英國國民（海外）護照
英國國民（海外）護照（British National (Overseas) Passport，簡稱BN(O)），係英國喺香港主權移交畀中華人民共和國之前，簽發畀香港居民嘅護照。香港嘅BN(O)登記程序喺1997年主權移交之後終止，唔再接受新申請，因此而家只限主權移交之前申領過嘅香港人續期。
歷史
[編輯]1984年，中國同英國簽咗中英聯合聲明。之後冇幾耐，英國喺1985年定咗條香港法案（Hong Kong Act），規定香港居民喺1997年7月1號之後，唔可以繼續享有英國屬土公民嘅地位，冇英國居留權，亦都唔可以繼續用英國屬土公民護照。但係，為咗畀香港市民響主權移交後都可以方便噉旅遊同與英國保持某種關係，英國就同香港居民簽發英國國民（海外）護照。呢本護照喺1997年之後都繼續有效。
合資格嘅香港居民，要喺1987年7月到1997年6月30號期間，去申請BN(O)護照。1997年7月1號之後，只有嗰啲原本攞咗呢本護照嘅人，先至可以換領新護照。呢批人大部分亦都可以拎埋香港特別行政區護照，只有少數人，大部分係印巴血統，少數部分係東南亞出世嘅華裔人士，由於佢哋無中國國籍，唔拎得香港特別行政區護照。
由於申請BN(O)護照一定要有有香港英國屬土公民嘅地位，1996年申請歸化英籍最後期限，有成數以萬計香港人湧到灣仔告士打道嘅人民入境事務處總部排隊辦手續，人龍由日至夜延綿不絕，龍尾排到灣仔運動場，更有人發生爭執，成為當時大新聞。
2020年7月1號，英國政府認定中華人民共和國政府實施《香港國家安全法》嚴重違反《中英聯合聲明》同中方已經明顯違背喺《中英聯合聲明》條文中，保障香港自由、自治同維持司法獨立嘅承諾[1]。因此宣布由2021年1月起[1]，符合申請英國國民（海外）護照（BNO）嘅香港人同佢嘅家屬，將可以無限制喺英國居住、讀書或工作，留英5年之後可以申請無限期居留，再居住12個月後可以登記成為英國公民[2][3]。
2021年1月31號起，中華人民共和國政府同埋香港特別行政區政府唔再承認英國國民（海外）護照為有效旅行證件同身份證明，唔能夠喺中國大陸、香港、澳門三地用於出入境[4][5]。
申請
[編輯]2013年3月1號開始只接受郵遞申請，要喺網上填申請表同用信用咭畀錢，然後將以下文件寄去英國護照署[6]。地址係：Her Majesty’s Passport Office(ONL–OVS), PO Box2001, Liverpool, L693FA, United Kingdom
- 需要喺網上提交：
- 相片檔案，口要合埋，唔可以有笑容
- 個人詳細資料：
- 全名、出生日期同聯絡方式
- 英國國民（海外）護照號碼
- 用 Visa 或 MasterCard 畀錢
- 需要郵寄嘅文件：
- 原有嘅英國國民（海外）護照正本（除非已經唔見咗或俾人偷咗）；
- 香港永久性居民身份證嘅雙面彩色影印本；
- 任何重未過期嘅其他國家嘅護照本，例如香港特區護照，無論有冇扱過印，都要由第一頁開始影印到最後一頁；
- 一份日期喺一年之內嘅文件正本，以證明姓名、地址同居留權，可以用以下文件：
- 僱主寄畀你嘅信
- 醫療卡
- 當地議會或政府部門寄畀你嘅信
- 選民卡
- 簽證或居留許可（彩色影印本亦可以）
- 教育記錄，例如學校報告
- 移民文件
如果英方通知有文件唔齊，一定要喺6個禮拜之內補交，唔係嘅話申請就會被撤銷，亦唔會安排退錢。
一般申請人可以豁免填副署人嗰一欄，不過如果7年以上無續期、嗰樣有好大變化、BN(O)護照唔見咗或者損毀、個人資料有重大改變等，申請人就要有副署人簽名。副署人一定要識咗申請人兩年或以上、持有英國或歐盟護照（BN(O)護照都得），或者係認可嘅專業人士，例如法官、議員、太平紳士、律師、醫生、會計師或有專業資格嘅老師等。副署人要喺申請人嘅聲明書填寫有關部分，屋企人唔可以互相做副署人。
需時同費用
[編輯]英國政府收到申請之後大概需要6個禮拜處理，如果官方要求申請人補充資料，或者張相唔啱，可能需要更長時間處理申請，費用[7]如下：
| 申請費 | 運費 | 總計 | |
| 34頁護照 | 86英鎊 | 19.86英鎊 | 102.86英鎊 |
| 50頁護照 | 96英鎊 | 19.86英鎊 | 110.86英鎊 |
更新
[編輯]呢種英國國籍身份係終身有效，就算本護照過咗期，只要響1997年前已經開始持有呢款護照，個身份都會一路跟身。
繼承
[編輯]英國國民（海外）身份唔可以畀落下一代。唯一例外係2004年2月3號之後出世嘅印度血統人士仔女，如果佢父母只係持有英國國民（海外）身份，無中國國籍，又無喺限定時間內拎到印度國籍，咁呢啲人可以由父母度繼承英國國籍，並登記成英國公民。
唔使簽證國家同地區
[編輯]2010年3月26日來講，有超過110個國家或地區免咗BN(O)護照持有人簽證。包括阿爾巴尼亞、安圭拉、安提瓜和巴布達、阿根廷、阿魯巴、奧地利、巴哈馬、巴林、孟加拉、巴巴多斯、比利時、伯利茲、百慕達、博茨瓦納、巴西、英屬印度洋領地、英屬維爾京群島、加拿大、開曼群島、智利、哥倫比亞、曲克群島、哥斯達黎加、克羅地亞、庫拉索、捷克共和國、丹麥、多米尼加（聯邦）、東帝汶、厄瓜多爾、福克蘭群島、法羅群島、斐濟、芬蘭、法國、岡比亞、德國、直布羅陀、希臘、格陵蘭、格林納達、關島、海地、洪都拉斯、匈牙利、冰島、印尼、愛爾蘭共和國、以色列、意大利、牙買加、日本、約旦、基里巴斯、南韓、科威特、萊索托、列支敦士登、盧森堡、馬拉維、馬來西亞、馬爾代夫、毛里求斯、墨西哥、密克羅尼西亞聯邦、黑山、蒙特塞拉特、納米比亞、荷蘭、新西蘭、尼加拉瓜、紐埃、北馬里亞納群島、挪威、巴布亞新幾內亞、巴拉圭、秘魯、菲律賓、皮特凱恩群島、波蘭、葡萄牙、薩摩亞、聖馬力諾、塞爾維亞共和國、塞舌爾、新加坡、所羅門群島、南非、西班牙、斯里蘭卡、聖赫勒拿、聖克里斯多福與尼維斯、聖盧西亞、聖文森特和格林納丁斯、荷屬聖馬丁、斯威士蘭、瑞典、瑞士、台灣、泰國、湯加、特立尼達和多巴哥、突尼斯、特克斯與凱科斯群島、圖瓦盧、英國、烏拉圭、瓦努阿圖、梵蒂岡、委內瑞拉、西薩摩亞、贊比亞及津巴布韋。
睇埋
[編輯]出面網頁
[編輯]參考
[編輯]- ↑ 1.0 1.1 〈香港國安法：英國宣佈明年一月無條件開放香港BNO入境 可攜直系親屬〉。BBC。2020-07-22。原先內容歸檔喺2020-12-09。喺2020-07-25搵到。
- ↑ 〈BNO留英增至5年 居6年可申入籍 無配額 可工作入學 數月內實施〉。《明報》。2020-07-02。原先內容歸檔喺2020-12-16。喺2020-07-12搵到。
- ↑ 〈英公布BNO移民計劃詳情 明年1月31日起接受申請 不設限額〉。《眾新聞》。2020-10-22。原著喺2021-07-02歸檔。喺2021-01-31搵到。
- ↑ 沈朋達、繆宗翰編 (2021-01-29)。〈中國指英國干涉內政 31日起不再承認BNO 影響290萬持有港人〉 (繁體中文)。台北：中央通訊社。喺2021-01-31搵到。
- ↑ 〈特區政府全面配合國家針對英國政府就處理英國國民（海外）護照事宜採取反制措施〉。《香港政府一站通》 (香港中文、繁體中文)。2021-01-21。原先內容歸檔喺2021-01-29。喺2021-01-21搵到。
- ↑ "Overseas British passport applications". GOV .UK. 23 January 2014. 喺23 January 2014搵到.
- ↑ "Reduction in passport fees for UK citizens overseas". GOV.UK. 13 March 2014. 喺17 March 2014搵到.