榕光社

出自維基百科,自由嘅百科全書
跳去導覽 跳去搵嘢

榕光社(Banyan Services Association)係香港一個非牟利長者服務組織,專為獨居長者提供照顧服務。服務包括夕陽之友免費殮葬服務、免費派飯惠膳服務、贈醫施藥、中醫癌症義診等。

簡介[編輯]

榕光社前身係榕光社老人服務團,喺1989年創立,為當時喺慈雲山屋邨重建受影響嘅無依無靠獨居長者,提供各項所需服務,為長者間建立友誼同守望相助嘅精神。榕光社一直全心全意向全香港嘅獨居無依長者提供多元化服務。

使命[編輯]

開心來.尊嚴活.安心去

服務詳情[編輯]

夕陽之友計劃

2008年創辦,目的係為獨居無依長者代辦身後事。 呢個計劃特別之一係全部由義工負責,義工喺接受長者申請之後,會定期探訪,建立友誼,直至百年歸老為安排跟佢哋意願同有尊嚴嘅喪禮。特別之二係接受突如其來嘅個案,警署、社會福利署、醫院管理局、外間團體轉介。

全免費中醫贈醫施藥

2011年創辦,目的係為有需要嘅長者提供完全免費中醫診証同治療(包括免費中藥)。 呢個計劃分為三個服務:

  1. 以竹園南邨嘅中心、觀塘通明街同太子為義診點;
  2. 以流動醫療車到達黃大仙、觀塘、深水埗、太子、葵涌;
  3. 為行動不便同病情嚴重者上門醫治。
惠膳行動

2013年創辦,目的係一年365日每日兩餐為清貧家庭同有需要長者提供免費飯餐,以減輕佢哋嘅生活負擔。 呢個計劃嘅服務點喺觀塘,有兩大特點:

  1. 全年無休,連大除夕、大年初一繼續服務大眾。
  2. 由義工協助營運:除咗免費派送最小有2個款式可以選擇嘅熱辣辣愛心飯盒,更細心留意佢哋近況,好似朋友噉建立感情。
其他長者服務
  • 義工定期探訪長者
  • 免費提供長者家居裝修、維修、清潔
  • 免費提供轉介服務同協助申請援助
  • 不斷舉辦唔同類形嘅活動畀長者
共建老人家

2017年買入安老院舍院址,目的係建立「非一般、非牟利」完善安老之家,除咗提供舒適同三餐一宿,最重要係令長者有尊嚴噉生活。 呢個計劃嘅最大特點係為入住嘅獨居長者提供一比一義工配對,義工成為佢嘅朋友佢嘅親人,噉就係一家人。

出面網頁[編輯]