海爾蒙特
海爾蒙特（Jan Baptista van Helmont，1580年1月12號—1644年12月30號）係一個比利時化學家、生物學家同醫學家。佢提出用化學方法醫病，又被人叫做「氣體化學之父」。
海爾蒙特生喺「毒理學之父」帕拉塞爾蘇斯之後嘅年代，家景富裕，又娶咗個有錢老婆Margaret van Ranst，所以佢可以專心做研究。佢雖然學醫但係從未行過醫。佢相信煉金術，但係佢嘅實驗結論同啲術士唔一樣，認為唔同嘅病有唔同嘅原因，所以要用唔同化學物—後來叫做藥物—來醫。佢對酸鹼中和做咗分析，又將化學同醫學拉埋一齊。
海爾蒙特觀察到物質溶解或者沈澱喺液體入面總重量都唔會變，於是萌芽出「物質守恆」嘅概念。至點解燒完嘅嘢會輕咗，佢認為係轉化咗某啲同空氣唔同嘅嘢，佢叫嗰啲嘢做「Gas」（氣體），源自希臘嘅「chaos」（混沌），「氣體化學之父」爾個名就係咁嚟。佢又發現，燃燒木炭會產生「gas sylvestre」（二氧化碳），同發酵葡萄汁產生嘅氣體一樣，有時會導致喺山洞入面變得好難呼吸。可惜佢因為研究二氧化碳，喺實驗室中一氧化碳毒而死。
海爾蒙特另一個主要貢獻係佢嘅「五年柳樹實驗」。佢種咗樖5磅重嘅柳枝，5年之後生到變169磅嘅柳樹，但係啲泥祇係輕咗2安士，水就淋咗好多，得出植物生長變重係關水事而唔太關泥土事嘅結論，從而啟發咗後人研究光合作用。
參考[編輯]
- Jan Baptista van Helmont | Flemish Physiologist, Chemist & Physician (Britannica) （英文）
- Jan Baptist van Helmont (英文維基百科) （英文）
- Jan Baptista van Helmont summary (Britannica) （英文）
- 《影響人類文明發展的100位科學家》 作者：羅堇文