黃大仙區係香港十八區之中嘅一個政區。東面以飛鵝山同觀塘區為界，西面同埋南面沿聯合道、東頭邨道，同九龍城區為界，係全港唯一唔係沿海嘅政區。面積有926公頃，2016年嘅人口有425,235人。
黃大仙區位於九龍半島東北面，北面背靠獅子山、大老山同埋慈雲山，東面係飛鵝山，包含黃大仙、牛池灣、鑽石山、慈雲山、樂富、新蒲崗、竹園邨等地方。
啟德明渠源自慈雲山，去到蒲崗村道成為明渠，沿彩虹道去到太子道東，經啟德下面嘅暗渠流入前啟德機場跑道同埋觀塘間水道。
黃大仙區以住宅為主，工業樓宇集中喺新蒲崗工業區。
