格物致知
格物致知即係喺研究事物嘅過程入面得到知識或者良知，呢個係中國古代儒家思想入面一個重要嘅概念。《現代漢語詞典》解釋做：窮究事物嘅原理法則然後總結成理性知識。[1]
理論史
[編輯]「格物致知」最早記載嘅係《禮記‧大學》：「古之欲明明德於天下者，先治其國。欲治其國者，先齊其家，欲齊其家者，先修其身。欲修其身者，先正其心。欲正其心者，先誠其意。欲誠其意者，先致其知。致知在格物。」《易傳·說卦傳》亦都有寫：「窮理盡性，以至於命。」
到咗宋代，理學家程顥、程頤同埋朱熹等人，進一步將呢個意理發揚開去，將「格物致知」視為求學做人嘅重要功夫。程頤講：「今日格一物，明日格一件。積習既多，然後脫然自有貫通處。」朱熹亦都有話「所謂致知在格物者，言欲致吾之知，在即物而窮其理也。蓋人心之靈莫不有知，而天下之物莫不有理，惟於理有未窮，故其知有不盡也。是以《大學》始教，必使學者即凡天下之物，莫不因其已知之理而益窮之，以求至乎其極。」
但係，宋明儒學入面嘅另一個分支陸王心學就對「致知」提出咗唔同嘅睇法，喺宋代嗰陣，陸九淵曾經認為朱熹對「格物致知」嘅理解方法令到個系統「支離破碎」。而明朝嗰陣，王陽明就喺《大學問》寫咗呢一番說話：「『致知』云者，非若後儒所謂充擴其知識之謂也，致吾心之良知焉耳。良知者，孟子所謂『是非之心，人皆有之』者也。是非之心，不待慮而知，不待學而能，是故謂之良知。」
明代羅欽順認為，「格物」就係人對於外界事物嘅認識，亦即係「學問為主，而思辨輔之」。「致知」，就係當人進行思辨時所產生嘅理性活動，以「思辨為主，而學問輔之」。如果冇咗格物，唔去接觸外界事物，呢個認識就只不過係空想；冇咗致知，就會被各種事物嘅現象迷惑，所以呢兩樣嘢一定要互相補足。
根據魯迅喺《吶喊》嘅自序入面記載，喺清末嘅洋務學堂入面，將物理、化學呢啲學科叫做「格致」，亦即係格物致知嘅簡稱。
睇埋
[編輯]參考文獻
[編輯]延伸閱讀
[編輯]
《欽定古今圖書集成·理學彙編·學行典·致知部》，出自《古今圖書集成》
