反送中包圍立法會

  呢篇文講2019年6月12號包圍立法會嘅行動。想搵同年7月1號嘅圍攻同佔領立法會行動嘅話，請睇佔領立法會。

反送中包圍立法會參加者

「反送中包圍立法會」（又叫反逃犯條例修訂包圍立法會‎，參與者用嘅行動代號：野餐），係2019年6月11號深夜開始由香港市民自發嘅集會，主題係抗議香港立法會進行逃犯條例修訂草案（部份人、泛民主派叫做「送中條例」）嘅二讀。

「反送中包圍立法會」係成場運動嘅重要點，市民佔領金鐘立法會同政府總部附近道路，意圖阻擋二讀，衝突中至少有81人受傷。

集會範圍初頭只係喺立法會綜合大樓隔籬嘅添馬公園，到6月12號朝早8點開始，有示威者先後衝出龍和道、夏慤道同金鐘道，癱瘓金鐘嘅交通，演化成「反送中佔領行動」（又叫反逃犯條例修訂佔領行動‎‎）。

大概下晝3點，示威者衝擊立法會示威區，向警方掟磚頭等等唔同嘅雜物，警方舉咗紅旗警告，先噴胡椒噴霧同用警棍打衝擊嘅示威者，再發射橡膠子彈同布袋彈還拖。最終示威者都係突破咗立法會示威區出面警方防線，諗住衝入埋立法會。

下晝4點左右，警方喺立法會示威區下冇舉旗警告，射咗幾粒催淚彈，現場有陣濃烈催淚彈嘅氣味，搞到唔少市民揜住隻眼唔舒服，有啲人喺現場係咁大叫要鹽水、雨遮等物資。

下晝4點半，防暴警察喺龍和道及添華道交界舉黑旗，同埋射催淚彈。就算示威者已經走夾唔唞，警察追住部分示威者嚟打。防暴警察除咗對住示威者舉槍，甚至指向身穿反光衣嘅記者。之後龍和道清咗場，示威者徹退到大會堂附近。

去到差唔多十二點，警總附近嘅示威者陸續散水，現場淨番100人左右。

6月15號林鄭月娥喺政府總部宣佈暫緩逃犯條例修訂，並收返二讀嘅預告。

6月11號深夜警方開始行動

雖然六月九號有成百萬市民上街迫政府撤銷《逃犯條例》修訂，但政府堅持喺12號《逃犯條例》修訂草案恢復二讀，同預咗草案喺20號通過。咁嘅舉動令有啲團體發起6月12日罷課罷工罷市，同埋包圍立法會嘅行動。

6月11號深夜，警方開始加強立法會外保安，大批警員進駐喺港鐵金鐘站，係咁截查市民身份證同搜袋。有報道講年輕人只係經過海富中心對出，隨即俾警員搜同埋身不禮貌對待，更加有「一字排開兼錄影」。期間警員同市民推撞，現場非常混亂，有市民對住警員大嗌「收隊」。

中信大廈外嘅集會俾警方腰斬

其中喺中信大廈附近民陣申請咗集會不反對通知書並獲批，但警方向人羣中央射咗起碼4顆催淚彈，中信大廈淨係開一道旋轉門同一道細門，差啲造成人踩人。

監警會報告回應「暢通無阻，可讓他們離開現場」，但係傳真社有證據證明監警會講大話，有圖片證明咗左右包抄同得中信大廈正門可以入嘅情況下，人群荒失失走佬入中信大廈。

到6月13號午夜，佔領道路嘅示威者陸續和平散去，經過當局通宵清理，被佔領道路喺同日朝早開返，但立法會周圍嘅路就繼續封。佔領完結後，有小量示威者繼續留守添馬公園嗰頭，暫未有發生大型衝突。

呢次行動令立法會原定嘅會議開唔成，政府總部啲人返唔到工。

香港各界反應

政府

6月12號，盧偉聰譴責「暴徒」嘅行為，同埋強調警方有嚴格指引同訓練，裝備亦係外國鎮暴場面成日用。「橡膠彈同布袋彈聽起上嚟好似係子彈，其實係低殺傷力武器」，用嚟制止遠距離掟磚嘅暴徒。佢指出，警方已多次舉咗「黑旗」警告，同用咗口頭警告。但佢都覺得情況勁危急下，就唔可能即刻警告。

6月13號，政務司司長張建宗喺電視台訪問中講，將金鐘衝突定性「暴動」同埋嗰日開槍射橡膠子彈，警方有按守則及現場情況決定嘅最低武力。

前政治官員

7名前政治任命官員表示「逃犯條例修訂」有唔少理性同務實嘅建議冇足夠討論同回應，少有引起大量市民出嚟遊行；另外佢哋懇請林鄭月娥「為咗創造空間畀各人理性交流同討論」，同考慮即刻撤回方案，諗清楚「逃犯條例修訂」嘅影響；聽下法律專業嘅意見，同公眾講清楚件事，補救今次事件嘅破壞，唔好失去咗中央信任及同廣大香港市民支持。

睇埋

• 反逃犯條例修訂運動