柳永

柳永（生死年唔清楚，有推斷係987年到1053年），字耆卿，係北宋嘅一位詞人，幫妓女樂工作詞而出名。佢係福建崇安人，原名係三變。因為喺屋企排行第七，所以嗰陣啲人又叫佢「柳七」而唔係直接叫佢個名。又因為做過屯田員外郎致仕，所以又叫柳屯田。佢啲作品流傳廣泛之極，一時間好興，所以嗰陣有人話「凡有井水飲處，即能歌柳詞」（有人嘅埞都聽得到柳永嘅詞）。佢早排住喺汴京，經常去歌樓酒肆蒲，寫咗唔少詞關於啲中下層市民嘅生活同心理，啲好多係啲歌妓或者失意文人嘅。因為覺得佢寫嘅好多係艷詞，啲士大夫鄙視並排斥佢，影響埋佢嘅仕途，導致佢中年以後先中到科舉，之後就流落到各地去任啲細官職。佢死嗰陣冇銀紙，得妓女籌錢幫佢收葬。

柳永體裁唔限制喺士大夫嘅小令，而係用慢詞多，呢種體裁喺民間流行開而且篇幅長尐；噉樣做即拓展到宋詞嘅形式，令到慢詞同小令喺詞作上有同等地位。同時佢寫男女情感同埋羈旅行役啲嘢多，宋詞嘅題材都得到擴展。佢移植咗種賦法「鋪陳其事而直言之」（鋪墊加直白嘅語言）入到詞嘅寫作當中，喺鋪陳詞主人公細膩嘅心思同時，採用直白生動通俗嘅語言風格，運用到好多啲俚語俗語，啲好多係由日常生活嚟嘅，噉樣表達啲情感表達得好生動真實。柳永後續影響深遠，孻尾啲詞人似蘇軾同周邦彥兩派都出自佢，佢亦都影響埋元代嘅散曲。跟尾啲通俗文學，都推崇埋柳永嘅地位。柳永啲作品得編成《樂章集》，入便存有佢嘅詞二百幾首，可以睇得出佢嘅貢獻好大。