獅子狗卷

一條獅子狗卷

獅子狗卷，又叫獅子狗魚蛋，簡稱獅子狗，係加咗工嘅魚肉卷。空心圓柱狀，或管狀，直徑2厘米，長4-6厘米。頭尾淺黃色，中間啡色同啲皺紋狀表面，睇落似燒過。其實佢係日本食物，叫做竹輪，讀做ちくわ或者拼做chikuwa。而家可以買到嘅大多數用機造，唔同傳統用竹筒燒嘅造法。

獅子狗卷因為夠平、唔肥又多蛋白質，亦都畀人拎來做狗糧。

名嘅由來

獅子狗卷唔係獅子狗肉。喺1980年代無綫電視兒童節目時間播一套日本配音卡通《忍者小靈精》，裏面嗰隻獅子狗最鍾意食呢種嘢。當時嘅香港人完全未見過，唔認識，後來可以買到，嗰樣同卡通畫嘅一模一樣，呢個印象深入民心，之後好多人都叫呢隻食品做獅子狗卷。

名嘅誤用

2019年7月，有網民借「獅子狗」諧音創作詞語「撕紙狗」，揶揄無幾耐之前喺大埔撕走示威紙標貼嘅香港警察。好快，香港吉野家嘅面書網站登咗個相關嘅灰諧商業廣告，內文係「想食獅子狗，唔只大埔有。嘢可以亂食，名唔可以亂叫」。之後餐廳老總洪明基話畀香港《文匯報》知，撑警嘅渠對呢單嘢「極為憤怒」兼「非常痛心」，已經同負責嘅外判廣告公司解咗約，負責廣告事務嘅公司員工亦都炒埋魷魚。