香港連儂牆 (第二代)
第二代香港（式）連儂牆，係指2019年香港修例風波期間出現嘅多梆壁報牆。起初示威者趁住6月12號包圍政府總部喺第一代連儂牆原址重建連儂牆，直到7月2號畀政府清潔工清走。之後各區居民自發社區連儂牆計劃，喺香港各區整壁報牆，俾各區嘅市民貼出訴求，令香港連儂牆「遍地開花」。
各區嘅連儂牆都選址多人經過嘅公眾地方，譬如行人隧道同行人天橋。當中最大陣仗嘅係大埔墟站附近條行人隧道，兩邊牆都黐滿晒Memo紙，畀人叫做「連儂隧道」，但其後多次被一啲有組織嘅破壞者搞破壞，包括貼上八國聯軍嘅國旗，同埋改裝佈置做靈堂，不過好快就畀街坊修復返。
各區嘅連儂牆間唔中都有唔同政見嘅人搞破壞，當中最大單嘅係8月20號將軍澳景林邨同厚德邨之間嘅行人隧道發生嘅斬人案。
連儂牆貼嘅嘢亦由初頭嘅Memo紙，逐漸發展成各式各樣嘅自製海報同文宣物品，亦有一啲藝術創作，譬如砌出連登豬嘅圖案。
2019年12月，由於泛民主派喺第6屆香港區議會選舉大獲全勝，同時政府加強清理，警方亦加密巡查阻止重建，各地嘅連儂牆逐漸消失。
