煞停警黑亂港落實五大訴求集會

「疏散」緊嘅集會人士

煞停警黑亂港落實五大訴求集會，係民間人權陣線响2019年8月18號搞嘅反對逃犯條例修訂草案公眾集會。佢本嚟係民陣第七次嘅反修例遊行，由銅鑼灣維多利亞公園行去中環遮打花園，但警方發咗「反對通知書」，只係批准集會。

集會嗰日，民陣話搞「流水式集會」，疏導集會民眾向中環方向離場，等其他民眾可以入到會場。呢個安排令參與集會嘅人變相遊行，由自己決定終點，有啲人行去原定遊行終點中環遮打花園，亦有人以灣仔、金鐘、上環甚至西營盤做終點，無固定路線。另外亦有唔少市民由灣仔、炮台山同北角出發行去維園參加集會。

呢次集會主辦單位宣稱有170萬人喺炮台山到銅鑼灣參加（未包括無入到呢個範圍嘅人），而警方就話集會地點範圍（維園）參加集會嘅最高峰人數有12.8萬人。

入夜後，有啲集會人士留守金鐘夏愨道唔走，要到凌晨先至和平散去。不過集會全日都完全無出現過警民衝突，係近兩個月以嚟第一次見唔到警方有動用武力嘅禮拜日。

後續

喺呢次集會期間，黎智英、李柱銘、梁國雄、李卓人、區諾軒、何俊仁、吳靄儀、何秀蘭、梁耀忠因為有份組織同埋參與未經批准嘅集結，而喺2020年4月18號畀差人拉咗。

2021年4月16號，梁耀忠被判坐花廳8個月，緩刑1年，而佢嘅區議員席位就响同年2月27號開始懸空。