榕樹灣天后古廟

出自維基百科,自由嘅百科全書
跳去導覽 跳去搵嘢
榕樹灣天后古廟

榕樹灣天后古廟香港離島南丫島榕樹灣榕樹灣大街1A號3約384號地段,幾時起已無從稽考,但廟裏面有多幅匾額係光緒宣統年間嘅物品,應該有百幾年歷史。保存有光緒二年(1876)匾額一塊。間廟正門上面石額刻住《天后古廟》四個字,兩邊對聯:「天眷垂恩風調雨順,后儀庇福海晏河清。」另有一對較新嘅門聯:「廟貌巍峨地靈人傑,神功浩蕩物埠民康。」喺2010年8月31號被評為香港三級歷史建築

間廟門口有一對石獅子,同匯豐銀行總行門前嘅獅子差唔多樣,形狀同神態都好相似,只係匯豐銀行獅子係銅鑄,而間廟嘅獅子係石雕。間廟喺1964年重修,到1966年臨完工時,遇啱國內文化大革命要破四舊,冇石獅子出口。於是唯有喺香港雕刻石獅。當時南丫島有個石匠,以前係喺南洋幫富翁雕刻石獅,都係匯豐銀行嗰類型嘅外國石獅。坊眾見到中國石獅難搵,外國獅子都照要,因此請咗佢雕刻呢對外國獅子作為守護廟門之用。同中國石獅唔同,外國獅子係橫臥嘅長方形,因此獅頭唔能夠望向廟外,橫放喺門側邊,獅口相對。不過,自從呢間古廟用咗外國獅子守門口之後,榕樹灣嘅漁民,網網千斤,足證明呢對石獅子旺財。

出面網頁[編輯]