香港滙豐喺反逃犯條例修訂運動同國安法爭議嘅角色
喺反逃犯條例修訂運動同國安法爭拗入面，香港上海滙豐銀行一啲決定配合咗政府嘅決定，包括凍結或者取消泛民主派抗爭者／抗爭組織嘅嘅銀行戶口，施壓要求解僱一啲反送中嘅外判員工[1]，刊登廣告批評反送中示威者暴力[2]同埋支持國安法等，因而受到一啲泛民主派、西方世界嘅非議。
公開表態支持政府
[編輯]滙豐喺2019年8月曾經發聲明批評示威者嘅暴力[2]，另外又喺2020年6月公開支持國安法[3]，支持國安法仲要由亞太區行政總裁王冬勝親自簽名[4]，兩次都被唔少人批評。
畀滙豐凍結、取消戶口甚至係侵吞資產嘅人或者組織
[編輯]星火同盟
[編輯]反送中團體星火同盟喺滙豐開設眾籌帳戶以幫助抗議者支付法律費用，不過喺警方逮捕咗4名同星火同盟有關嘅成員後，星火同盟喺滙豐有8000萬港幣嘅帳戶就喺2019年11月21號畀滙豐凍結，引發好多人嘅不滿，認為喺19世紀中開始就深耕香港嘅滙豐已經背叛咗香港人。[5][6]
許智峯
[編輯]北京繞過香港立法會喺香港實施國安法，引起一啲泛民主派異見人士被逼流亡。其中喺2020年12月宣佈流亡嘅前民主黨立法會議員許智峯同埋佢嘅屋企人，喺香港滙豐銀行等3間銀行、5個帳戶嘅資產遭到凍結，涉及幾百萬港幣。佢喺接受媒體訪問嘅時候，就批評香港政府進行政治逼害。喺媒體嘅壓力之下，許智峯嘅戶口獲部分解凍，之後佢已經同屋企人將啲儲蓄轉咗去其他安全嘅地方。[7][8]
去到2021年1月2號，許智峯喺社交媒體透露，話自己同家人所有嘅滙豐信用卡已經被銀行單方面取消，銀行淨係話因為「商業決定」而取消佢哋嘅戶口。許智峯話，佢哋信用卡入面無欠款，反而有幾萬港元結餘，但係銀行仲要話未必可以退返俾佢。許智峯批評，呢個係政治決定，協助政權打壓反對聲音，做法無法律基礎，自己不嬲信貸記錄良好，卡內結餘係佢同屋企人嘅私有財產，受《基本法》保障，滙豐非法侵吞佢嘅財產，事件反映咗一間老牌銀行可以變得幾醜陋墮落，要求滙豐公開交代事件，又要求監管機構調查事件[9]。
施壓要求解僱外判員工
[編輯]有滙豐客戶服務團隊嘅外判員工，喺參與2019年9月3號全民大罷工嘅反送中示威活動，呼籲要組織工會之後被解僱。滙豐嘅理由係唔接受員喺在外間參與政治活動嘅時候透露公司名，但被解僱嘅員工反駁，組織工會必然需要公開公司嘅名，呢個限制剝奪員工組織工會嘅權利，違反香港法律之下保障工人有組織工會嘅自由、言論自由同新聞自由。佢又話，本來公司無對佢施壓，但係中國平安銀行大筆入股滙豐，成為最大股東之後，滙豐就開始經歷內部大清洗，出現白色恐怖。[1][10]
引發反應
[編輯]不論喺香港定係外國，滙豐嘅做法都引起一啲人，包括學者，國會議員同埋自己公司嘅主要投資者嘅不滿，除咗香港嘅滙豐分行，就連一啲外國嘅滙豐分行都成為咗示威者嘅目標。滙豐回應香港傳媒嘅時候，好多時候都以佢哋要「合法合規」做理由，但呢啲解釋好多香港人都唔接受。
香港
[編輯]- 喺2020年元旦大遊行期間，有啲示威者針對滙豐銀行，破壞遊行沿路至少四間分行。[11][12]
- 喺2020年12月許智峯嘅戶口被凍結之後，有唔少批評話事件嚴重影響香港作為金融中心嘅聲譽，亦有網民話滙豐決定恐怖，無法律可言，要取消滙豐嘅戶口。[7]
美國
[編輯]- 滙豐同渣打銀行分別發聲明支持國安法之後，美國參議員斯科特（Rick Scott）喺Twitter發文，批評滙豐選擇利潤，配合中共政權，放棄自由，犧牲香港人人權，係危險同值得羞恥嘅行為。[13]
- 著名金融界人士巴斯（Kyle Bass），喺許智峯嘅戶口被凍結之後，痛批滙豐銀行聽命於中共，呼籲美國應該對滙豐銀行啟動全面制裁，將滙豐銀行踢出美國銀行體系。佢又提及，傳言有一份秘密報告證明，滙豐嚴重違反咗自己美國司法部嘅和解協議。[14]
- 美國國務卿龐比奧（Mike Pompeo）喺6月9號發表聲明，譴責滙豐銀行支持中國強推港版國安法的行動，指美方同盟友會企埋一齊，反對中共脅迫性嘅霸凌策略，又話對北京「卑躬屈膝」嘅行為唔會得到好處。[15]
英國
[編輯]- 滙豐同渣打銀行分別發聲明支持國安法之後，保守黨，工黨同自由民主黨都有聲音回應同批評。
- 保守黨國會議員圖根達特（Tom Tugendhat）抨擊滙豐同渣打選擇支持專制政府壓制自由同損害法治，質疑唔符合企業社會責任。[13]
- 保守黨國會議員奧布萊恩（Neil O'Brien）呼籲滙豐客戶關閉銀行戶口抗議。[13]
- 保守黨議員卡恩斯（Alicia Kearns）要求傳召滙豐同渣打到國會向議員同埋全國解釋，話佢哋兩間銀行支持違反國際法。[13]
- 自由民主黨議員兼國會香港議題小組主席卡邁克爾（Alistair Carmichael）就去信滙豐，表明亞太區行政總裁王冬勝簽署聯署支持國安法，引起下議院嘅注意。[13]
- 工黨國會議員南迪（Lisa Nandy）同陶茲（Anneliese Dodds）都有致函滙豐同渣打，表達疑慮。[16]
- 英國外相藍韜文批評滙豐等銀行為咗私利支持國安法，香港人嘅人權利益，以至英國對香港人嘅責任，唔應該因為銀行家嘅獎金而被犧牲。[17]
- 滙豐銀行同渣打銀行嘅主要股東之一英傑華集團（AVIVA）發表聲明，批評兩間銀行喺唔知道詳情嘅情況下表態支持國安法，指責表態「令人不安」。[18]
- 倫敦政經學院（LSE）客座研究員克希梅爾（Tom Kirchmaier）就話，就算滙豐同渣打要保護自己嘅生意，呢種表態亦唔妥當。[15]
其他國家
[編輯]喺法國，喺2019年11月16號，黃背心運動以行動聲援香港反送中運動，有示威者破壞滙豐銀行巴黎分行，仲喺牆上留下好多支持者香港嘅口號。[19]
參考
[編輯]- ↑ 1.0 1.1 〈匯豐反送中員工被開除 港人集會對抗白色恐怖〉。《新唐人亞太電視台》。喺2021-01-02搵到。
- ↑ 2.0 2.1 〈英資匯豐銀行登廣告 強烈譴責反送中暴力 | 兩岸 | 中央社 CNA〉。www.cna.com.tw (中文)。喺2021-01-02搵到。
- ↑ 梁凱怡 (2020-06-05)。〈【港版國安法】滙豐渣打支持立法 惹英國政界抨擊〉。《香港01》 (香港中文)。喺2021-01-02搵到。
- ↑ 自由時報電子報 (2020-06-03)。〈與英國不同調！匯豐聲明挺港版國安法 總裁親簽連署 - 國際〉。《自由時報電子報》 (中文)。喺2021-01-02搵到。
- ↑ 自由時報電子報 (2020-01-06)。〈封殺反送中帳戶？ 匯豐香港惹眾怒 - 自由財經〉。《自由時報電子報》。喺2021-01-02搵到。
- ↑ 〈反送中眾籌平台被關 匯豐：無關香港情勢 | 中央社〉。《新頭殼 Newtalk》 (中文)。2019-12-20。喺2021-01-02搵到。
- ↑ 7.0 7.1 〈許智峯流亡銀行帳戶株連九族？ 港人驚急解約匯豐 | 中國〉。《新頭殼 Newtalk》 (中文)。2020-12-07。喺2021-01-02搵到。
- ↑ 〈香港前議員許智峯流亡英國 香港銀行帳戶遭凍結〉。《Rti 中央廣播電臺》 (中文)。喺2021-01-02搵到。
- ↑ 〈許智峯：與家人被滙豐取消信用卡 數萬元結餘或未能取回 斥滙豐政治考慮侵吞財產 | 立場報道 | 立場新聞〉。《立場新聞 Stand News》 (英文)。原著喺2021-01-03歸檔。喺2021-01-03搵到。
- ↑ 〈香港：反對滙豐打壓工會 要求撤回解雇決定 | 社會主義行動〉。《香港獨立媒體網》。喺2021-01-02搵到。
- ↑ 聯合新聞網 (20200102T125622Z)。〈香港匯豐遭打砸 4分行遭殃 | 聯合新聞網：最懂你的新聞網站〉。《聯合新聞網》 (中文)。喺2021-01-02搵到。
{{cite web}}: Check date values in:|date=(help) - ↑ 〈滙豐捲入反送中風暴、還遭中美英圍剿，這間 155 年老店這次能平安下莊嗎？〉。《TechNews 科技新報》 (臺灣中文)。喺2021-01-02搵到。
- ↑ 13.0 13.1 13.2 13.3 13.4 梁凱怡 (2020-06-05)。〈【港版國安法】滙豐渣打支持立法 惹英國政界抨擊〉。《香港01》 (香港中文)。喺2021-01-02搵到。
- ↑ 自由時報電子報 (2020-12-07)。〈匯豐凍結許智峯帳戶 美金融大亨氣炸：應踢出美銀行體系 - 自由財經〉。《自由時報電子報》。喺2021-01-02搵到。
- ↑ 15.0 15.1 自由時報電子報 (2020-06-10)。〈譴責匯豐！ 龐皮歐：對中國「卑躬屈膝」不會得到好處 - 自由財經〉。《自由時報電子報》。喺2021-01-02搵到。
- ↑ 〈【港版國安法】匯豐表態挺惡法 英國政商界轟「嚴重錯誤、奉承中國」 ｜ 蘋果新聞網 ｜ 蘋果日報〉。《蘋果新聞網》 (臺灣中文)。喺2021-01-02搵到。
- ↑ 〈英外相藍韜文斥匯豐等銀行為私利支持國安法 - YouTube〉。www.youtube.com。喺2021-01-02搵到。
- ↑ 〈HSBC支持港版國安法 英外相批違反政府立場〉。tw.news.yahoo.com (中文)。喺2021-01-02搵到。
- ↑ 自由時報電子報 (2019-11-17)。〈法國黃背心挺香港！ 黑衣人砸碎中國銀行、匯豐銀行玻璃 - 國際〉。《自由時報電子報》 (中文)。喺2021-01-02搵到。