澳門威尼斯人

出自維基百科,自由嘅百科全書
澳門威尼斯人(室外)
澳門威尼斯人(室內)
  想搵第二個意思嘅話,請睇威尼斯人

澳門威尼斯人酒店(簡稱:澳門威尼斯人威記;英文:the Venetian Macao)係條位於澳門路氹城塡海區嘅綜合度假村,屬於金沙中國,乃該集團路氹金光大道地域嘅首個項目,開業日期為2007年8月28號。[1][2][3][4]

檔嘢嘅舊名係澳門威尼斯人——度假村——酒店(簡稱:威尼斯人渡假村;英文:the Venetian Macao-Resort-Hotel)。[5]

呢個架部嘅賭場叫威尼斯人娛樂場(英文:Casino Venetian),博彩區面積約莫係卅七萬六千平方呎;酒店位列五星級,樓高39層,一共有2874間客房;商場個名係威尼斯人購物中心,大概有成百萬平方呎咁大,模仿威尼斯古老街道嚟布置,入面除咗有店舖同餐廳,亦有三條人工河,水上面有載客嘅貢多拉同船伕;又起咗百二萬平方呎左右嘅綜合展覽中心同會議室;重有間擺咗萬五張櫈嘅金光綜藝館,用嚟舉辦文娛體育活動;更設劇場,觀眾位數千八到。[6]

麻煩事[編輯]

拒派獎金1278萬——聲稱壞機[編輯]

2014年6月19號嘅《太陽報》報道:
澳門人葉聚平响2014年4月18號,喺威尼斯人娛樂場玩老虎機,個螢光幕一度出現個中「巨獎」嘅圖案組合,不過畫面隨即出錯,部分圖案「消失」咗而死機;當時相應嘅彩金有成1278萬。佢叫附近職員幫手,對方就話去揾總經理嚟搞。葉先生等咗足足三個鐘頭,總經理先至現身,同佢講話,只係機器故障,查實冇中獎……爭論一輪之後,總經理就話同佢去飲茶,兼且準備叫人重新開機。响2014年4月22號,葉先生响美高梅金殿娛樂場又遇到同類情況,獎金為991萬,呢間賭場都係話壞機,唔算數;喺兩處玩老虎機,一共使咗四百萬。佢之後去博監局投訴,然而回覆係,賭場交咗檢查報告,顯示係壞咗機,因此中獎唔算數,不過輸喺嗰啲所謂壞機嘅錢,就全部唔退返。之後高天賜着手幫葉先生追討呢兩筆錢。梁永鏗分析,或者可以喺香港向該集團興訟。陳捷解釋,賭場無辦法故意令老虎機噉樣故障。[7][8][9]

响2014年6月19號,高天賜、梁榮仔同葉先生一齊去到行政長官辦公室遞咗封請願信。到咗2014年6月20號,該事件已經引起咗輿論嘅廣泛關注。[10][11]

2014年7月15號嘅《太陽報》報道:
葉先生透露,之前追討期間,賭場曾經開過個私了價——只係派一成中獎金額畀佢,亦唔退還食咗嘅錢;佢唔接受……到對方交咗由聲稱第三方公司寫嘅驗機報告之後,就唔再睬佢。高天賜指,近嚟幾個月,收到愈嚟愈多投訴,話賭場唔肯向老虎機中獎者派足彩,甚至完全唔派彩,認為該行業同政府都有責任改善之。區錦新批評制度有缺陷;每次有壞機疑雲,都係由博彩公司自己揾第三方檢測公司檢驗機件,而並唔係由獨立嘅官方人員出動;人哋難免覺得嗰啲公司會偏幫賭場。記者向多國嘅監賭機關查詢,佢哋會點樣處理同類案件,美國內華達州博彩管理局同澳洲昆士蘭州嘅博彩監管部門都回覆指,有派官方技術人員調查事件同檢查機件嘅程序。[12][13][14]

响2014年7月15號,高天賜喺立法會全體大會上,為葉先生嘅遭遇同大把其他相似問題提出口頭質詢。雪萬龍回應話博監局判定咗佢冇中獎,因此冇錢收。高天賜表示對以上回覆感到失望,認為政府應該開間化驗室,專責檢驗博彩機器有冇故障,提高中立性。區錦新就批評道,賭場現時唔使為自己嘅壞機負責或者賠償,法例必須檢討。葉先生有到場旁聽,聲言唔會放棄申訴,將會委託高天賜,轉為向譚伯源,繼續追討。[15]

响2014年7月22號,葉先生同高天賜一齊去崔世安競選辦公室遞信求助。葉先生向傳媒表示,懷疑事件牽涉官商勾結,政府有偏幫賭場嘅嫌疑。高天賜話,賭場噉樣搞法,會整衰澳門博彩業名聲,又希望可以同崔世安及譚伯源對話。[16]

唔肯派彩106萬——取消資格[編輯]

响2008年2月15號,澳門人鄧詩蘊喺威尼斯人娛樂場玩老虎機時,中咗「日日角王霸主」大獎,職員行埋去通知佢,贏得咗105.56萬彩金同澳門威尼斯人酒店嘅兩晚免費套房住宿,翌日有頒獎儀式,並叫佢攞出身份證同喺張聲明書上面簽名。到咗2008年2月16號,鄧女士由職員帶到頒獎現場,跟住有另一個職員嚟到,問佢係唔係有親屬喺嗰間公司做嘢。鄧女士答咗佢話阿哥係之後,職員即刻拎份文件出嚟,指出因為有條款規定,該公司工作人員親屬冇資格參加上述遊戲,所以佢唔合資格,冇得收彩金。然後,鄧女士要求職員將此事通知博監局,有一個應聲走咗,返嚟時話畀佢知,該局唔受理。鄧女士家人等到2008年2月18日辦公時間,為此打電話去博監局,被邀請去筆錄,並獲答應為佢跟進。

鄧女士响2008年2月18號向《澳門日報》投訴時指,由申請用嚟投注有關老虎機嘅會員咭,至到準備攞上述大獎之前,一直冇聽聞嗰條規則存在;職員只係會提醒佢,將張咭插啱位嚟操作部機,就可能會中獎;之前嘅輸錢投注以及兩次攞到價值30蚊嘅獎勵,都無被阻止;賭場嘅廣告、宣傳單張同老虎機上面亦冇呢啲字句。

《太陽報》記者响2008年2月19號去到嗰間賭場考察,發現宣傳單張上面雖然列出咗幾十條條款細節,但係就冇以上嗰條,只係用細字寫住「有關抽奬詳情,請參閱條款及細則或到路氹金光大道濠會櫃檯查詢」。[17]

响2008年2月22號,博監局發出署名雪萬龍嘅消息稿,話賭場唔使派彩——雪先生响2007年12月19號核准咗堆規則,當中第十二條列明,威尼斯人澳門股份有限公司嘅員工同代理商及其家屬都唔參加得呢個活動,而條規則有响適用老虎機區域道騷出嚟,喺傳單最底亦有提示客人去櫃檯查詢條款同細則,而鄧女士個阿哥係該公司嘅客戶推廣經理,故此佢唔合資格。[18]

《澳門日報》响2008年2月23號轉述鄧女士話,對該局嘅裁決好唔滿意,認為對澳門人好唔公平,又提及之前唔夠秤嘅香港人阿彤犯規入場,都攞到獎金……重指摘間賭場賠細唔賠大,又唔答員工家屬輸嘅錢會點樣處理,質疑賭場自訂嘅規條似乎凌駕於法律之上,希望政府同傳媒關注……佢誓言爭取到底。

備註項[編輯]

「博監局」係「博彩監察協調局」嘅簡稱。文章當中嘅錢銀都以港圓做單位,統統寫成約數。

參考表[編輯]

  1. https://www.macaotourism.gov.mo/zh-hant/accommodation/the-venetian-macao/
  2. https://www.macaotourism.gov.mo/en/accommodation/the-venetian-macao/
  3. . 原著喺2021年8月19號歸檔. 喺2021年8月19號搵到.
  4. . 原著喺2021年8月19號歸檔. 喺2021年8月19號搵到.
  5. http://images.io.gov.mo/bo/i/2007/35/orde-35-2007.pdf
  6. https://hk.sandschina.com/properties/the-venetian-macao.html
  7. http://the-sun.on.cc/cnt/news/20140619/00405_001.html
  8. http://the-sun.on.cc/cnt/news/20140619/00407_002.html
  9. http://the-sun.on.cc/cnt/news/20140619/00407_003.html
  10. http://the-sun.on.cc/cnt/news/20140620/00407_080.html
  11. . 原著喺2021年8月26號歸檔. 喺2021年8月21號搵到.
  12. http://the-sun.on.cc/cnt/news/20140715/00410_097.html
  13. http://the-sun.on.cc/cnt/news/20140715/00410_098.html
  14. http://the-sun.on.cc/cnt/news/20140715/00410_099.html
  15. http://the-sun.on.cc/cnt/news/20140716/00407_072.html
  16. https://aamacau.com/2014/07/22/%E8%A7%92%E5%AD%90%E6%A9%9F%E4%B8%AD%E7%8D%8E%E4%B8%8D%E7%8D%B2%E6%B4%BE%E5%BD%A9-%E4%BA%8B%E4%B8%BB%E6%8C%87%E6%9C%89%E5%AE%98%E5%95%86%E5%8B%BE%E7%B5%90%E4%B9%8B%E5%AB%8C/
  17. http://the-sun.on.cc/channels/news/20080220/20080220021721_0000.html
  18. http://the-sun.on.cc/channels/news/20080223/20080223031454_0000.html

連出去[編輯]