梁相宜事件
梁相宜事件係中國一次社會事件，2018年3月13號發生，喺北京全國人大會議嘅新聞發布會度，女記者張慧君提嘅問題冗長累贅，企喺佢隔籬嘅女記者梁相宜聽到反白眼，成個過程俾中央電視台直播出街，引起中國以至全世界嘅網民同媒體關注。
人物
[編輯]梁相宜（1986年8月28號-），青島人，「第一財經」女記者。2009年，佢喺中國傳媒大學畢業之後，做過北京晨報、第一財經日報等媒體，採訪經驗豐富[1][2]。
張慧君（1981年9月24號-），「美國全美電視台」女記者、執行台長[3]。佢喺河北大學畢業，試過喺中央電視台實習[3]。
事件
[編輯]2018年3月13號，梁相宜同張慧君參加第十三屆全國人大第一次會議嘅新聞發布會。喺11點16分，著紅色衫嘅張向國資委主任肖亞慶提問，問題冗長。著藍色衫嘅梁聽住佢嘅問題，卒之反白眼。中央電視台直播成個過程出街，引起網民熱議[4][5]。
事件發生之後，社交媒體流傳嘅微信截圖顯示，梁相宜得知自己反白眼成為街談巷議之後，同朋友講，「你愁[瞅]她那德行，問問題比回答的還多。」[6]兩個人衣著啱好係一藍一紅，佢哋兩個嘅強烈對比，促成呢次事件成為網上熱門話題，有關兩個人嘅消息喺各種網站同社交媒體層出不窮。
反響
[編輯]中共喉舌《環球時報》嘅總編輯胡錫進發微博話，「第一財經女記者梁相宜火了。她對旁邊提冗長問題的記者翻白眼，被電視直播了出來，笑翻網民。希望這樣的花絮能在網上留的住，別被刪掉。老百姓就是喜歡這種東西，人性的這種DNA改不了。黨員幹部要隨時講政治，但普通人不必。普通人看政治的視角也喜歡花絮化，但這無傷大雅。」[7]殊不知中共嘅審查急速收緊，當日晏晝4點開始，「藍衣記者」經已俾新浪微博封禁，冇得搜索，胡錫進發嘅微博都俾人刪除[8]。
由於事件激起網民對中國審查制度同政治現象嘅討論，有傳梁相宜可能飯碗不保，被高層政治官員認為事件影響人大會議嘅嚴肅性。同時呢件事亦俾第啲國家媒體報導，逐漸傳遍全球。
紐約時報同英國廣播公司分析指出，初頭單嘢事態擴大之時，部分網民將兩個記者之間嘅強烈對比，引申變成諷刺「兩會」實質係橡皮圖章、政治表演，而且網民起底事件主角及關連人物，引發官場腐敗傳言不斷出現，所以中共對成件事徹底封鎖。中央電視台之後重播片段嘅時候亦將呢橛剪咗[9][10]。
中國歷史學者章立凡話，「沒人真正關心這些會議，甚至連記者也不關心」[11]。
参考
[編輯]- ↑ 〈【反白眼爆紅】梁相宜被翻出「嫩口」舊照 自小表演慾強〉。蘋果日報。2018-03-13。原著喺2018-03-16歸檔。喺2018-05-18搵到。
- ↑ 〈美女财经记者峰会前忙碌的一天，很美很杭州〉。西班牙侨声报。2016-09-04。
- ↑ 3.0 3.1 〈【麻辣总局】红衣女记者的成长之路〉。《中国数字时代》。
- ↑ 〈笑翻！"戏精"女记者开会现场对同行翻白眼走红〉。《网易娱乐》。2018-03-13。
- ↑ 〈蓝衣记者可能是把很多在场记者的内心白眼翻出来了〉。www.douban.com (簡體中文)。原著喺2018-03-14歸檔。喺2018-03-13搵到。
- ↑ 周卫 (2018-03-13)。〈中国两会：女记者翻白眼被直播引爆社交网络〉。《BBC中文网》 (英國英文)。喺2018-03-13搵到。
- ↑ 胡錫進。〈胡錫進的微博〉。weibo.com。喺2018-03-13搵到。
- ↑ 〈【敏感词库】两会翻白眼遭屏蔽 蓝衣记者成敏感词 - 中国数字时代〉。《中国数字时代》 (中國中文)。2018-03-13。喺2018-03-13搵到。
- ↑ 孟宝勒。〈史诗级白眼：两会记者夸张表情引爆中国互联网〉。《纽约时报中文网》。
- ↑ 周衛 BBC中文記者。〈中國兩會：女記者翻白眼被直播引爆社交網絡 - BBC 中文网〉。Bbc.com。喺2018-03-20搵到。
- ↑ 〈兩會"白眼姐"紅遍全中國〉。華爾街日報。2018-03-16。
