汗蒸幕

汗蒸幕（韓文：한증막）係韓國特有嘅沖涼設施，亦係特色旅遊點。「汗蒸」係指將身體放喺熱水或者熱沙入面，透過流汗來醫病，汗蒸幕係將韓國大眾浴池同可以汗蒸嘅熱療室相結合嘅設施。將黃土、優質木炭、鹽等製成嘅熱療汗蒸室加熱至40∼80攝氏度，入房等身體流汗，加速血液循環，排出毒素，可以紓解疲勞，甚至令皮膚光潤。

汗蒸幕入面重有各種各樣嘅休息場所同埋餐飲設施，可以話已經成為韓國人嘅休閒場所。另外，由於24小時營業，汗蒸幕都成日被當做住宿空間。