清暑軒

22°26′39″N 114°00′27″E / 22.44417°N 114.00750°E / 22.44417; 114.00750

清暑軒喺香港元朗屏山，同覲廷書室隔籬，係屏山文物徑嘅文物之一。清暑軒由鄧氏第22代族人鄧香泉喺1870年起，同覲廷書室差唔多同時間落成，畀嚟到嘅賓客或者著名學者同教師住宿。建築物一共有兩層，原本冇名嘅，清暑軒只係底層一間房個名，但而家就用嚟做咗成座建築物嘅名。喺1990年被列為香港一級歷史建築，2010年8月31號確定評級。

清暑軒樓高兩層，呈曲尺形，由於被用作旅館，所以裝飾同排場相當華麗，木刻、壁畫、灰塑、植物、漏窗同斗拱等裝飾顯示出傳統鄧族本地仕紳華宅嘅氣派。清暑軒雖然係獨立建築，但有條通道喺第二層樓同覲廷書室相連。由於工程複雜，當時鄧族專程由廣州同佛山請咗建築師傅嚟完成工程。清暑軒喺1993年重修過，費用由香港賽馬會出錢。清暑軒係私人物業，唔開放。

重有清暑軒漏窗嘅對聯：「紅日當窗花絢錦，和風繞檻桂生香。」

軒裏面另有一重要珍物，就係清代廣東三大狀元之一嘅林召棠送畀鄧香泉嘅對聯：「守東平王格言，為善最樂。導司馬公家訓，積德當先。」意思係效法東漢劉蒼同北宋司馬光，積德行善。