民政教區

民政教區
英格蘭民政教區同埋威爾斯社區地圖
分類	教區
位置	英格蘭
高一層	區
建立人	Various, see text
建立時間	Various, see text
數目	10,464 (截至2023)
種類	市 社區 街坊 教區 鎮 鄉村
人口範圍	0-137,387人 (諾咸頓郡)
政府	市議會 社區議會 街坊議會 教區議會 鎮議會 鄉議會

民間教區（英文：Civil parish）係英格蘭地方政府嘅最低層行政單位。 民政教區嘅起源可以追溯到古代嘅教區制度；幾個世紀以嚟，民政教區制度係英格蘭同威爾斯大部分地區，無論係世俗，定係宗教嘅主要行政單位。民政教區同宗教教區喺19世紀開始正式分開；到咗依家，呢兩個教區係完全分開嘅。現代形式嘅民政教區係通過1894年嘅《地方政府法》（56 & 57 Vict. c .73）而成立嘅，呢個法案成立嘅民選教區議會，承擔咗以前宗教教區理事會（parish vestry）嘅世俗職能。

民政教區嘅規模可以有好大嘅差異。細嘅可以係人口稀少嘅農村地區，居民少於一百人，例如車士打堡（Chester Castle）民政教區喺1971年只有8個人，去到2011年嘅人口統計，嗰度已經無人住；根據2011年嘅人口統計，呢啲居民少於一百人嘅民政教區總共有1140個。大嘅民政教區可以係人口超過幾萬，例如森麻實嘅威士頓（Weston-super-Mare）嘅居民人數就多達76,143人，係英格蘭最大嘅民政教區，比第二多人嘅梳士貝利（Shrewsbury）嘅71,715人，多咗4,428人。呢個範圍同歐洲大陸嘅市政府好似，例如法國嘅公社（communes）。但係，同歐洲大陸唔同，教區議會唔係主要嘅權威行政機構，而且喺大多數情況下，喺地方政府嗰度扮演嘅角色亦都相對比較細。

截至9月2023年，英格蘭有10,464個教區，而喺2020年，佢哋覆蓋咗大約40%嘅英國人口。由於歷史嘅原因，民政教區主要覆蓋農村地區同埋比較細嘅城市地區，而大部分較大嘅城市地區都係全部或部分無民政教區；但係自1997年起，如果當地居民要求，就可以喺未有民政教區嘅地區嗰度建立民政教區。 2007年，創建民政教區嘅權利延伸到倫敦自治市，雖然到目前為止只係創建咗昆士柏（Queen's Park）一個民政教區。

如果得到皇家授權，民政教區亦都可以有城市地位，依家英格蘭總共有8個民政教區係有城市地位嘅。 民政教區可以透過教區議會嘅決議，將自己叫做鄉村、鎮、鄰里（neighbourhood）或者社區（community）。民政教區嘅管理機構通常係一個民選嘅教區議會，呢個教區議會可以決定叫自己做村議會、鎮議會、鄰里議會、社區議會，或者市議會（如果個教區有城市地位嘅話）。如果個民政教區嘅人口好少（通常少過150個選民），個教區嘅管治可以係由所有選民都可以出席嘅教區會議嚟做；或者太少人嘅教區可以決定同一個或幾個附近嘅細教區，組成一個共同嘅教區議會。

以前威爾斯亦都有民政教區，直至1974年，佢哋俾社區（communities）取代咗，社區嘅運作方式同英格蘭嘅教區好似。蘇格蘭嘅民政教區俾蘇格蘭嘅地方政府用《1929年地方政府（蘇格蘭）法》廢除咗；蘇格蘭相當於英格蘭嘅民政教區嘅基層政府係喺1973年，通過《1973年地方政府（蘇格蘭）法》成立嘅社區議會區（community council areas），佢哋嘅權力比起英格蘭同威爾士嘅民政教區少。至於北愛爾蘭，嗰度無等同嘅基層政府組織。