澎湖神壇腐屍案
澎湖神壇腐屍案，係指一宗發生喺1990年代初，一宗位於澎湖，以宗教為名嘅騙財殺人案。
事件經過
[編輯]當時案件主犯女主持蘇春柑喺當地開設神壇，又透過佢嘅信徒不停响附近向居民作見證，話拜蘇春柑就可以趨吉避凶，慢慢蘇春柑就喺澎湖有啲名氣[1]。
蘇春柑嘅特色，係會鞭打上門嘅民眾，宣稱可以驅魔治病。要搵蘇春柑睇病問症，首先要喺門口不停自打嘴巴，一直到蘇春柑話可以，而且每次收費至少4千台幣，超過1萬亦係常見，對於當時澎湖嘅居民費用好貴但好多人都唔吝嗇，一個月嘅香油錢就已經超過20萬[1][2]。
事件被揭發
[編輯]由於名氣日漸增加，當時做檢察官嘅管高岳亦聽聞，於是就去拜會，但就引起咗佢嘅懷疑。只不過，佢揾唔到證據[1]。
去到1993年2月，蘇春柑聲稱要閉關修煉，只有弟子先可以進入神壇。但兩個月後，神壇傳出惡臭，鄰居報警，神壇拒絕開門[3]。而案件又咁啱落喺管高岳手上，之後警察破門而入[1]。
當時澎湖嘅里長高健雄，去到2013年接受訪問嘅時候就話以為係死貓死狗，但之後見到警察嘅鐵青面色就知道唔對路。原來，警察喺神壇旁邊一間房仔，發現蘇春柑嘅老竇，陳屍屋內兩個幾月變成腐屍，而屍體上亦有不明傷痕。蘇春柑就聲稱，係佢老竇之前因病離世，但好快會佛祖轉世，起死回生，所以唔能夠埋葬[1]。
管高岳去到2013年接受訪問嘅時候就形容，入到去見到貼滿晒符，話其實蘇春柑係驚，所以就話自己靈修，甚至同信徒講佢老竇無死。佢後來再調查，發現蘇春柑嘅老竇其實係畀佢同信徒監生用棍或者塑膠水管鞭打到昏迷後，又被強灌符水同埋不明藥物。當場死亡時，蘇春柑個女除晒佢全身衣物，話佛祖會令佢復活[3][1]。蘇春柑嘅妹妹作供嘅時候亦話，佢親眼目睹，老竇被蘇春柑同啲信徒捉走，一直打到死為止，之後屍體就一放兩個月。屍臭味越來越犀利，屍體貼滿符咒仲有好多蛆蟲喺上面爬，蘇春柑用符水同電風扇一直吹，想除咗惡臭味，但反而驚動咗警察[1][2]。
正當以為可以當做蘇春柑走火入魔打死老竇嚟結案，警察搜到一封由一個姓吳男子寫畀蘇春柑嘅情書，引起咗檢察官注意。警察聯絡到呢個姓吳男子嘅家屬，但就發現呢個男子原來已經失蹤近一年。後來再查落去，發現神壇仲有一個密室，入面就藏著呢個男子嘅骸骨，而且排得好好，又放咗好多符同紅布。原來，早喺1992年5月，蘇春柑就已經用棍打男友，話幫佢醫病但就失手將佢打死，之後密室藏屍一年[3][1]。
之後，警察仲接到民眾報案，話有一個姓胡男子去神壇醫病，一樣被打到休克，送入醫院，急救無效死亡。家屬最初本來諗住報警，但因為蘇春柑揚言咁做會招來陰魂報復，因此家屬最初唔敢報案[3][1]。
雖然打死咗三個人，但蘇春柑去到法庭上面仍然唔肯老實悔改，反而喺庭上面扮請神附身。蘇春柑同佢嘅信徒最後被判死刑[1]。
影響
[編輯]由於案件轟動一時，所以後嚟被改編為台灣類戲劇（《玫瑰瞳鈴眼》第51集《鞭屍女活佛》）。