漁獲嘅神蹟

漁獲嘅神蹟喺《聖經》記載耶穌行過兩次呢個神蹟，第一次記載喺《路加福音》5章1-11節，耶穌呼召門徒之前；第二次記載喺《約翰福音》21章1-14節，耶穌復活之後。

聖經譯文

「	耶穌企喺革尼撒勒湖邊，群眾逼住佢，要聽上帝嘅道。佢見有兩隻船停喺湖邊，打魚嘅人離開船，去洗網。有一隻船係西門嘅，耶穌就上去，請佢將船撐開，離岸幾步，就坐低，喺船上教導眾人。耶講完之後，對西門話：「將船開到水深嘅地方撒網攞魚。」西門話：「老師，我哋成晚勞力，乜嘢都攞唔到。不過我聽你話，我就撒網。」佢哋撒咗網，圍住好多魚，網差啲裂開，就揮手叫另一隻船上嘅同伴嚟幫佢。佢哋就過嚟，將魚裝滿咗兩隻船，船幾乎要沉落去。西門‧彼得睇見，就跪喺耶穌面前，話：「主呀，離開我啦，我係個罪人。」佢同其他同佢一齊嘅人覺得捉到呢一網嘅魚都好驚訝。佢嘅同伴西庇太嘅仔雅各、約翰都係噉樣。耶穌對西門話：「唔使驚！而家開始，你要得人喇。」佢哋將兩隻船靠近岸，就放低所有嘅，跟從耶穌。	」
——《路加福音》5章1-11節

「	喺呢啲事之後，耶穌喺提比哩亞海邊又向門徒顯現。耶穌顯現嘅經過係噉樣。西門‧彼得、叫低土馬嘅多馬、加利利嘅迦拿人拿但業、西庇太嘅兩個仔，同另外兩個門徒，都喺一齊。西門‧彼得對佢哋話：「我去打魚。」佢哋對佢話：「我哋都同你一齊去。」佢哋就上咗船出去；嗰一晚乜都捉唔到。就快天光嘅時候，耶穌企喺岸上，門徒並唔知道佢係耶穌。耶穌就對佢哋話：「朋友！你哋捉唔捉到魚？」佢哋回答話：「冇。」耶穌對佢哋話：「你哋將網撒喺船嘅右邊，就會有魚。」於是佢哋撒網落去，竟然拉唔到上嚟，因為魚好多。耶穌所愛嘅嗰個門徒對彼得話：「係主！」嗰時西門‧彼得冇着衫，一聽到係主，就着返件衫，跳入海度。其餘嘅門徒因為好近岸邊，大概有二百肘，就坐住船將個網魚拉過嚟。佢哋上咗岸，見到嗰度有炭火，上面有魚同餅。耶穌對佢哋話：「將頭先捉嘅魚拎幾條過嚟。」西門‧彼得就上咗船，將網拉到岸上，網裏面裝滿大魚，共有一百五十三條；雖然魚咁多，但係網都冇爛。耶穌對佢哋話：「你們嚟食早飯。」門徒中冇一個敢問佢：「你係邊個？」因為佢哋知道佢係主。耶穌走過嚟，拎餅畀佢哋，亦照樣拎魚畀佢哋。耶穌喺死裏復活之後向門徒顯現，呢次係第三次。	」
——《約翰福音》21章1-14節

概覽

路加福音

西門彼得、安得烈、雅各同約翰呢四個人喺耶穌受洗之後，跟從佢、做佢嘅門徒；但係而家又返到老本行去捉魚。呢啲人成晚努力打魚，一啲收穫都冇，第二日只好離開船去洗網。嗰陣時，耶穌就企喺革尼撒勒湖邊，吸引相當多嘅群眾，自己上咗西門隻船，並叫佢將船撐開，離岸幾步。耶穌就坐低，喺船上教訓群眾。耶穌講完之後，對西門彼得話：「將船開到水深嘅地方撒網攞魚。」耶穌竟然主動同佢哋一齊捉魚。西門彼得卻以自己嘅打魚經驗提出抗議，話：「老師，我哋成晚勞力，乜嘢都攞唔到。不過我聽你話，我就撒網。」冇幾耐網就裝滿咗魚，佢哋重要請其他船嘅人嚟幫忙，因為船就快沉落去。彼得嗰陣時就跪喺耶穌面前話：「主呀，離開我啦，我係個罪人。」耶穌話：「唔使驚！而家開始，你要得人喇。」回答得非常美妙！喺打魚到嘅神蹟，耶穌啟示咗自己係至高無上嘅。話佢嚟到世上要做嘅工，並需要佢哋幫忙，就係要得人。門徒喺以後嘅人生大海上面，經歷風暴、危險，而得著人嘅時候，佢哋必定諗起昔日耶穌嚟到佢哋中間，同佢哋一齊打魚嘅經歷，向佢哋指出耶穌係主。

約翰福音

耶穌復活之後，有七個門徒喺加利利。彼得話佢要去捉魚，其他門徒都一齊跟住去。佢哋做嘅似乎唔係一個事先計劃嘅行動，而係即興嘅，所以，佢哋並唔係要重操故業。就快天光嘅時候，耶穌喺海岸上出現，但係門徒認唔出係佢。耶穌問佢哋有冇嘢食，佢哋話冇。耶穌建議佢哋將網撒喺船嘅右邊，果然打滿成網魚。耶穌所愛嘅門徒對彼得話：「係主！」彼得為咗見耶穌，即刻着返件衫跳落水，游水上岸，而其他門徒就坐船。佢哋發現耶穌已經起咗炭火，準備咗魚，重有一啲餅。耶穌叫佢哋將啱啱打到嘅魚拎幾條過嚟，彼得就去攞。個網滿咗大魚，共有一百五十三條。耶穌請佢哋嚟食早飯，並將魚同餅分派畀佢哋。佢哋卻冇一個敢問耶穌係邊個，因為知道係主。