旺角再遊行

旺角再遊行

旺角再遊行，係2019年8月3號由香港民間人士發起嘅一次反逃犯條例修訂公眾遊行，警方批准嘅遊行路線由大角咀晏架街遊樂場行去櫻桃街公園。呢次遊行主辦單位宣稱有12萬人參加，警方就話原訂路線高峰期有4,200人。

個名「旺角再遊行」，係呼應對上一次喺七七九龍區大遊行嘅部份遊行人士自發行去旺角嘅遊行。呢次遊行路線原本係由晏架街遊樂場行去旺角麥花臣遊樂場，但初頭警方反對遊行，只批准起點搞集會，經上訴後先至改做按修訂路線遊行，但完全唔經旺角。不過最後部份遊行人士一樣自發行經旺角。

遊行完結之後，部份示威者去到九龍其他地方示威同阻路，當中包括阻塞紅隧九龍入口，入夜後有差館被包圍，亦喺黃大仙爆發警民衝突。