殿試
殿試，又叫做「廷試」[1]、「御試」[2]，係中國古代科舉制度既最高級考試，呢個考試制度係唐高宗李治喺公元659年（顯慶四年）首創，但係當時規模唔大。後嚟武則天喺公元690年（天授元年）「策貢士於洛成殿」，喺神都紫微宮洛城殿，由嗰陣時開始，皇帝親自監考就成為咗呢個考試既特色[3]。不過去到公元973年（宋朝開寶六年）殿試先至成為定期既常規考試，雖然通常係由皇帝親自喺皇宮裏面主持，但係有時皇帝會委派大臣主管殿試，而唔係親自監考。宋朝殿試既合格成績分成一甲、二甲、三甲，總共三等，合稱三甲[4]。宋太宗喺公元992年（淳化三年）又再改，將進士分成五等，一、二、三等賜「進士及第」，四、五等賜「進士出身」。去到南宋孝宗趙昚既時候，又改成第一、二甲叫「進士及第」，第三、四甲叫「進士出身」，第五甲叫「同進士出身」。
元朝無咁注重讀書人，雖然仍然用番三甲取士既制度，不過好多時只係一甲取一人。
明朝既科舉考試又回復到類似宋朝既制度，一甲正式確立成只錄取三個人。 就好似《明史·選舉志二》講既「……天子親策於廷，曰廷試，亦曰殿試。分一、二、三甲以為名第之次。一甲止三人，曰狀元、榜眼、探花，賜進士及第。二甲若干人，賜進士出身。三甲若干人，賜同進士出身。狀元、榜眼、探花之名，制所定也。而士大夫又通以鄉試第一為解元，會試第一為會元，二、三甲第一為傳臚……。[1]」
一甲有三個人，皇帝會賜佢哋「進士及第」，考第一名既就叫做「狀元」、第二名既叫做「榜眼」，第三名既叫做「探花」。考到二甲（喺清朝一般係40～50人）既賜「進士出身」，而二甲既第一名（殿試第四名）叫做「傳臚」；考到三甲（喺清朝一般係100～300人）既賜「同進士出身」。
清朝基本上承襲咗明製，科舉制度亦都唔例外，就好似《清史稿·選舉三》講既「……試舉人於京師，曰會試，中式者為貢士。天子親策於廷，曰殿試，名第分一、二、三甲。一甲三人，曰狀元、榜眼、探花，賜進士及第。二甲若干人，賜進士出身。三甲若干人，賜同進士出身。鄉試第一曰解元，會試第一曰會元，二甲第一曰傳臚……。[5]」
呢種形式既考試，亦都傳到古朝鮮、越南，佢哋都係由當地既君主親自主持，或者委派大臣主持。
註：日本亦有進士試（日文：しんしし），不過唔係殿試。
參考
[編輯]- ↑ 1.0 1.1 《明史．卷七○．選舉志二》
- ↑ 〈歷史上科舉考試17位「連中三元」的奇才（圖） - 大紀元〉。《大紀元 www.epochtimes.com》 (繁體中文)。2009-12-05。喺2024-02-24搵到。
- ↑ 〈通典/卷015 - 維基文庫，自由的圖書館：「武太后載初元年二月，策問貢人於洛城殿，數日方了。殿前試人自此始。」〉。zh.wikisource.org (中文)。喺2024-02-24搵到。
{{cite web}}: CS1 maint: url-status (link) - ↑ 〈宋史/卷155：「進士始分三甲，自是錫宴，就瓊林苑。」〉。zh.wikisource.org (中文)。喺2024-02-24搵到。
{{cite web}}: CS1 maint: url-status (link) - ↑ 〈清史稿/卷108 - 维基文库，自由的图书馆〉。zh.wikisource.org (中文)。喺2024-02-24搵到。