波恩(又譯「波昂」,德文:Bonn)係德國北萊茵-西法倫州嘅一座城市。歷史上,波恩曾經係科隆公國嘅首都。1949年到1990年德國分裂期間,波恩曾經係西德嘅首都。至今重有六個聯邦政府部門(包括國防部)將總部設喺波恩,而其他政府部門亦都喺波恩設有辦公室。此外,幾間德國國營企業,包括德意志電訊、德意志郵政同德國之聲電臺,都將總部設喺波恩。1996年,聯合國環境與發展事務部將總部搬咗去波恩。
波恩係作曲家貝多芬嘅出生地。