毅進文憑
毅進文憑（英文：Diploma Yi Jin）係教育局喺2012/13學年推出嘅課程（取代以前毅進計劃課程），為中六離校生同成年學員提供另一個學習途徑。完成課程嘅學員會獲得等同香港中學文憑考試五科二級（包括中、英文）嘅學歷。
毅進文憑會喺2023／24學年停辦，由應用教育文憑取代。
課程對象[編輯]
毅進文憑課程嘅對象係中六離校生或已經夠21歲嘅成年人。
目標[編輯]
毅進文憑課程希望學員可以達到以下目標：
- 為中六離校生同成年學員提供另一個學習途徑，畀佢哋得到就業或進修所需要嘅正式學歷；
- 協助學員掌握各種一般技能同常識，包括基本語文能力、資訊科技技能、數學推理能力同人際關係技巧，能夠令到學員能夠喺各方面建立穩固嘅基礎；
- 加強學員嘅學習動機，培養佢哋嘅自學能力，令到佢哋可以獨立噉繼續進修。
課程結構同修讀模式[編輯]
| 學時： | 共600學時 |
| 必修科目： | 中文（120學時） 英文（120學時） 數學（60學時） 通識教育（60學時） 人際傳意技巧（60學時） 以上必修科目嘅課程內容統一發展，每間提供課程嘅院校都要用同一課程授課。 |
| 選修科目： | 學員要修讀三個共180學時嘅選修科目（每科60學時） 各式各樣嘅選修科目由院校各自發展，內容以實用為主，範圍廣泛，以迎合學員唔同嘅興趣同性向。 學員必須選擇修讀院校提供嘅其中一個選修科目群組（當中包含三個每科60學時嘅選修科目）。 |
| 修讀模式： | 全日制或兼讀制 |
| 修讀年期： | 全日制：一年 兼讀制：一般可喺兩年內完成 |
| 畢業要求同頒發毅進文憑嘅安排： | 所有全日制同兼讀制嘅學員都要喺五個必修科目同三個選修科目分別取得整體評核合格，並喺每個科目嘅出席率達到最少80%，先至符合畢業要求，可以獲頒發毅進文憑。 全日制：學員一定要喺同一間院校完成所有科目，先至會獲發文憑。 兼讀制：學員可以報讀唔同院校所提供嘅科目，並喺修畢每一科目後獲發成績單同修業證明。若果要完成課程，學員喺選擇選修科目嘅時候，一定要選擇其中一間院校提供嘅其中一個選修科目群組，唔可以自行組合唔同選修群組裏面嘅選修科目。學員完成整個課程後，可以獲得修讀時數最多嘅院校頒授文憑。 |
| 重修安排： | 學員如果喺個別科目未能夠得到合格成績，之後可以用兼讀制形式重修個別科目，以滿足畢業要求。但係全日制學員一定要喺第一次入讀課程開始計三年之內完成所有科目，而兼讀制學員就一定要喺第一次入讀課程開始計五年之內完成所有科目，唔係嘅話就唔會獲發文憑。 |
資歷認可[編輯]
結業水平[編輯]
香港學術及職業資歷評審局已評定學員成功修畢毅進文憑課程後達到嘅水平，相當於香港中學文憑考試（包括中國語文同英國語文科）第2級嘅程度。成功修畢延伸數學選修科嘅學員，所持有嘅毅進文憑相當於中學文憑試5科（包括中國語文、英國語文同數學科）第2級嘅程度。
進修途徑[編輯]
毅進文憑獲自資高等教育聯盟嘅成員院校接納為符合副學士同高級文憑或同等課程嘅入學資格。成功修畢延伸數學選修科嘅學員獲頒發嘅毅進文憑，更獲自資高等教育聯盟嘅成員院校接納為可以報讀以中學文憑試5科（包括中國語文、英國語文同數學科）第2級程度為入學資格嘅課程。
就業前景[編輯]
毅進文憑嘅資歷獲政府接納為符合超過30個以中學文憑試5科（包括中國語文同英國語文科）第2級成績為入職學歷嘅公務員職位嘅學歷要求，呢啲職位包括救護員、三級康樂助理員、助理外勤統計主任、二級懲教助理、海關關員、消防員、警員、郵務員、社會保障助理員、二級稅務督察同福利工作員等。而成功修畢延伸數學選修科嘅學員獲頒發嘅毅進文憑，亦獲政府接納為符合以中學文憑試5科（包括中國語文、英國語文同數學科）第2級成績為入職學歷嘅公務員職位嘅學歷要求，呢啲職位分別為助理文書主任、助理稅務主任、助理貿易管制主任、二級地政督察同二級物料供應員。
開辦課程院校[編輯]
毅進文憑課程由以下嘅自資高等教育聯盟成員院校提供：
- 香港科技專上書院
- 職業訓練局工商資訊學院
- 香港專業進修學校
- 嶺南大學持續進修學院
- 明愛社區書院
- 香港浸會大學持續教育學院
- 香港公開大學李嘉誠專業進修學院
英文名嘅爭議[編輯]
毅進文憑嘅前身毅進計劃，英文名本嚟叫「Project Springboard」，但之後政府用個名同其他慈善團體相似做理由而改名，改用普通話拼音譯名「Project Yi Jin」，而唔係用廣東話拼音譯名「Project Ngai Chun」，引起坊間批評。