陳彥霖案
陳彥霖命案係指2019年香港學生陳彥霖疑似遭到香港黑警強姦同謀殺嘅命案，陳彥霖被警方斷定係自殺，但市民及專家普遍都認為疑點重重，要求警方重新調查。2020年8月，死因裁判法庭為呢單案展開研訊，最後陪審團一致裁定陳彥霖「死因存疑」，皆因屍體一早火化咗，只可以攞啲文件紀錄嚟研究。由於案件疑點重重，再加上警方喺呢單案嘅處事手法極為可疑，令人質疑陳彥霖實際上係因為參與反送中運動而遭到香港黑警強姦同謀殺。
死者簡介
[編輯]死者陳彥霖（Christy Chan，2004年7月16號—2019年9月19號）遇害嗰陣15歲，讀緊職業訓練局青年學院將軍澳分校（校舍喺香港知專設計學院），亦係位游水健將。佢亦積極參與反送中運動嘅示威。
案情
[編輯]陳彥霖最後露面係9月19號下晝，佢喺美孚見完朋友後，傳短訊話返緊屋企，之後就失咗蹤。屋企人喺9月21號向警方報失蹤。
9月22號，警方聲稱喺魔鬼山對出海面撈到一具全裸女浮屍，嗰時未知身份，列做「屍體發現」案。9月24號完成驗屍，報告聲稱屍體無傷痕同性侵嘅跡像。9月26號，警方聲稱內部已經確認咗死者身份係陳彥霖，初頭用「懷疑謀殺」方向查，申請咗法庭手令向知專設計學院攞閉路電視片。經過調查後，警方聲稱搵唔到謀殺嘅證據，繼續列做「屍體發現」案。
10月5號，警方回覆《蘋果日報》查詢，公開聲稱相信浮屍就係失咗蹤嘅陳彥霖。
10月11號，《蘋果日報》頭版報道陳彥霖死訊，嗰日警方開記者會，聲稱陳彥霖係「自殺」，案件「無可疑」。又聲稱知專設計學院閉路電視影到佢返過學校，之後自己一個行去海皮方向。
知專設計學院閉路電視片段
[編輯]10月14號上晝，大批學生同市民喺知專設計學院搞悼念活動，又要求校方公開閉路電視片段。同日下晝，校方當眾公開極少部份官方宣布「自殺」前嘅閉路電視片段，不但止顯示唔到佢有自殺先兆或者之後去向，重當場俾人捉到，影片時間標示唔正常噉樣倒退咗下，被懷疑係人手改動影片，兼且失手露餡嘅證據。到10月15號，校方公開「宣稱係」完整嘅閉路電視片段，然而有唔少人指出，片中人嘅身高同樣貌，都同一早公開流傳嘅大有分別，認為可能係由演員冒充，後來拍攝嘅。
「阿媽」現身傳媒話聲稱陳彥霖係「自殺」
[編輯]10月17號挨晚，無綫電視播出聲稱係陳彥霖阿媽嘅何女士接受獨家訪問嘅片段，話佢肯定陳彥霖係自殺，因為陳彥霖生前有思覺失調。佢希望大家唔好再亂估，畀陳彥霖安息。
家人失嗮蹤
[編輯]10月18號，社運人士吳子明喺普羅政治學苑my radio網上政論節目天地友政氣做嘉賓，話陳彥霖失蹤之後冇幾耐，就受佢親戚所托，開始動用人脈，四處刮人，一路保持聯絡，不過自從政府宣布早排撈起嘅浮屍係陳彥霖，吳就忽然之問冇法子再揾到陳嘅任何親人。擔心之下，將任務由摷陳彥霖一個，變成要揾佢全家，之後扲埋荷包請埋職業尋人嘅一齊做嘢，都係冇收穫[1][2][3]。
案件疑點
[編輯]普遍市民同專家都認為呢單案有好多疑點[4][5][6]，譬如：
- 香港嘅屍體焚化爐用量好高，人死咗之後，一般要排隊等好耐，先始有得火化，「所謂」陳彥霖條屍，好快就化咗灰，講唔通，更何況啲大受爭議嘅屍體，一般會留得特別耐，以備再次驗證
- 屍體全身赤裸，如果除曬衫褲先至走去自殺並唔尋常，馬宣立亦指，海水唔足以令有着衫嘅人變全裸
- 驗屍報告顯示法醫「做漏嘢」，缺咗用以判斷同類屍體係唔係浸死嘅關鍵環節
- 死者係游水健將，如果浸死或者跳海自殺都唔尋常
- 網上流傳懷疑死者生前自拍片段，表現開朗，見唔到有自殺傾向
睇埋
[編輯]- 郭振江：另一名被部分人視為反送中運動期間被香港警察殺害嘅示威者
- 香港反送中示威者被自殺或失蹤爭議
參考
[編輯]- ↑ myradio (2019-10-18)。〈天地友政氣 191018 ep72 p1 of 3 陳彥霖案驚人內幕〉。MyRadio.hk (美國英文)。喺2021-06-02搵到。
- ↑ myradio (2019-10-18)。〈天地友政氣 191018 ep72 p2 of 3 真假陳彥霖母親？〉。MyRadio.hk (美國英文)。喺2021-06-02搵到。
- ↑ myradio (2019-10-18)。〈天地友政氣 191018 ep72 p3 of 3 那具浮屍是誰？〉。MyRadio.hk (美國英文)。喺2021-06-02搵到。
- ↑ 〈浮屍少女死因八大疑點！尚有一未公開CCTV片成關鍵 ｜ 蘋果新聞網 ｜ 蘋果日報〉。《蘋果新聞網》 (臺灣中文)。喺2021-06-02搵到。
- ↑ 〈眾新聞 | 任法醫30年馬宣立：姦殺案以外甚少遺體一絲不掛 必須在死因庭解開疑團〉。《眾新聞》 (中文)。原著喺2020-02-03歸檔。喺2021-06-02搵到。
- ↑ 〈【陳彥霖死因研訊】資深法醫不同意溺斃結論 指驗屍無檢測體內有否藻類 ｜ 蘋果日報〉。《Apple Daily 蘋果日報》 (香港中文)。原著喺2021-06-02歸檔。喺2021-06-02搵到。