毅進制
| 毅進制 | |||||||||||
 以雙對數座標軸呈現2003年以嚟非建制派遊行嘅數字，講述十進制同「毅進制」嘅關聯。線條表示時間順序，最右嘅係2019年6月16號舉行嘅「譴責鎮壓，撤回惡法」大遊行。 | |||||||||||
| 繁體字 | 毅進制 | ||||||||||
|---|---|---|---|---|---|---|---|---|---|---|---|
| 簡化字 | 毅进制 | ||||||||||
| |||||||||||
毅進制（粵拼：ngai6 zeon3 zai3) （英文：Yijinecimal，縮寫：YJ）係香港反逃犯條例修訂運動入面嘅示威者出於對香港警務處（下稱「警方」）嘅遊行人數估算數字過低嘅不滿，而對警察演算方法嘅嘲諷，語源為用於揶揄警員學歷唔高嘅詞語「毅進仔」。香港網民分別為「毅進制」創造咗雙對數線性關係同數字移位演算方法、轉換器。
詞源同歷史[編輯]
喺香港，遊行主辦單位同警方公佈嘅遊行人數數字往往有好大差距。2015年1月下旬發生嘅旺角清場及驅散行動期間，一名警員懷疑因為脾氣暴躁，畀一位女子嘲笑佢為「毅進仔」。自此「毅進仔」用嚟揶揄警員學歷唔高[註 1]。
喺反逃犯條例修訂運動所引起嘅衝突入面，遊行主辦單位同警方公佈嘅數字差距離過百萬，例如喺6月9號「守護香港反送中」大遊行入面，街道水洩不通、好多個港鐵站有大量人潮，民間人權陣線（民陣）宣佈有多達103萬人上街遊行，警方只係指遊行人數最高峰期有24萬；而喺一星期後嘅6月16號「譴責鎮壓，撤回惡法」大遊行，民陣指遊行人數有接近200萬，警方只係指人數最高峰期有33.8萬。為咗諷刺警方方面嘅遊行人數估算數字過低，有網民特登喺中文維基百科寫下對「毅進制」嘅解釋頁面[註 2]。亦有網民為「毅進制」特登製作咗佢同十進制嘅轉換器。
演算方法[編輯]
連登網民「愛情波函數」發現，「毅進制」數值同十進制數值分別作出對數時，兩者之間有線性關係。「愛情波函數」以一個雙對數座標軸圖表表示佢嘅演算方式，其中x軸代表民陣公佈嘅遊行人數嘅對數，而y軸就代表警方公佈嘅遊行人數嘅對數。「愛情波函數」更加表示，以後只要有民陣公佈嘅遊行人數，將數字代入圖標嘅紅線後，就會知道警方公佈嘅遊行人數約數[3]。「愛情波函數」之後使用迴歸分析嘅方法編寫「毅進制」計算器，收集過往遊行集會警方同主辦單位嘅遊行數字，喺座標上得出線性方程，可以喺網上直接轉換，攞到10%以內誤差嘅估算數字。
另一個網民「新數學-毅進制」戲表示只要對數字進行移位，即刻可以轉換十進制數字為「毅進制」。佢以6月16號反對《逃犯條例》修例嘅遊行人數「2,000,001」舉例，首先將4個「0」字重疊變成兩個「8」字，再以最後嘅「1」字將其中一個「8」分開，就可以得到「23,380」，最後將萬位數嘅「2」字化成兩個「0」，就計得出警方嘅「338,000」。
反應[編輯]
前無綫新聞主播伍家謙睇到中文維基百科頁面嘅介紹之後，直言：「連登仔好嘢」，「請受小弟一拜」，而其他網民嘅留言就有「頒個諾貝爾數學獎畀佢」}}」、「已經n年冇用過嘅公式」}}。「好懷念」、「有埋formula好勁」}}」等。
一位數學老師「賭sir」曾經拍攝短片，利用6月16號遊行民陣同警方分別公佈嘅遊行人數，示範由十進制轉換到「毅進制」嘅計算，最後計出「毅進制」可能係14.3848進制。「賭sir」所運用嘅算式涉及五次方程，唔存在公式解，需要用電腦解方程。
| 「 | （電腦計算） |
」 |
——「賭sir」 | ||
根據《蘋果日報》報導，喺7·7九龍區大遊行期間，網上流傳一段影片，見到一位便衣女警手持計算器，最初睇住遊行隊伍時，大約每秒只係掀1次，但係當發現畀人拍攝時，開始迴避鏡頭；當佢望向鏡頭時，更加連續撳兩次計算器。網民形容佢嘅計算方式好似數蚊，又諷刺係「高科技」[4]。警方喺8月19號嘅記者會表示，佢哋所估算嘅總人數，並唔代表參加公眾活動嘅總人數。而所點算嘅總人數，主要係為警隊內部調配警力用途，並唔係主動公開嘅數字[5]。
2019年香港區議會選舉翌日，自稱「光頭警長」嘅劉澤基喺微博上載兩幅Excel試算表截圖，聲稱全香港候選人總得票經統計只有125萬，但係總投票人數為294萬，又反問其餘「160萬選票去了哪？係廢票？……我哋要求所有地區重點票！」求驗傳媒喺11月26號發帖，表示佢只係直接複製官方網頁數據喺Excel相加，但係唔知道Excel唔會相加本身附有星號嘅數字，結果漏咗計算部分選票。選舉事務處亦喺Facebook同經新聞處發稿，澄清佢指控無稽，影響市民對選舉制度嘅信心。《蘋果日報》就形容呢件事係「毅進制嘅錯」[6]。
睇埋[編輯]
註釋[編輯]
參考[編輯]
- ↑ 〈「毅進仔」評論無阻畢業生考警隊 毅進紀律部隊課程查詢人數不減〉. 《明報》. 2019-06-29. 原著喺2019-07-11歸檔. 喺2019-08-02搵到.
- ↑ 鄭秋玲 (2017-10-14). 〈【紀律部隊取錄】員佐級學歷分布 入境處大學生比例最高 達55%〉. 《香港01》. 原著喺2020-10-10歸檔. 喺2019-08-03搵到.
- ↑ 謝茜嘉 (2019-06-20). 〈【逃犯條例】連登巴打再拆解 一條數學公式揭警方人數玄機〉. 《香港01》. 原著喺2020-10-10歸檔. 喺2019-08-02搵到.
- ↑ 〈【逆權運動】首揭「毅進制」點人數秘技！網民直擊女警疑亂撳「毅進計」〉. 《蘋果日報》. 2019-07-08. 原著喺2019-07-07歸檔. 喺2019-08-02搵到.
- ↑ 〈估算民陣818集會僅12.8萬人 警：「反映緊某個時間，並不代表參加活動的總人數」〉. 《眾新聞》. 原著喺2019-08-22歸檔. 喺2019-08-22搵到.
- ↑ 〈【毅進制的錯】光頭警長Excel計錯數屈區選造票 遭選舉處轟造謠〉. 《蘋果日報》. 2019-11-27. 原著喺2019-12-08歸檔. 喺2020-01-04搵到.
出面網頁[編輯]
- 毅進制函數務實法計算機Wayback Machine嘅版面存檔備份
 |