國安署舉報，令維基百科官方當時立即緊急召開會議，並提供指引避免人肉搜尋[36]。
香港各大專院校所受影響
[編輯]除咗有啲大專院校喺課程入面加入《國安法》嘅要求，亦因為點樣為之觸犯國安法嘅定義唔清晰，有一啲大學講師覺得學術自由受到影響，甚至傳出有學生單單因為不滿老師畀分，走去國安熱線舉報老師。有啲老師亦私下表示感到被遺棄「悲傷」或者「失望」都唔足以形容氣氛。另外，香港有啲大學嘅高層亦借國安法名義打壓學生會。
香港公共圖書館下架圖書爭議
[編輯]一啲不同於政府官方觀點嘅圖書等內容被香港公共圖書館，以國安法名義下架，另外亦有唔少書籍只係由有民主派背景人士編寫，但當中唔涉及政治觀點，但都一樣被下架。
濫用《國安法》
[編輯]有啲觀點認為《國安法》出現被濫用嘅情況，其中親中派立法會議員葉劉淑儀喺2023年7月就話，有官員對國安罪行未掌握得好，令市民出現不必要嘅擔心。另一立法會議員江玉歡就質疑係咪要每時每刻都要提及國安法，提醒政府唔好矯枉過正。謝偉俊亦認為，社會有「過左」跡象，下下都以言入罪[37]。
睇埋
[編輯]註
[編輯]參考
[編輯]- ↑ 新浪新闻综合 (2020-05-22)。〈全国人大发布香港维护国家安全的法律制度和执行机制草案7条措施〉。news.sina.com.cn。喺2020-05-22搵到。
- ↑ Xiaoxia, 編 (2020-05-21). "China's national legislature to hold annual session from May 22 to 28" (英文). 新华社英文. 原著喺2020-05-27歸檔. 喺2020-05-22搵到.
- ↑ 〈【港版國安法】王晨說明草案細節：中央可在港設機構履行國安職責〉。香港01。2020-05-22。喺2020-05-22搵到。
- ↑ 〈中國人大將審議香港《國安法》 民主派指北京推「一國一制」〉。BBC中文。2020-05-21。喺2020-05-21搵到。
- ↑ 舒颖編 (2020-05-22)。〈第十三届全国人民代表大会第三次会议日程〉 (中國中文)。全国人大网。喺2020-05-22搵到。
- ↑ 沙半山 (2020-05-21)。〈【01獨家】人大今晚公布「港版國安法」 堵國安漏洞 有別23條〉。香港01。喺2020-05-22搵到。
- ↑ 〈视频丨关于《全国人民代表大会关于建立健全香港特别行政区维护国家安全的法律制度和执行机制的决定（草案）》的说明〉 (簡體中文)。2020-05-22。原著喺2020-05-27歸檔。喺2020-05-22搵到。
- ↑ 〈【不斷更新】中國人大秒速通過「港版國安法」 2878贊成 1票反對 6票棄權〉。《蘋果新聞網》 (臺灣中文)。喺2020-05-28搵到。
- ↑ 〈《中華人民共和國香港特別行政區維護國家安全法》刊憲並即時生效〉。《香港特別行政區政府新聞公報》 (香港中文)。喺2020-06-30搵到。
- ↑ 〈《立場》盤點國安法最少 10 點侵犯人權 張達明：比想像的最壞情況更差 梁家傑：香港無咗架啦 | 立場報道 | 立場新聞〉。《立場新聞 Stand News》 (英文)。喺2020-07-01搵到。
- ↑ 〈林鄭：料極少案件交駐港公署 中央留管轄權為萬無一失〉。《Now 新聞》 (香港中文)。喺2020-07-01搵到。
- ↑ 自由時報電子報 (2020-07-01)。〈指港版國安法充滿中國特色 港大法律學者：沒有最壞，只有更壞 - 國際 - 自由時報電子報〉。《自由電子報》 (中文)。喺2020-07-01搵到。
- ↑ 13.0 13.1 13.2 〈【役情最前線】不懼國安法實施 民主派續7·1遊行 - 大紀元〉。《大紀元 www.epochtimes.com》 (繁體中文)。2020-07-01。喺2022-06-14搵到。
- ↑ 〈民建聯全力支持港版國安法 民主派呼籲沉著應對 - 香港經濟日報 - TOPick - 新聞 - 政治〉。topick.hket.com。喺2020-07-02搵到。
- ↑ 陳明通批港版國安法：「天朝帝國」向世界子民發出的律令 新頭殼newtalk 謝莉慧 台北市報導 2020-07-01
- ↑ 《港區國安法》第 38 條列明適用全人類 蓬佩奧斥冒犯所有國家 互聯網檔案館嘅歸檔，歸檔日期2020年7月2號，. 立場新聞
- ↑ "UK makes citizenship offer to Hong Kong residents". BBC News (英國英文). 2020-07-01. 喺2020-07-01搵到.
- ↑ 作者：熱血編輯部06-20-2020。〈歐洲議會通過決議 籲歐盟就港版國安法訴諸國際法庭〉。www.passiontimes.hk。喺2020-06-23搵到。
- ↑ 張子傑 (2020-06-20)。〈【港版國安法】歐洲議會：中國若一意孤行 歐盟應入稟國際法院〉。《香港01》 (香港中文)。喺2020-06-23搵到。
- ↑ "G7 urges China to reconsider new Hong Kong security laws". the Guardian (英文). 2020-06-17. 喺2020-07-03搵到.
- ↑ 王忠會 (2020-05-26)。〈【港版國安法】俄羅斯外長：香港問題為中國內政 斥美國向華施壓〉。《香港01》 (香港中文)。喺2020-07-01搵到。
- ↑ 〈武契奇致信習近平表示塞爾維亞支持人大通過港區國安法.〉。
{{cite web}}: CS1 maint: url-status (link) - ↑ "Police action supported". Hong Kong's Information Services Department (香港中文). 喺2020-07-03搵到.
- ↑ Presse, AFP-Agence France. "Hong Kong Police Charge First Person Under New Security Law". www.barrons.com (美國英文). 喺2020-07-03搵到.
- ↑ 〈港宣布「光復香港 時代革命」口號違法 適用全球各地所有人〉。《世界新聞網》 (臺灣中文)。2020-07-03。原著喺2020-07-03歸檔。喺2020-07-03搵到。
- ↑ 〈【港版國安法】准警無手令搗民居逼刪訊息 「規管」境外組織及代理人 違者可判囚半年〉。《Apple Daily 蘋果日報》 (香港中文)。原著喺2020-07-07歸檔。喺2020-07-07搵到。
- ↑ 〈【港版國安法】秘密警察擁7大極權 張達明稱違人權：再無「兩制」之別〉。《Apple Daily 蘋果日報》 (香港中文)。原著喺2020-07-07歸檔。喺2020-07-07搵到。
- ↑ 〈立場新聞【不斷更新】戴耀廷鍾庭耀及數十民主派初選參與者據報被捕被指違國安法「顛覆國家政權罪」〉。《Stand News 立場新聞》 (香港中文)。喺2021-01-06搵到。
{{cite web}}: CS1 maint: url-status (link) - ↑ 〈國安惡法逼出港人創意 《願榮光》變數字歌 - 大紀元〉。《大紀元 www.epochtimes.com》 (臺灣中文)。2020-07-04。喺2020-07-07搵到。
- ↑ 〈國安法下 用創意避險是抗爭還是妥協？ | Maralio | 立場新聞〉。《立場新聞 Stand News》 (英文)。原先內容歸檔喺2020-07-07。喺2020-07-07搵到。
{{cite web}}: Cite has empty unknown parameter:|6=(help) - ↑ 〈【7.1 採訪手記】舉白紙的少女 | 丁喬 | 立場新聞〉。《立場新聞 Stand News》 (英文)。原先內容歸檔喺2020-07-06。喺2020-07-07搵到。
- ↑ 〈デモ標語禁止に白紙で抵抗〉。《gooニュース》 (日文)。原著喺2020-07-07歸檔。喺2020-07-07搵到。
- ↑ "Hongkongers raise blank protests sign, hide slogans in art after Chinese security law implemented". National Post (加拿大英文). 喺2020-07-07搵到.
- ↑ INC, SANKEI DIGITAL (2020-07-07)。〈変わる香港のデモ風景 白紙、国歌で抗議〉。《産経ニュース》 (日文)。喺2020-07-07搵到。
- ↑ 〈傳追討 DQ 區議員薪津 至少 100 區議員請辭〉。原著喺2021年8月15號歸檔。喺2021年7月9號搵到。
- ↑ 〈【資訊戰】中文維基百科成中港戰場 中國編輯稱向國安舉報香港編輯〉。Radio Free Asia (英文)。喺2021-07-13搵到。
- ↑ 文睿馮子健 (2023-07-13)。〈國安法被「泛化利用」論有共鳴 葉劉籲政府勿矯枉過正〉。《香港01》 (香港中文)。喺2023-07-30搵到。