前綫

前綫
創立	1996年8月26號 （2010年9月9號重新註冊）
總部	九龍旺角花園街 193 號 華美樓4/F
政黨口號	爭取普選 捍衛人權 全民制憲 維護法治
區議會議席	0
網站	thefrontier.hk

前綫（英文：The Frontier）係香港一個泛民主派政治團體，響1996年8月26號成立。2008年11月一次會員大會通過同民主黨合併，但解散方案就通過唔到，最後喺2008年12月只得部分成員轉投民主黨。冇加入民主黨嘅成員，包括甄燊港等連同新成員，其後重新組織前綫，2010年9月9號正式重新註冊。

甄燊港之後成為咗新前綫嘅召集人，但去到2018年，前綫Facebook已經冇再更新，網站亦冇再運作。

政治信念

前綫嘅主要政綱係爭取普選、捍衛人權、全民制憲同維護法治。

經濟政策方面，前綫主張香港實施公平競爭政策，反對壟斷同禁止反競爭行為。

民生方面，包括要求改善工人待遇、就最低工資同最高工時立法、提倡更完善嘅失業救濟、更多社會福利同公屋減租。

發起人

發起創立前綫嘅人，包括：

• 劉慧卿
• 何秀蘭
• 李卓人
• 梁耀忠
• 劉千石
• 黃錢其濂

選舉成績

響1998年同2000年立法會選舉，前綫成員一共贏咗五席分區直選產生嘅立法會議席：

• 劉慧卿
• 何秀蘭
• 李卓人（用職工盟名義參選）
• 劉千石（同上）
• 梁耀忠（用街坊工友服務處名義參選）

2002年4月，一批前民主黨少壯派成員，同部分前民協成員，脫黨組成社會民主論壇，之後加入前綫。

2004年立法會選舉，前綫嘅何秀蘭同45條關注組嘅余若薇合組名單參選立法會港島區選舉，但最終何秀蘭落選。一般相信何秀蘭之所以會輸，係因為民主派選戰策略失誤所致。由於呢個原因，前綫響第三屆立法會只剩劉慧卿一個立法會議員。

2007年區議會選舉，前綫共派出15人參加，最終只得3席；而2008年立法會選舉，劉慧卿、李卓人同梁耀忠當選。2008年12月前綫同民主黨合併，3個前綫區議員同埋劉慧卿轉投民主黨，而李卓人同梁耀忠喺前綫重新註冊之後都冇返去，因此前綫一個區議會議席同埋立法會議席都冇。

出面網頁

• 〈官方網站〉。
• 〈社民壇集體加入前綫新聞稿〉。
• 〈前綫Facebook〉。