跳去內容

櫃桶 (賭廳)

加新連結
出自維基百科，自由嘅百科全書
  想搵傢俬部件嘅話，請睇櫃桶。

喺澳門嘅賭場入面，有啲廳主會由其正式租自博彩公司嘅賭廳之中，間啲地方出嚟，非正式租予其他友仔，包括冇資格成為廳主嗰啲，畀佢哋搭單噉攞嚟自己做生意——名為櫃桶。[1]呢種拍檔方式响武漢肺炎瘟疫蔓延時，尤其流行——一嚟係由於當時市道不境，廳主急於救亡，於是鋌而走險，摻啲唔正規嘅成員玩；二嚟係由於其處於法律中嘅灰色地帶，政府少理。[2]

特點

[編輯]
  1. 喺原理上，係廳主監管嘅地頭；喺實務上由另外一班人打理，招牌、賬房及職員都大致獨立於廳主自理嗰啲……佢哋嘅路牌、門面、裝修及間隔等，睇落同得到博彩公司直接授權嘅商户無異，一般人難以辨認出其地位。[註 1]
  2. 喺名義上，只會用作兑換籌碼及相關勾當；喺事實上，有唔少主要攞嚟非法集資……有啲櫃桶經營者，會用派發高利息為誘因，叫人哋儲錢，或者以入股分利潤作幌子，啗外行人注資。[註 2]
  3. 喺理論上，存款者嘅錢擺咗喺佢自己名下嘅賭廳户口；實際上廳主對於其閃失，多數唔肯負責……時至今日，亦未曾有政府迫廳主為櫃桶出嘅事揹飛之先例……因此，櫃桶主人捲款潛逃嘅事件時有發生——佢哋當中有由於檔嘢運作到咁上下塌咗，因而把心一橫嘅，亦不乏純粹騙徒。[註 3]

註釋

[編輯]
  1. ↑ 由佢哋準備嘅契約文件，可能會將廳主個朵標示出嚟……然而當有嚴重爭詏，廳主多數都唔會認賬……
  2. ↑ 此等行為並非新鮮事……唔少廳主曾經勇於打正旗號自己做……
  3. ↑ 以前有好多類似嘅大單嘢，由廳主老世、廳主僱員或／及疊碼仔親自操刀……三者响今時今日，已經收斂哂……政府善後嘅習慣，漸漸改變……起初只會追究失蹤者，後來又會搞到廳主，家陣重會郁埋博彩公司……

罪案

[編輯]
  1. 有集團經營3個櫃桶，啗人哋存款或入股；[3]初頭佢哋有派高利息，後來唔止停派，重連本金都冇得退。[4]由2021年6月下旬至2021年7月23號，有25個以大陸人為主者報案，總共報稱被詐騙2,718萬港紙。[5]司警响2021年7月3號、2021年7月8號及2021年7月22號拉咗一共5個疑犯——做負責人嘅26歲司徒姓男澳門人、做賬房經理嘅29歲李姓男澳門人、做會計嘅39歲楊姓女澳門人、做職員嘅27歲謝姓男澳門人，以及做股東嘅45歲江姓女香港人，之後將佢哋交去檢察院。[6]濠博新聞話收到料，得知出事之櫃桶係新濠天地之內，依附於京城貴賓會嘅名人薈、澳門金沙之內，依附於輝煌貴賓會嘅匯鼎，以及澳門銀河之內，某依附於世紀貴賓會嘅檔口，而背後老闆係大陸人；[7]到咗2021年7月24號，佢哋已經摺埋哂。[8]
  2. 有個由2021年5月25號運作至2021年7月24號運作嘅櫃桶，吸納咗來自超過180人，超過5,080萬港紙嘅存款，營運者所用之招數係初頭派高利息；[9]後來停派利息兼搬走本金。[10]响2021年7月24號，有個大陸男人為此報案，聲稱損失155萬港紙，隨後收返求助，响2021年7月29號，有另外兩個大陸男人為此報案，聲稱損失30萬港紙及45萬港紙。[11]响2021年7月29號，司警捉咗個做股東嘅32歲郭姓男澳門人疑犯，之後將佢交去檢察院。[12]濠博新聞話收到料，得知出事之櫃桶係新濠天地之內，依附於世紀貴賓會嘅豪門，而其實係有另外一間公司喺背後經佢掠水。[13]
  3. 有人標榜高回報，引誘以大陸人為主嘅70多人，投資逾8,650萬葡紙落個响2021年3月成立嘅櫃桶道——滾存款項約為9,550萬港紙——啲錢卒之俾人轉走哂。[14]有個受害之澳門女人响2021年9月10號收到檔嘢即將玩完嘅通知，故此於同日報案……[15]跟住又有個受害之澳門男人為呢單嘢報案。[16]司警响2021年9月14號捉咗個42歲董姓女澳門人疑犯，之後將佢交去檢察院，起碼重有1個女澳門人疑犯未捉到。[17]濠博新聞話收到料，得知出事嘅櫃桶係路氹某賭場之內，依附於世紀貴賓會嘅鼎峰。[18]
  4. 有個老千集團响2019年10月同2021年9月29號之間，經營過2個櫃桶。[19]佢哋用高利息引誘到超過200人擺入總額為2.866億葡紙嘅存款（部分用作營運開支，其餘據為己有）。[20]响2021年9月29號同2022年3月30號之間，有18個人（10個係大陸人、7個係澳門人及1個香港人）報案，聲稱有總共2,770萬葡紙攞唔返。[21]响2022年3月29號，司警捉咗2個澳門男人（陳姓38歲嘅集團行政總監及林姓30歲嘅集團副行政總裁），之後將佢哋交去檢察院，主腦唔喺澳門兼重未捉到。[22]濠博新聞話收到料，得知嗰檔嘢叫做東博集團，出事嘅櫃桶分別開喺澳門銀河及新濠天地（位於前者嗰個，依附於世紀貴賓會）；[23]主腦姓史，係個大陸人；[24]嗰班友作咗假嘅人名及背景資料，經大陸網站及澳門户外實體廣告等渠道散出去，精心噉搭鷄棚嚟呃人磅水。[25]主腦嘅真名係史志國，乃東博控股有限公司及史志國一人有限公司之頭目；[26]佢嘅假名史志康，唔止擺咗入自製廣告道，重出現喺多個傳媒對於2021年2月6號澳門黃氏宗親會春茗嘅報道（有唔少澳門政商界嘅大粒馬出席，合照亦被廣泛公開）；[27]其虛假身世介紹，擺咗上投資家網等網站。[28]東博集團揾濠博新聞發布過宣傳式報道，又可能夥拍過澳門錶款有限公司，推出咗一系列陀飛輪手錶，藉此自我包裝。[29]

參考

[編輯]
  1. ↑ 〈新聞內容頁〉。macautimes.cc。喺2022-05-16搵到。
  2. ↑ 〈新聞內容頁〉。macautimes.cc。喺2022-05-16搵到。
  3. ↑ 〈司法警察局 Policia Judiciaria〉。www.pj.gov.mo。喺2022-05-17搵到。
  4. ↑ Chiu, Clifford (2021-07-07)。〈誘投資賭廳賺高息回報 理財顧問呃3內地男女共203萬潛逃遇截〉。Allin News (繁體中文)。喺2022-05-17搵到。
  5. ↑ Newsdesk (2021-07-24)。〈賭廳櫃桶巨額騙案港女扮苦主求甩身被捕 涉案櫃桶全收檔〉。Allin News (繁體中文)。喺2022-05-17搵到。
  6. ↑ 〈華僑報〉。www.vakiodaily.com。喺2022-05-17搵到。
  7. ↑ 〈貴賓廳存款騙局再揭內情 港女扮苦主報案被捕〉。《濠江日報》。喺202之後2-05-17搵到。 {{cite web}}: Check date values in: |access-date= (help)CS1 maint: url-status (link)
  8. ↑ Newsdesk (2021-07-26)。〈賭廳「櫃桶」巨騙案揭露非法集資疫下爆煲 議員專家倡修法監管〉。Allin News (繁體中文)。喺2022-05-17搵到。
  9. ↑ 〈司法警察局 Policia Judiciaria〉。www.pj.gov.mo。喺2022-05-17搵到。
  10. ↑ Newsdesk (2021-07-31)。〈賭廳「櫃桶」再爆煲！商人涉高息誘騙半億 宋偉傑料陸續有來〉。Allin News (繁體中文)。喺2022-05-17搵到。
  11. ↑ 〈澳門日報電子版〉。www.macaodaily.com。原著喺2022-05-17歸檔。喺2022-05-17搵到。
  12. ↑ 〈澳門日報電子版〉。www.macaodaily.com。原著喺2022-05-17歸檔。喺2022-05-17搵到。
  13. ↑ wauadmin。〈「櫃桶」結業騙百八客半億〉 (臺灣中文)。喺2022-05-17搵到。
  14. ↑ 〈司法警察局 Policia Judiciaria〉。www.pj.gov.mo。喺2022-05-17搵到。
  15. ↑ Newsdesk (2021-09-15)。〈貴賓會櫃桶爆煲案再現逾70人落疊 澳門女涉串謀捲款近億被捕〉。Allin News (繁體中文)。喺2022-05-17搵到。
  16. ↑ 力報。〈​有片！女子涉嫌捲走貴賓會近九千萬 案件涉及超過70名客人〉。《力報》。喺2022-05-17搵到。 {{cite web}}: zero width space character in |title= at position 1 (help)
  17. ↑ 力報。〈再有貴賓會疑高息吸存騙案 一女子涉捲近九千萬存款〉。《力報》。喺2022-05-17搵到。
  18. ↑ 〈兩女涉設「櫃桶」局騙70名客近億元 | 正思今日澳門〉。www.macautodaynews.com。喺2022-05-17搵到。
  19. ↑ 〈司法警察局 Policia Judiciaria〉。www.pj.gov.mo。喺2022-05-18搵到。
  20. ↑ 〈二百多人共存兩億八千萬 利用貴賓廳『櫃桶』涉高息吸存詐騙兩人被捕 - 正報新聞〉。www.chengpou.com.mo。喺2022-05-18搵到。
  21. ↑ Newsdesk (2022-03-30)。〈司警再破賭廳櫃桶詐騙案拘兩高層 涉高息吸款2.8億逾200人落疊〉。Allin News (繁體中文)。喺2022-05-18搵到。
  22. ↑ 〈澳門日報電子版〉。www.macaodaily.com。喺2022-05-18搵到。{{cite web}}: CS1 maint: url-status (link)
  23. ↑ 力報。〈團結各界把握灣區發展機遇 澳門黃氏宗親會春茗聯歡〉。《力報》。喺2022-05-18搵到。
  24. ↑ 〈印務局 - 商標之保護〉。bo.io.gov.mo。喺2022-05-18搵到。
  25. ↑ Newsdesk (2021-10-29)。〈傳新晉賭廳涉嫌詐騙警方到場搜證 主腦疑化身才俊用假名做老千〉。Allin News (繁體中文)。喺2022-05-18搵到。
  26. ↑ 〈传奇商人史志康：一个发迹于澳门的年轻富豪-投资家网〉。www.investorscn.com。喺2022-05-18搵到。
  27. ↑ 〈華僑報〉。www.jornalvakio.com。喺2022-05-18搵到。
  28. ↑ Newsdesk (2020-12-09)。〈東博疫境開新賭廳冀打響名堂 業界：或看到不一樣的願景〉。Allin News (繁體中文)。喺2022-05-18搵到。
  29. ↑ Newsdesk (2021-02-24)。〈東博夥本地腕錶設計公司首推專屬「陀飛輪」 客戶反應熱烈〉。Allin News (繁體中文)。喺2022-05-18搵到。

另睇

[編輯]
  1. 龐氏騙局
  2. 世紀貴賓會
由「https://zh-yue.wikipedia.org/w/index.php?title=櫃桶_(賭廳)&oldid=2035440」收