格連尼治標準時間

格連尼治標準時間（英文：Greenwich Mean Time，W唔發音）又叫格林尼治標準時間，係由英國格林尼治皇家天文台發佈嘅標準時間。從1924年開始，格連尼治天文台每個鐘會發佈一次對時訊息。

理論上講，格連尼治標準時間嘅中午12點係太陽位於格連尼治子午線正上方嘅時間。由於地球自轉嘅速度唔穩定，而公轉嘅軌道係橢圓形而唔係正圓形，因此唔同季節嘅格連尼治標準時間中午12點，同太陽日嘅中午12點會有誤差。喺原子鐘報時普及化之後，格連尼治標準時間已經唔再係全球標準。