湯圓圓

  「湯圓圓」亦都係香港藝人湯鎮業第三個女，2008年9月17號出世。

湯圓圓係香港電視處境劇《愛·回家之開心速遞》入面嘅虛構角色，由楊秀惠飾演。

角色設定

湯圓圓喺入讀大學時係修讀社工系，之後受到當時喺大學識到嘅男友「才俊」影響而轉修法律系，並且跟佢做咗幾年律師，但其後發現自己根本唔鍾意法律工作，而轉去藝術方面發展，並且喺第289集開始，湯圓圓喺「香港島大學」做「當代藝術」課程嘅講師。

感情生活

喺劇入面講到，湯圓圓起初嘅男朋友係做律師嘅「才俊」，但喺一次搭飛機遊埠嘅時候，睇到「才俊」張身份證，發現佢比自己細十日，由於「才俊」無話俾湯圓圓聽，而且湯圓圓抗拒姊弟戀，最後結果散咗。即使「才俊」喺第289集入面兩次提出復合，但仍然都俾湯圓圓所拒絕。

湯圓圓嘅第二個情人係知名畫家「Duncan」，湯圓圓同「才俊」分手後一時間迷失方向，受到「Duncan」鼓勵而重拾返畫畫興趣，但係湯圓圓入咗去「香港島大學」之後，先至發現「Duncan」嘅真正女朋友係佢間畫室嘅女職員Emma，而Duncan同Emma兩人已經拍咗拖十年而且仲要同居，雖然湯圓圓就算知道「Duncan」有正印女朋友，但係仍然擔心感情告終而唔捨得離開。

喺第289集入面，湯圓圓喺搬運美術用具時撞到朱凌凌嘅相機鏡頭，而湯圓圓當時正希望有一位男士成為佢嘅人體素描模特兒，故些兩人開始投契起上嚟，而朱凌凌喺第312集入面亦都情不自禁，襯住湯圓圓因為知道自己成為感情第三者之後，苦悶酒醉嘅時候而情不自禁偷吻湯圓圓一下。

觀眾意見

有啲網民認為扮湯圓圓呢個角色嘅楊秀惠，個樣比起以往拍電視劇嘅時候變得奇怪，講對白亦都變得不自然，感到唔討好，亦有網民話只能夠接受到朱凌凌同金城安嘅「兄弟情」，而接受不到朱凌凌鍾意其他人，對楊秀惠同「湯圓圓」嘅角色唔多滿意。