欣豐虎航

出自維基百科,自由嘅百科全書
Jump to navigation Jump to search
欣豐虎航嘅標誌
欣豐虎航飛機

欣豐虎航(英文:Tigerair[1];IATA代碼:TR;ICAO代碼:TGW;呼號:Go Cat)簡稱虎航,曾經叫「Tiger Airways」[2],係新加坡嘅一間平價航空公司,以樟宜國際機場為主要基地。公司喺2003年12月成立,而家係新加坡經營載客量最大嘅平價航空公司。2006年嘅載客量達到120萬人次,比前年增長75%[3]

欣豐虎航係第一個用新加坡樟宜國際機場嘅廉航航廈做基地嘅航空公司,亦係新加坡航空嘅子公司之一[4],而佢嘅規模細過另一間廉航瑞安航空。即管虎航嘅競爭對手好多[5],但係虎航仍然重申佢嘅服務範圍集中喺新加坡附近5個鐘航程之內嘅地方,而虎航亦有意圖收購其他亞洲區內嘅廉航,以克服佢嘅阻滯所在[6]

歷史[編輯]

欣豐虎航喺2003年12月12號成立,2004年8月31號開始賣飛,佢開航之初正處在油價急升同對手繁多嘅困難時期。

新加坡航空嘅子公司勝安航空有時會填補新航嘅航班空缺,例如澳門航線,但喺2004年尾勝安航空閘住澳門航線,令欣豐虎航有機會乘虛而入,三個月後攞到澳門嘅航權,喺2005年3月25號首飛去澳門。勝安航空亦因為2004年印度洋大地震嘅關係,而喺2005年2月終止咗喀比航線,令欣豐虎航攞到航權,喺同年10月7日首飛去喀比。

2005年7月,欣豐虎航宣佈,會喺10月30號開通「澳門-馬尼拉(克拉克)」航線,噉做暗示咗虎航將會喺新加坡附近開闢新嘅基地令佢嘅業務多元化。

2007年2月9號,欣豐虎航宣佈,希望喺澳洲成立專營國內線嘅航空分公司,同維珍藍航空、澳洲航空同捷星航空共同競爭[7]。同年3月16號,欣豐虎航取得澳洲當局嘅許可後,即日成立「珀斯虎航」,搞大咗間公司嘅規模。

2007年11月5日,欣豐虎航宣佈。將會喺韓國合資成立一家航空公司,用仁川國際機場做基地飛往日本、蒙古、中國同俄羅斯遠東。但最後因韓國方面有所反對,導致雙方喺2008年尾終止計畫。

2007年10月起開通印度航線,兼有計劃將航線擴展至馬拉,原有嘅馬尼拉(克拉克)航線會暫停服務[8][9]

2010年2月1號,「香港-新加坡」航線開通。

2013年7月2號,欣豐虎航宣佈換品牌名,將Tiger Airways改為Tigerair,同時變更標誌、網站同飛機塗裝[2]

2013年12月16號,欣豐虎航宣佈,同臺灣嘅華航集團共同成立中華民國籍子公司「臺灣虎航」,持股為華航80%、華信航空10%、欣豐虎航10%。

2016年12月14號,新加坡航空子公司欣豐虎航出售臺灣虎航10%股權畀華航,令到臺灣虎航成為由華航所舉腳持股嘅本土平價航空公司[10]

未來[編輯]

欣豐虎航預定會喺2017年下半年併入姊妹公司酷航,到時「虎航」品牌會成為歷史[11][12]

機隊[編輯]

截至2013年8月1號,欣豐虎航有咁多飛機:

飛機 運作緊 訂緊 發動機 位(全部經濟艙)
空中巴士A320-232 22 27 IAE V2527-A5 180個

評級[編輯]

網站 評級
Skytrax 三星級
airlineratings.com 安全度 5/7
品質優良度 2.5/5

參考[編輯]