反逃犯條例修訂運動術語一覽
反逃犯條例修訂運動術語一覽收錄2019年香港反逃犯條例修訂運動入面常見嘅術語。
術語一覽
[編輯] |
同示威者有關
[編輯]- 發夢：出嚟參與示威活動（尤其可能涉及到違法行為），話自己發夢即係無認過自己有出過嚟
- 行街：參與攞唔到不反對通知書嘅遊行，好似平時行街買嘢噉
- 寶寶：對前線示威者嘅稱呼
- 衝衝子：衝鋒陷陣嘅示威者，多數指勇武派[1]
- 家長車接放學：義載前線抗爭者返屋企就係「接放學」，義載嘅車就係「家長車」，司機就係「家長」
- 文具：指前線示威者嘅裝備
- 哨兵：喺示威現場週圍留意住環境嘅人
- FA：「First Aid」嘅簡稱，指在場嘅義務急救員
- FC：「Fact Check/Fact Checking」嘅簡稱，指核實消息係咪真
- 獅鳥/鶳：形象係隻有翼獅子嘅「神獸」，諧音「私了」，代表示威者私下解決，（襲擊）對立嘅人[2]，理論上周不時唔合法。仲有一種解釋係示威者對被警察包庇嘅犯罪者（佢哋通常嗰啲嘅犯罪行為係襲擊持反政府立場嘅普通市民）進行「私人執法」。
- 冷氣軍師：指無去現場參加示威，又鍾意隔空指指點點，所謂教路嘅人；「冷氣」指他調噉樣匿喺冷氣房入面[3]
- 魔法：搞事或者破壞方法——最常聽到嘅火魔法[4]係指用火，重有水魔法[5]、屎魔法[6]……如此類推，出手嘅叫作魔法師
- 落單：粵語意思本身係解「點嘢食」，但反修例運動入面嘅「落單」就借用北方話意思，解做「得返一個人」
- 裝修：指破壞唔同政見店舖嘅行為，皆因破壞完後店舖要安排重新裝修
- 懲罰：指幫襯支持反修例運動店舖（黃店）嘅行為，皆因搞到伙記做到無停手
- （食）人血饅頭：出自魯迅，後被解釋為藉住香港修例風波去攞着數、搵個人利益[7]
- 煲底之約：指一眾抗爭者約定喺抗爭成功之後，去到金鐘立法會綜合大樓地下示威區（俗稱「煲底」）除低豬嘴同口罩相認同一齊慶祝
- （遍地）開花：唔同地區同一時間有群眾聚集，當中部份激進示威者（勇武派）會有堵路同破壞行為[8]；後來亦用來形容處處都有人參加嘅和理非行動[9][10]
- 落雨：當激進示威者有行動嗰陣，同伴大嗌「落雨」，周圍嘅示威者就會開遮遮住佢哋，唔畀其他人見到同埋記者影到
- 手足：反政府抗爭（唔理文武）者之間嘅稱呼；呢個詞不嬲都係用來稱呼朋友同親人嘅，到咗呢輪運動，先至多咗個用法；來自成語「手足情心」
- 和你……：「和理非」之中頭兩個字嘅諧音，用咗來幫唔少活動起名——和你塞、和你唱、和你飛……「同你一齊參加某『和理非』活動」嘅意思
同警方有關
[編輯]- popo：對警察嘅稱呼，嚟自警察嘅英文「police」開頭嘅兩個英文字母[11]
- 狗：對警察嘅另一稱呼，有盲目聽主人話，亂吠亂咬人嘅比喻；衍生術語有「狗車」（警車）、「狗屋/狗竇」（差館）、「狗糧」等
- 速龍：速龍小隊簡稱
- 速生：速龍先生嘅簡稱，同「畜生」同音
- RB：「Road Block」嘅簡稱，指警方（或者示威者）設嘅路障
- TG：通常指催淚彈（Teargas），警方驅散示威者常用工具（另一個意思係Telegram，示威者常用溝通工具）
- TG放題：話警方係噉放催淚彈，令示威者食催淚氣「食到飽」
- 毅進仔：對前線警員嘅稱呼，笑佢哋無文化[12]，得毅進文憑嘅學歷[13]
- 毅進制[14]：每次遊行集會，警方點算嘅人數都會少過主辦單位數字好多，而且科學上明顯錯得離譜；由於差人又被人嗌作「毅進仔」，所以呢套計法就叫「毅進制」[15]
- 藍旗：警方喺示威現場向示威者舉嘅旗，話場示威係違法，要即刻走人，否則警方可能使用武力
- 黑旗：警方喺示威現場向示威者舉嘅旗，話即將會發射催淚彈
- 橙旗：警方喺示威現場向示威者舉嘅旗，話即將會開槍（可以係橡膠彈、布袋彈、海綿彈，甚至實彈）
- 紫旗：警方喺示威現場向示威者舉嘅旗，話在場示威者違反《國安法》，有示威者會將紫旗改名為藝人鄧紫棋（鄧紫旗）
- 警嫂：對人群管理特別用途車（俗稱水炮車）嘅不文稱呼[16]
攷
[編輯]- ↑ 〈【2019年度風雲人物】願榮光歸手足——衝衝子〉。原著喺2020年10月8號歸檔。喺2020年10月5號搵到。
- ↑ 「鶳」快高長大 香港變葛咸城
- ↑ 〈冷氣軍師〉。原著喺2020年10月10號歸檔。喺2020年10月5號搵到。
- ↑ 〈【修例風波】「火魔法」升級汽油彈攻國慶日 警部署5000警力應對〉。原著喺2020年10月10號歸檔。喺2020年10月5號搵到。
- ↑ 〈隔牆有耳：街馬跑手black bloc上陣 張建宗主禮 中水魔法〉。原著喺2020年10月8號歸檔。喺2020年10月5號搵到。
- ↑ 〈【抗暴之戰】深水埗「屎魔法師」向警兩掟懷疑屎彈 瀰漫極濃烈糞便味〉。原著喺2021年6月21號歸檔。喺2020年10月5號搵到。
- ↑ 〈「人血饅頭」的演變〉。原著喺2020年10月9號歸檔。喺2020年10月5號搵到。
- ↑ 〈政府宣布引緊急法禁蒙面後 示威遍地開花 十八區均有示威 港鐵全停〉。原著喺2020年10月11號歸檔。喺2020年10月5號搵到。
- ↑ 〈【名單不斷更新】聯署反對逃犯條例修訂 全港遍地開花 校友聯署涉近三百中學〉。原著喺2020年10月8號歸檔。喺2020年10月5號搵到。
- ↑ 〈東京人遊行撐「反送中」 90後發起少女：逢周六遍地開花〉。原著喺2020年10月8號歸檔。喺2020年10月5號搵到。
- ↑ 咩叫popo同FC？連登十大日常反送中運動嘅「抗爭用語」！
- ↑ 〈【毅進制的錯】警4兇鬼佬「You're police?」 不諳英語卻叫人轉講中文出醜〉。原著喺2020年10月8號歸檔。喺2020年10月5號搵到。
- ↑ 〈不要笑，你比毅進仔可憐〉。原著喺2020年10月29號歸檔。喺2020年10月5號搵到。
- ↑ 反送中十大潮語：「唔好搞我後面」只係第三名？
- ↑ 【附計數機連結】警方點算遊行人數有公式？網民惡搞寫維基兼製作「毅進制」計算機
- ↑ 〈對罵為何攻擊人家老婆？（文：白水＠好青年荼毒室） (09:00) - 20191208 - 文摘〉。《明報新聞網 - 即時新聞 instant news》 (繁體中文)。喺2020-10-09搵到。