洲際盃 (足球)
洲際盃（Intercontinental Cup）係已經停辦嘅年度世界性球會級賽事，由歐洲足協同埋南美足協喺1960至2004年合辦。比賽係歐冠盃/歐聯冠軍對南美自由盃冠軍。
第一屆洲際盃喺1960年搞。喺頭幾屆兩支球隊主客各打一踢，如果兩隊各贏一場就踢第三場決勝負。1969年開始改為踢兩回合，計作客入波優惠。不過喺1969年洲際盃學生隊主場對AC米蘭嘅次回合出現暴力事件，令洲際盃蒙上陰影，1970年代多次出現歐冠冠軍隊唔參加洲際盃而改由亞軍補上嘅情況。1973年嗰屆頂替阿積士踢洲際盃嘅祖雲達斯唔願去阿根廷對獨立隊，所以淨係喺意大利踢一場過賽事。1975同1978年嗰兩屆都搞唔成。
1980年開始，洲際盃由豐田汽車贊助並冠名為豐田盃（Toyota Cup），同時改為喺日本踢一場過賽事。原本喺東京國立競技場搞，2002年開始改喺橫濱國際綜合競技場搞。
最後一屆洲際盃喺2004年搞。之後洲際盃同國際足總球會世界盃合併成世界冠軍球會盃。
