獨立調查委員會

  想搵香港商業電台叱咤903嘅節目嘅話，請睇903獨立調查委員會。

獨立調查委員會（英文：Independent Commission of Inquiry）係引用香港法例第86章《調查委員會條例》而成立嘅法定組織，由行政長官會同行政會議委任一位或者多位委員（按慣例會委任法官做主席），去調查任何公共機構嘅經營或者管理、任何公職人員嘅行為，或者被認為同公眾有重大關係嘅任何嘢。委員會有法定權力去傳召證人宣誓作證同搜證。

香港主權移交之後，香港特區政府成立過五個獨立調查委員會：

• 新機場調查委員會（1998年）：調查新機場啟用初期貨運混亂嘅問題
• 與香港教育學院有關指控調查委員會（2007年）：調查教育統籌局涉嫌干預香港教育學院運作風波
• 2012年10月1日南丫島附近撞船事故調查委員會（2012年）：調查南丫島撞船事故
• 食水含鉛超標調查委員會（2015年）：調查香港公共屋邨食水含鉛超標嘅問題
• 沙田至中環線項目紅磡站擴建部分及其鄰近建造工程調查委員會（2018年）：調查沙田至中環線工程嘅偷工減料醜聞

2019年香港爆發反逃犯條例修訂運動，示威者要求政府成立獨立調查委員會去調查成場運動，包括徹查運動入面對警方涉嫌濫用暴力嘅指控，但政府一路都唔應承。