和你Lunch

出自維基百科,自由嘅百科全書
跳去導覽 跳去搵嘢
2019年11月12號破曉行動期間嘅「中環和你Lunch」

和你Lunch,係香港反逃犯條例修訂運動入面一系列示威活動,每逢返工日子食晏時間號召打工仔集結,當中以中環嘅活動歷史最悠久。

呢類活動主要喺2019年11月到2020年1月比較活躍,之後隨住香港爆發武漢肺炎疫情,呢類活動就越嚟越少人參加,踏入夏季之後,基本上得返一位每次都著住藍色風褸嘅17歲姓李嘅中學生David(李國永[1])堅持出席,所以畀人叫做「Lunch哥」[2]

中環嘅「和你Lunch」[編輯]

2019年10月4號嘅「中環快閃遊行」
2019年11月26號喺國際金融中心商場中庭搞嘅「中環和你Lunch」

中環嘅「和你Lunch」歷史可以追溯到2019年10月2號中午嘅「中環快閃遊行」,示威者由中環遮打花園出發行到上環再掉頭行去金鐘政府總部,抗議警員喺前一日示威入面槍傷示威者,有超過一千人參加[3]。到10月4號中午,示威者再次號召發起「中環快閃遊行」,由中環遮打花園域多利皇后街國際金融中心,抗議政府準備制定《禁止蒙面規例》,亦有超過一千人參加[4]。之後連續幾個禮拜五中午,都有「中環快閃遊行」,路線大致都係由遮打花園出發到域多利皇后街路口折返起點,約莫都有一千人參加。

同年11月11號,反送中運動嘅黎明行動開始,嗰日中午有大批示威者喺畢打街路口附近集結,防暴警員曾經射過催淚彈[5]。12號開始,活動正式定名叫「和你Lunch」,中環連續幾日都有示威者喺畢打街路口附近集結,變成逢禮拜一到五都會搞嘅常規示威活動,之後活動地點亦擴展到中環唔同地方,包括交易廣場外、國際金融中心商場中庭等等,不過就暫時未有再用遊行嘅方式搞。

其他地方嘅「和你Lunch」[編輯]

其他地方嘅「和你Lunch」歷史可以追溯到10月18號,嗰時葵芳觀塘尖沙嘴荔枝角四笪地方嘅打工仔參考「中環快閃遊行」去搞自己嘅快閃遊行,每度都有一百到幾百人參加[6]

隨住黎明行動開始中環每日搞「和你Lunch」,其他地方亦相應仿效搞自己嘅「和你Lunch」,地點包括黃竹坑太古坊九龍灣觀塘長沙灣葵涌等等[7][8],活動頻率就無統一,有啲唔定期搞,有啲一個禮拜搞一次,有啲就日日搞。

參考[編輯]

  1. "疑似露械照網上流傳 Lunch哥認衰稱你情我願". 東方日報 ‎. 2020-10-03. 喺2020-10-09搵到.
  2. "政總和你Lunch 僅兩名學生參與 稱限聚令下少人出現屬正常". 香港獨立媒體. 2020-08-14.
  3. 【逃犯條例】中環西裝友中午快閃遊行 隊伍抵政總添馬公園
  4. 過千市民參與中環快閃遊行
  5. 中環快閃堵路 防暴警射多枚催淚彈
  6. 修例風波:網民發起快閃遊行 中環千人上街佔車道
  7. 【修例風暴】佔路「和你Lunch」,中環銅鑼灣黃竹坑多人聚集
  8. 【修例風波】多區續發起「和你Lunch」 防暴警長沙灣舉藍旗中環拘1男