窗邊咆哮

窗邊咆哮，又叫十點鳩嗌、十點鳩叫，係香港反逃犯條例修訂運動入面由網民自發嘅一個長期抗爭活動，由2019年8月中開始，每晚搭正十點鐘，就對住窗出面大嗌抗議口號，互相呼應，再喺十點搭三、搭半同搭九重覆再嗌。呢個活動概念係參考1970年代開始喺瑞典出現嘅弗洛格斯塔咆哮（Elvavrålet）。9月頭，有網民用「開咗學，學生要早啲睏覺」做理由，希望提早一個鐘喺九點嗌，但未得到廣泛認同。