死丘事件

出自維基百科,自由嘅百科全書

死丘事件係一個都市傳說,話印度河谷文明曾經有原子彈爆發。依種說法,第二次世界大戰原子彈廣島長崎後先至有,而隨意抽出印度經典文字,加以改寫,加以幻想得出,並無得到學術界認同。

說法[編輯]

印度河中央島嶼一座遠古城市叫做摩亨佐達羅城Mohenjo-daro),嗰度原本係一個高度文明嘅城市,但突然間喺同一時間所有人死晒,連成個城都一齊突然毀滅。考古學家又發現,嗰度有曾經發生過猛烈爆炸,而且喺啲屍骨度,重發現有同廣島市長崎市原爆相同嘅幅射含量。

呢個地方喺1922年俾印度考古學家巴納爾發現,由於全個城都係骷髏骨,所以叫做「死丘」,亦有人叫「核死丘」。

摩亨佐達羅城[編輯]

摩亨佐達羅城(Mohenjo-daro)喺印度話意思係「死亡谷地」,呢個城最耐可以去到成五千年前,有高度文明,佢哋有自己嘅文字,又有精密嘅計數方法,城裏面有城牆同街道[1]1922年印度考古學家巴納爾喺印度河下游,即係巴基斯坦信德省拉爾卡納縣南部,發現咗呢個古城。

大爆炸[編輯]

考古學家研究過晒啲遺跡之後發現,摩亨佐達羅城有焚燒過,同埋曾經發生過一次特大爆炸嘅痕跡。而喺遺跡度發現大量骷髏骨,喺呢啲骷髏骨同瓦礫度,又檢出同廣島市長崎市原爆沖擊波相同幅射含量嘅痕跡。而發現好多骷髏骨嘅姿勢,都係啲人行緊街或者係做緊啲日常生活嘅嘢,好似係一個突然嘅災難令到啲人死晒咁。

文獻記載[編輯]

關於摩亨佐達羅城嘅記載,可以喺古印度詩《摩訶婆羅多》度搵到,重形容過呢場大爆炸: 「空中响起轟嗚,跟住係一道閃電,南邊天空有一股火柱沖上天,有一道光過太陽嘅光將個天割開咗一半…房屋、街道同所有生物,都俾呢啲突如其來嘅天火燒毀晒。」

估計毀滅原因[編輯]

關於摩亨佐達羅城點樣毀滅,由於年代太久遠,加上記載又小,只係靠遺跡留低嘅嘢估計,所以實際發生乜事都話唔埋,不過主要有兩種睇法:

核子爆炸[編輯]

美國原子彈之父奧本海默J. Robert Oppenheimer)睇過摩亨佐達羅城嘅記載之後,認為佢講嘅同核子彈襲擊無乜分別。再加上考古發現現場有原爆相同嘅幅射含量,所以有人估計係當時發生核子爆炸,甚至認為史前文明曾經有過核技術,不過呢啲估計都無辦法証明。

黑閃電[編輯]

内文:黑閃電

前蘇聯一啲科學家研究過之後,認為摩亨佐達羅城並唔係因為核子爆炸而毀滅,佢哋認為係一種叫黑閃電嘅天文現象造成。

黑閃電又或者叫黑色閃電,係一種好罕見嘅自然現象,佢係由於大氣入面經過太陽輻射宇宙射線電場之後形成嘅活躍微粒,呢啲微粒喺電磁場反應之下,又會聚埋一齊,好似滾雪球咁越滾越大,變成一個有大有細嘅球。呢啲球有分冷球同亮球,冷球由於唔會發光,反而掉轉發暗,只可以日頭先睇到,所以科學家就叫佢做黑閃電,而亮球就會發光。

呢啲黑閃電出現嗰陣,佢本身無雷,會係天空自由移動,之後喺地面停留,突然又會快速移動,一時光,一時暗[2]

科學家認為,形成黑閃電嘅大氣條件,會產生好多有毒氣體,摩亨佐達羅城嘅人首先係畀呢啲有毒氣體毒死先,之後發生爆炸,當一個黑閃電,其他會跟住爆,溫度可以高到去15000度,而爆炸產生嘅沖擊波,就將成個摩亨佐達羅城毀滅咗。

呢種黑閃電現象其實好罕見,不過喺1983年8月12號墨西哥薩卡特卡天文台就影到黑閃電,証明真係有呢樣嘢。

類似事件[編輯]

伊拉克幼發拉底河谷地亦發現過類似核死丘嘅遺跡,而呢個遺跡估計有8000年咁耐。考古學家喺入面搵到熔合玻璃,而熔合玻璃要喺超過二千度高溫之下先可以形成,自然界好少有制造到呢種高溫嘅現象,只有原子彈爆炸先可以做到。而喺美國核試爆場度就搵到一樣嘅熔合玻璃。

反駁[編輯]

  • 奧本海默只係引用印度詩文,而話現代第一次原子彈爆發,啲人就夾硬推論古代印度有原子彈發。因為依句話而生出種種推說[3]
  • 網上流傳摩訶婆羅多引文,實情並無嗰段經文,而係左抽右抽,唔理原文意思合成,加以改寫到好似原子彈爆發咁。內裏原經文都翻譯錯。原子彈只係爆一次,而唔會連續咁燒,與經文不合[3]
  • 現今考古座城只掘出四十四具屍骨,屍骨測定並非同時間死,反而相距一千年內唔同年代死,而葬於城內。而屍骨身邊並無武器,亦唔見有衝突跡象,唔似有戰爭[4]。現今推推斷印度河谷文明,因為氣候轉為乾旱而消散,種植唔能維持城中生活。印度河谷文明好早就消散,亞利安人到嗰陣,早就唔喺度[4]
  • 城中若受原子彈爆發,爆發中心,冇可能有牆壁完整。同考古發現相反[4]
  • 城邊建設似防洪水,而非因為戰爭[4]
  • 古代燒陶器,燒砂石亦會燒出玻璃[4]
  • 遺跡根本就無輻射異常之高[4]

[編輯]

  1. . 原著喺2008年9月24號歸檔. 喺2008年1月2號搵到.
  2. . 原著喺2010年7月30號歸檔. 喺2008年1月7號搵到.
  3. 3.0 3.1 Jason Colavito. Ancient Atom Bombs Fact, Fraud, and the Myth of Prehistoric Nuclear Warfare (PDF).
  4. 4.0 4.1 4.2 4.3 4.4 4.5 Joanna Gillan. "The Mohenjo Daro 'Massacre'".